އާ ޕީޖީ އައްޔަންކުރަން ބުދަ ދުވަހުގެ ރޭ ޖަލްސާއެއް ބާއްވަނީ
ޕްރޮސިކިއުޓަ ޖެނެރަލް (ޕީޖީ) ގެ މަގާމަށް ބޭފުޅަކު އައްޔަންކުރަން ބުދަ ދުވަހުގެ ރޭ ދައުރުން ބޭރުގައި ރައްޔިތުންގެ މަޖިލީހުގެ ޖަލްސާއެއް ބާއްވަން ތާވަލުކޮށްފި އެވެ.
ޕީޖީގެ މަގާމު ހުސްވެފައި ވަނީ އެ މަގާމުގައި ހުންނެވި ހުސައިން ޝަމީމް ވަކިކުރަން މަސައްކަތް ކުރުމުން އެ މަގާމުން އިސްތިއުފާ ދެއްވުމާ ގުޅިގެންނެވެ. އިސްތިއުފާ ދެއްވި ނަމަވެސް، އޭނާ މަގާމުން ވަކިކުރަން މިދިޔަ މަހުގެ 22 ވަނަ ދުވަހުގެ ރޭ ޖަލްސާއެއް ބާއްވައި ވޯޓު ނަގައި ވަނީ ފާސްކޮށްފަ އެވެ.
ޝަމީމު ވަކިކޮށްފައި ވަނީ މަޖިލިހުގެ ފުރަތަމަ ދައުރުގެ ފަހު ޖަލްސާގަ އެވެ. އެ ޖަލްސާގައި މަޖިލިހުގެ ނައިބު ރައީސް، އަހުމަދު ނާޒިމް ވިދާޅުވި ގޮތުގައި އާ ޕީޖީއަކު އައްޔަންކުރަން ދައުރުން ބޭރުގައި ދެ ޖަލްސާ ބާއްވަން ޖެހޭނެ ކަމުގަ އެވެ.
މަޖިލިހުގެ ގަވާއިދުގައިވާ ގޮތުން ދައުރުން ބޭރުގައި ޖަލްސާއެއް ބޭއްވޭނީ ތިންބައިކުޅަ އެއްބައި މެންބަރުގެ ސޮއި ހަމަކޮށްގެންނެވެ. ހިނގަމުންދާ 20 ވަނަ މަޖިލިހުގައި އެއީ 31 މެމްބަރުންނެވެ.
ގާނޫނުގައި އޮންނަނީ ޕީޖީގެ މަގާމު ހުސްވެއްޖެ ނަމަ، ލަސްވެގެން 30 ދުވަހުގެ ތެރޭގައި އާ ބޭފުޅަކު މަގާމަށް އައްޔަންކުރަން ޖެހޭނެ ކަމަށެވެ. އެހެންނަމަވެސް ޕީޖީގެ މަގާމަށް ބޭފުޅަކު އައްޔަންކުރަން ބޭފުޅެއްގެ ނަން މިހާތަނަށް ރައީސް ޑރ. މުހައްމަދު މުއިއްޒު ފޮނުއްވާފައެއް ނުވެ އެވެ.
