ވަޒީރުންނާއި މެމްބަރުންނަށް ބިނާވެށި ބިލު ނޭނގޭ، ތަސްދީގު ނުކުރޭ: ކައުންސިލުތަކުގެ ޖަމިއްޔާ
ބިނާވެށި ޕްލޭން ކުރުމާއި ހިންގުމުގެ ބިލުގައި ހިމެނިފައިވާ ކަންކަން މިނިސްޓަރުންނާއި ރައްޔިތުންގެ މަޖިލިހުގެ މެމްބަރުންނަށް ވެސް އެނގިވަޑައިނުގަންނަވާ ކަމަށާއި ތަސްދީގު ނުކޮށް ބިލާ މެދު އިތުރަށް މަޝްވަރާ ކުރުމަށް މޯލްޑިވްސް ލޯކަލް ކައުންސިލްސް އެސޯސިއޭޝަން (އެމްއެލްސީއޭ) އިން ގޮވާލައިފި އެވެ.
ބިނާވެށި ޕްލޭން ކުރުމާއި ހިންގުމުގެ ބިލު ސަރުކާރުގެ ފަރާތުން މަޖިލިހަށް ހުށަހެޅީ ކޮލަމާފުށި ދާއިރާގެ ކޮންގްރެސް ޕާޓީގެ މެމްބަރު އިބްރާހިމް ދީދީ އެވެ. ބިލު ހުށަހެޅި ސަބަބެއް ކަމަށް ބުނެފައި ވަނީ ބިނާވެށި ޕްލޭންކޮށް ހިންގުމާ ގުޅޭ ކަންކަން ހަރުދަނާ ގާނޫނީ އޮނިގަނޑެއްގެ ދަށުން އިންތިޒާމު ކުރުމަށް ދެމެހެއްޓެނިވި އަދި ޒިންމާދާރު ގޮތެއްގައި ބިމުގެ ބޭނުން ހިފޭނެ މޭރުމުން, ބިނާވެށި ޕްލޭންކޮށް ހިންގުމާއި ބިނާވެށީގެ ޕްލޭންތަކާ އެއްގޮތްވާ ގޮތުގެ މަތިން ބިން ތަރައްގީކޮށް ހިންގުމުގެ އަސާސީ މިންގަނޑުތަކާއި ތަރައްގީގެ މަސައްކަތްތައް މޮނިޓާކޮށް ފިޔަވަޅު އެޅުމާ ބެހޭ އުސޫލުތައް ބަޔާން ކުރުން ކަމަށެވެ.
އެމްއެލްސީއޭއިން މިއަދު ބޭއްވި ނޫސްވެރިންގެ ބައްދަލުވުމުގައި ވާހަކަ ދައްކަވަމުން އެ ޖަމިއްޔާގެ ޗެއާޕާސަން އަދި ނ. އަތޮޅު ކައުންސިލުގެ ރައީސް މުހައްމަދު ބަޝީރު (ބައްޓޭ) ވިދާޅުވީ ބިލުގައި ހިމެނިފައިވާ ކަންކަން މިނިސްޓަރުންނަށާއި މެމްބަރުންނަށް ވެސް އެނގިވަޑައިނުގަންނަވާ ކަމަށެވެ.
"މި އާ ގުޅޭގޮތުން އަޅުގަނޑުމެންގެ މަޝްވަރާއިން އެނގެނީ ރައްޔިތުންގެ މަޖިލިހުގެ މެމްބަރުންނަކަށް ވެސް މި ބިލުގައި މިވާ ގޮތެއް ނޭނގޭ. ވަޒީރު ބޭފުޅުންނަކަށް ވެސް މި ބިލުގައި ވާގޮތެއް ނޭނގެ،" ބައްޓޭ ވިދާޅުވި އެވެ.
މިނިސްޓްރީތަކުން ދައްކާފައިވާ ވާހަކަތަކަށް ބަލާއިރު މިނިސްޓަރުންގެ މެދުގައި ކަމާ ގުޅޭގޮތުން މަޝްވަރާ ކޮށްފައިވާ ކަމަށް ނުބެލޭ ކަމަށެވެ. "ރައީސުލްޖުމްހޫރިއްޔާގެ އަރިހުން އަޅުގަނޑުމެން އެދެނީ މި ގާނޫނު ތަސްދީގުނުކޮށް އިހަށް މަޑުކުރުމަށް،" އިތުރަށް ވިދާޅުވި އެވެ.
އެދެނީ ފުޅާކޮށް މަޝްވަރާކޮށް، ހުރި މައްސަލަތައް ދެނެގަނެ، ޕްލޭންތައް ކުރެވެމުންދާ ގޮތަށް ރިއާޔަތްކޮށް މިފަދަ ބިލުތައް އަލުން ފަރުމާ ކުރުމަށްފަހު މަޖިލިހަށް ހުށަހެޅުން ކަމުގަ އެވެ.
އެ ޖަމިއްޔާއިން އިތުރަށް ބުނެފައިވާ ގޮތުގައި ބިނާވެށި ޕްލޭން ކުރުމާއި ހިންގުމުގެ ބިލާއި ދިވެހިރާއްޖޭގެ އިދާރީ ދާއިރާތައް ލާމަރުކަޒީ އުސޫލުން ހިންގުމުގެ ގާނޫނަށް ބަދަލު ގެނައުމުގެ ބިލުތަކުން ރާއްޖޭގެ ހިންގުމުގެ ނިޒާމަށް ބޮޑެތި ބަދަލުތަކެއް އަންނާނެ ކަމުގަ އެވެ. ރައްޔިތުންނާ ގާތުން ހިދުމަތް ފޯރުކޮށްދޭ ލޯކަލް ކައުންސިލުތަކުގެ ހިންގުމުގެ ނިޒާމަށް އަންނަ މި ބަދަލުތަކާ އެކު މުޖުތަމައުގެ ވަސީލަތްތައް މުޖުތަމައަށް އެންމެ ފައިދާވާނެ ގޮތަށް ރާވާ ތަރުތީބު ކުރުމުގެ ފުރުސަތު ގެއްލުމުގެ ހިރާސް އޮތް ކަމަށް ދެކޭ ކަމުގަ އެވެ.
މި ބައްދަލުވުމުގައި ބައިވެރިވެވަޑައިގެންނެވި ކައުންސިލަރުން ވަނީ ސަރުކާރުގެ ފަރާތުން މަޖިލިހަށް ހުށަހަޅާފައިވާ އާބަން ޕްލޭނިން އަދި އާބަން ޑިވެލޮޕްމަންޓްގެ ބިލުގައި ހުރި ކަންކަމާ ގުޅޭގޮތުން ވެސް ކަންބޮޑުވުން ފާޅުކުރައްވާފަ އެވެ.
އެނގޭމީހާ ތިއުޅެނީ