އެމްޕީއެލްގެ ހަޔާތުގައި ތާރީހީ ރެކޯޑެއް، އެއްދުވަހުން 934 ކޮންޓެއިނަރަށް ހިދުމަތްދީފި

މޯލްޑިވްސް ޕޯޓްސް ލިމިޓެޑް (އެމްޕީއެލް) އިން ދުވަހަކުން 934 ކޮންޓެއިނަރަށް ހިދުމަތްދީ، އެ ކުންފުނީގެ ހަޔާތުގައި ތާރީހީ ރެކޯޑެއް ހަދައިފި އެވެ.

Ads by Hajj Corporation

އެމްޕީއެލުން މީގެ ކުރިން އެއްދުވަހާ އެންމެ ގިނަ އަދަދެއްގެ ކޮންޓެއިނަރަށް ހިދުމަތް ދީފައި ވަނީ ވެސް ހިނގަމުން މިދާ ދައުރުގެ ތެރޭގަ އެވެ. އެފަހަރު 650 ކޮންޓެއިނަރަށް ހިދުމަތް ދިނެވެ.

މި ކަމާ ގުޅިގެން އެމްޕީއެލްގެ ސީއީއޯ މުހައްމަދު ވަޖީހް އިބްރާހިމް ރޭ ފޭސްބުކްގައި ކުރެއްވި ޕޯސްޓެއްގައި ވިދާޅުވީ އިއްޔެއަކީ އެ ކުންފުނީގެ ހަޔާތުގައި، އެއްދުވަހާ އެންމެ ގިނަ ކޮންޓެއިނަރަށް ހިދުމަތް ދެވުނު ތާރީހީ ދުވަސް ކަމަށެވެ.

"އެމްޕީއެލްގެ މެނޭޖްމެންޓުން މަސައްކަތް ކުރަމުން ދާނީ، "ލައިޓެނިންގް ސްޕީޑް" ގައި މަސައްކަތްކޮށް ރައްޔިތުން ހިތްހަމަޖެހޭ ފަދަ ހިދުމަތްތަކެއް ފޯރުކޮށްދިނުމަށެވެ،" ވަޖީހް ވިދާޅުވި އެވެ.

ވަޖީހް ވަނީ ކުންފުނިން ކުރި މަސައްކަތް ބަލައިގަނެ، އެމްޕީއެލްގެ ހިތްވަރުގަދަ ޓީމަށާއި އެހެނިހެން ސްޓޭކް ހޯލްޑަރުންނަށް ޝުކުރު އަދާކުރައްވާފަ އެވެ.

މިފަހުން އޭނާ ވަނީ ރާއްޖޭގެ ތާރީހުގައި އެންމެ ގިނަ އަދަދަކަށް މުދާ އެތެރެކޮށްފައި ވަނީ މިދިޔަ ނުވަ މަސް ދުވަހުގެ ތެރޭގައިކަން ފާހަގަކުރައްވާފަ އެވެ. އެގޮތުން ކޮންމެ އަހަރެއްގައި އެވްރެޖްކޮށް މަހެއްގެ މައްޗަަށް ކާގޯ އެތެރެކުރެވިފައިވާ މިންވަރު ފެންނަ ދެ ގްރާފެއް ހިއްސާކުރައްވާފައިވެ އެވެ. ރާއްޖޭގެ އިގުތިސޯދަށް އަންނަމުންދާ ބަދަލުތައް ވަޒަންކުރުމަށް، އެ ދެ ގްރާފުން ދައްކައިދީފައި ވަނީ، 2018 ވަނަ އަހަރުން ފެށިގެން މި އަހަރުގެ އޯގަސްޓް މަހުގެ ނިޔަލަށް ކޮންމެ އަހަރަކު ވެސް އެވްރެޖްކޮށް މަހެއްގެ މައްޗަށް ރާއްޖެއަށް ޖެނެރަލް ކާގޯ އާއި ކޮންޓެނަރައިޒް ކާގޯ އެތެރެ ކުރެވިފައިވާ މިންވަރެވެ.

ރާއްޖޭގެ ތާރީހަށް ބަލާއިރު މީގެކުރިން، ކޮންޓެނަރައިޒް ކާގޯ އެންމެ ގިނައިން އެތެރެކޮށްފައި ވަނީ 2018 ވަނަ އަހަރު އެވެ. އެ އަހަރު 5،250 ޓަނުގެ ކާގޯ އެތެރެކޮށްފައިވެ އެވެ. އެ އަދަދު ފަހަނައަޅައި މި އަހަރުގެ ފުރަތަމަ އަށް މަސް ދުވަހު 5،375 ޓަނުގެ ކޮންޓެނަރައިޒް ކާގޯ ވަނީ އެތެރެކޮށްފަ އެވެ.

މިދިޔަ ހަތް އަހަރު ދުވަހަށް ބަލާއިރު، ޖެނެރަލް ކާގޯ އެންމެ ގިނައިން އެތެރެކޮށްފައި ވަނީ މިދިޔަ އަހަރުގަ އެވެ. 9،750 ޓަނުގެ ކާގޯ އެތެރެކުރިއިރު، މި އަހަރުގެ އަށް މަސް ދުވަހުން 12،625 ޓަނުގެ ޖެނެރަލް ކާގޯ ވަނީ އެތެރެކޮށްފަ އެވެ.

އެކަމުން ދައްކައިދެނީ ރައީސް ޑރ. މުހައްމަދު މުއިއްޒުގެ ވެރިކަން ފެށުމާ އެކު، ރާއްޖޭގެ އިގުތިސޯދަށް ހެޔޮ ބަދަލު އަންނަން ފަށައި، އިގުތިސޯދު ކުރިއަރަން ފަށާފައިވާކަން ކަމުގައި އެމްޕީއެލްގެ ސީއީއޯ ފާހަގަކުރެއްވި އެވެ.