އެކްސިޑެންޓުވި ރޭސް ކާރު ދުއްވި މީހާ ތިން ދުވަހަށް ބަންދުކޮށްފި
ބާރު ސްޕީޑުގައި ދުއްވާފައި އައި ރޭސް ކާރެއް، މަޑުކޮށްގެން އިން ސައިކަލެއްގައި ޖެހި ހިނގި އެކްސިޑެންޓުގައި، ކާރު ދުއްވަން އިންކަމަށް ތުހުމަތު ކުރެވޭ މީހާ އަލުން ހައްޔަރުކޮށް ބަންދުގެ މުއްދަތު ޖަހައިފި އެވެ.
މިމައްސަލައިގައި ކާރުގައި ތިބި ތިން މީހުން ހައްޔަރު ކުރި އެވެ. އެހެންނަމަވެސް ކާރު ދުއްވަން އިންކަމަށް ތުހުމަތު ކުރާ އިބްރާހިމް އިކްރާމް ދޫވީ ދަށު ކޯޓުން އޭނާއަށް ވަކީލަކު އައްޔަނު ކުރަން ފުރުސަތު ނުދިނުމާއި ގުޅިގެން ހައި ކޯޓުގައި އިކްރާމްގެ ފަރާތުން މައްސަލަ އިސްތިއުނާފު ކުރުމުންނެވެ.
މިމަހުގެ އެއް ވަނަ ދުވަހު އިކްރާމް މިނިވަންވި ނަމަވެސް ހަމަ އެދުވަހުގެ ރޭ ފުލުހުން ވަނީ ކޯޓު އަމުރެއްގެ ދަށުން އޭނާ ހައްޔަރުކޮށްފަ އެވެ. މިއަދު ފުލުހުން ބުނީ އިކްރާމްގެ ބަންދަށް ކޯޓުން ތިން ދުވަސް ޖަހާފައިވާ ކަމަށެވެ.
އިކްރާމްގެ ފަރާތުން ހައި ކޯޓަށް ހުށަހެޅި އިސްތިއުނާފު މައްސަލައިގައި ހައި ކޯޓުން ކުރި ހުކުމުގައި ވަނީ ފުލުހުން ދޮގު ހެދި މައްސަލަ ތަހުގީގު ކުރަން ގޮވާލައިފަ އެވެ. މިމައްސަލަ ތަހުގީގުކޮށް އެއްވެސް ފަރާތެއްގެ އިހުމާލެއް ވާނަމަ ހަރުކަށި ފިޔަވަޅު އަޅާނެކަމަށް ދާހިލީ ވަޒީރު އަލީ އިހުސާން ވަނީ ވިދާޅުވެފަ އެވެ.
މިއަހަރުގެ ޖުލައި 31 ވަނަ ދުވަހު ހުޅުމާލޭގައި ހިނގި އެކްސިޑެންޓުގައި ހައްޔަރު ކުރި ތިން މީހުންނަކީވެސް ކުށުގެ ރެކޯޑު އޮތް ތިން މީހުންނެވެ.
ޔަގީން ކަމާއިއެކު ބުނަމެވެ. ތިޔައިން އެކަކުވެސް ނުހިފެއްޓޭނެއެވެ. ގައުމުގައި ގޭންގް ތަކުގެ ނުފޫޒާއި ބާރު އޮތްވަރު ތިޔަ މީހުންނަށް ވިސްނާލަންވެސް ނޭގޭނެއެވެ. ސަލާމް!