ލޭނު މަސްވެރިކަމަށް ހުއްދަ ނުދިނުމުން ނަޝީދުގެ ތައުރީފް ސަރުކާރަށް
ލޭނު މަސްވެރިކަން ކުރަން ހުއްދަ ނުދޭން މިއަދު ސަރުކާރުން ނިންމި ނިންމުމަށް ކުރީގެ ރައީސް މުޙައްމަދު ނަޝީދު ތައުރީފް ކުރައްވައިފި އެވެ.
ލޭނު މަސްވެރިކަމަށް ހުއްދަ ދިނުމަށް ވަޒީރުންގެ މަޖިލީހުން ފާސްކޮށްފައި ވަނީ މިދިޔަ ޖޫން މަހުގެ 13 ވަނަ ދުވަހު އެވެ. ރާއްޖޭގައި ލޭނު އަޅައިގެން މަސްވެރިކަން ކުރަން ހުޅުވައިލުން އަނބުރާ ގެންގޮސް ލޭނު މަސްވެރިކަމަށް ހުއްދަ ނުދޭން މިއަދު ރައީސް ނިންމެވި އެވެ.
ރައީސް އޮފީހުން ބުނީ އެ ނިންމުން ބަދަލުކުރަން ރައީސް ނިންމަވާފައިވަނީ އެކަމާ ގުޅިގެން ކަންބޮޑުވުން ފާޅުކޮށް، 'ބޮޑު ކަންނެލި މަސްވެރީންގެ ޔޫނިއަން'އިން ހުށަހެޅި ކަންކަމަށް ބެލުމަށް ފަހު ކަމަށެވެ.
މިނިންމުމާއި ގުޅިގެން ރައީސް ނަޝީދު މިއަދު ކުރެއްވި ޓުވީޓެއްގައި ވިދާޅުވީ މިނިންމުމަށް ރައީސް މުއިއްޒުއަށް ސާބަސް ރައްދު ކުރައްވާ ކަމަށެވެ. އަދި ލޭނު މަސްވެރިކަން ކުރަން ހުއްދަ ދިންނަމަ އޭގެ ސަބަބުން ރާއްޖޭގެ ފަތުރުވެރިކަމުގެ ބްރޭންޑަށާއި ރާއްޖޭގެ މަސްވެރިކަމުގެ ސިނާއަތަށްވެސް އޭގެ ގެއްލުން ލިބޭނެކަމަށް ނަޝީދު ވިދާޅުވި އެވެ.
"ރާއްޖޭގެ ކަންނެލި މަސްވެރިކަމަކީ ދުނިޔޭގެ އެންމެ ދެމެހެއްޓެނިވި ބާވަތުގެ މަސްވެރިކަން. އެއީ ވަކި ވަކި މަހުން ބާނައިގެން މަސްވެރިކަން ކުރާތީ"
ނަޝީދު ވިދާޅުވީ އިނގިރޭސިވިލާތާއި ޔޫރަޕިއަން ޔޫނިއަންގެ ގައުމުތަކުން ބޮޑެތި ބޯޓު ފަހަރު ބޭނުންކޮށްގެން ގަނޑުކޮށް މަސް ބާާނަމުން ދާއިރު އެގައުމުތަކުން ރާއްޖެއިން ބާނާ މަހަށް ޑިއުޓީ ނަގާތީ ކަންބޮޑުވާ ކަމަށެވެ. މިނިންމުން ބަދަލުކުރަން ނަޝީދު ވަނީ ގޮވާލައްވައިފަ އެވެ.
