ސްޕްރީމް ކޯޓަށް ދެފަނޑިޔާރަކު ރައީސް އައްޔަން ކުރައްވައިފި
ސްޕްރީމް ކޯޓުގެ ފަނޑިޔާރުކަމަށް މިއަދު ދެބޭފުޅަކު ރައީސް އިބްރާހިމް މުހައްމަދު ޞާލިހު އައްޔަން ކުރައްވައިފިއެވެ.
ސްޕްރީމް ކޯޓުގެ ފަނޑިޔާރުން ކަމަށް ރައީސް އައްޔަން ކުރެއްވި ދެބޭފުޅުންނަކީ އަލްއުސްތާޒް އަލީ ރަޝީދާއި އަދި ޑރ. މުހައްމަދު އިބްރާހިމް އެވެ. މި ދެފަނޑިޔާރުންނަށް މަގާމުގެ ފަތްކޮޅު ހަވާލު ކުރައްވާފައިވަނީ މިއަދު ރައީސުލްޖުމްހޫރިއްޔާގެ އޮފީހުގައި ބޭއްވި ރަސްމިއްޔާތެއްގައެވެ.
އަލް އުސްތާޒް އަލީ ރަޝީދަކީ މިސްރުގެ އަލް އަޒްހަރު ޔުނިވާރސިޓީ އިން ބެޗްލާރސް އޮފް ޝަރީއާ އިން ލޯވް ފުރިހަމަ ކުރައްވައިގެން ހުންނެވި ބޭފުޅެކެވެ. މީގެ ކުރިން ކްރިމިނަލް ކޯޓުގައި ވެސް އުސްތާޒް އަލީ ރަޝީދު ވަނީ ފަނޑިޔާރުކަން ކުރައްވައިފައެވެ. އަދި ހަމަ އެހެންމެ ޑްރަގް ކޯޓުގެ ފަނޑިޔާރު ކަމުގައިވެސް ހުންނެވިއެވެ. އަދި އުސްތާޒް އަލީ ރަޝީދަކީ މީގެ ކުރިން ސިވިލް ކޯޓުގެ އިސް ފަނޑިޔާރުކަން ވެސް ކުރައްވާފައިވާ ބޭފުޅެކެވެ،
ޑރ.މުހައްމަދު އިބްރާހިމް އަކީ އިސްލާމިކް ކޮމާޝަލް ލޯވ ގެ ދާއިރާއިން ޑޮކްޓަރޭޓް ސަނަދު ހާސިލު ކުރައްވައިގެން ހުންނެވި ބޭފުޅެކެވެ. އެ ބޭފުޅާ ޑޮކްޓަރޭޓް ކަމުގެ ސަނަދު ހާސިލު ކުރެއްވީ ޔުނިވާރސިޓީ އޮފް މަލަޔާ އިންނެވެ. ޑރ.މުހައްމަދު އިބްރާހިމް އަކީ ދިވެހި ރާއްޖޭގެ އިސްލާމީ ޔުނިވާރސިޓީގެ ކައުންސިލް މެމްބަރެކެވެ. އަދި ހައުސިން ޑިވެލޮޕްމަންޓް ފިނޭންސް ކޯޕަރޭޝަންގެ ޝަރީއާ ކޮމިޓީގެ މެމްބަރެކެވެ. އެންމެ ފަހުން މަސައްކަތް ކުރެއްވީ "ޕްރިމިއަރ ޗެމްބަރސް" ގެ މުހިއްމު މެމްބަރެއްގެ ގޮތުގައެވެ.
