ޕީޖީކަމަށް ކުރިމަތިލި 6 ބޭފުޅެއްގެ ނަން މަޖިލިހަށް ފޮނުވައިފި

ހުސްވެފައިވާ ޕްރޮސިކިއުޓަ ޖެނެރަލް (ޕީޖީ) ގެ މަގާމަށް ޝައުގުވެރިވެ ކުރިމަތިލެއްވި ހަ ބޭފުޅެއްގެ ނަން ރައްޔިތުންގެ މަޖިލިހަށް މިއަދު ފޮނުވައިފި އެވެ.

Ads by STELCO

ޕީޖީގެ މަގާމަށް ބޭފުޅަކު އައްޔަންކުރަން މިރޭ 9:00 ޖަހާއިރު ދައުރުން ބޭރުގައި މަޖިލިހުގެ ޖަލްސާއެއް ބޭއްވުމަށް ވަނީ ތާވަލުކޮށްފަ އެވެ. ޕީޖީގެ މަގާމު ހުސްވެފައި ވަނީ އެ މަގާމުގައި ހުންނެވި ހުސައިން ޝަމީމް ވަކިކުރަން މަސައްކަތް ކުރުމުން އެ މަގާމުން އިސްތިއުފާ ދެއްވުމާ ގުޅިގެންނެވެ. އިސްތިއުފާ ދެއްވި ނަމަވެސް، އޭނާ މަގާމުން ވަކިކުރަން މިދިޔަ މަހުގެ 22 ވަނަ ދުވަހުގެ ރޭ ޖަލްސާއެއް ބާއްވައި ވޯޓު ނަގައި ވަނީ ފާސްކޮށްފަ އެވެ.

ރައީސް އޮފީހުގެ ތަރުޖަމާނު ހީނާ ވަލީދު ވަނީ "ދެން އޮންލައިން" އަށް އެކަން ޔަގީންކޮށްދެއްވާފަ އެވެ. ކުރިމަތިލި ބޭފުޅުންގެ ނަންތައް ހާމަނުކުރި ނަމަވެސް އެ ނަންތައް މަޖިލިހަށް ފޮނުވާފައިވާ ކަމަށް ހީނާ ވިދާޅުވި އެވެ.

ޕީޖީގެ މަގާމަށް ކުރިމަތިލައްވާފައިވާ ކަމަށް މައުލޫމާތު ލިބިފައިވާ ބޭފުޅުންގެ ތެރޭގައި:

• ރައީސް އޮފީހުގެ ލީގަލް ސެކްރެޓަރީ އަދި ހައި ކޯޓުގެ ކުރީގެ ފަނޑިޔާރު އައްބާސް ޝަރީފް
• ކްރިމިނަލް ކޯޓުގެ ކުރީގެ އިސް ގާޒީ އަހްމަދު ހައިލަމް
• ކުރީގެ ޑެޕިއުޓީ ޕްރޮސެކިއުޓަ ޖެނެރަލް މަރިޔަމް ނިހާޔަތު

އިތުރު ބޭފުޅުންތަކެއް މަގާމަށް ކުރިމަތިލެއްވި ނަމަވެސް، އެ ބޭފުޅުންގެ ނަންތައް ރައީސް އޮފީހުން ހާމަކޮށްފައެއް ނުވެ އެވެ. އަދި މަގާމަށް ކުރިމަތިލެއްވުމަށް ޝައުގުވެރިކަން ފާޅު ކުރެއްވި ބައެއް ބޭފުޅުން ފޯމު ހުށަހެޅުއްވިކަން ކަށަވަރު ކުރެވިފައެއް ނުވެ އެވެ.

ހުސްވެފައިވާ ޕީޖީގެ މަގާމަށް ކުރިމަތިލުމަށް މިދިޔަ މަހުގެ 27 ވަނަ ދުވަހު ހުޅުވާލި އެވެ. އެ މުއްދަތު ހަމަވެފައި ވަނީ މިއަދު މެންދުރު 12:00 އަށެވެ.

ޝަމީމު ވަކިކޮށްފައި ވަނީ މަޖިލިހުގެ ފުރަތަމަ ދައުރުގެ ފަހު ޖަލްސާގަ އެވެ. އެ ޖަލްސާގައި މަޖިލިހުގެ ނައިބު ރައީސް، އަހުމަދު ނާޒިމް ވިދާޅުވި ގޮތުގައި އާ ޕީޖީއަކު އައްޔަންކުރަން ދައުރުން ބޭރުގައި ދެ ޖަލްސާ ބާއްވަން ޖެހޭނެ ކަމުގަ އެވެ.

މަޖިލިހުގެ ގަވާއިދުގައިވާ ގޮތުން ދައުރުން ބޭރުގައި ޖަލްސާއެއް ބޭއްވޭނީ ތިންބައިކުޅަ އެއްބައި މެންބަރުގެ ސޮއި ހަމަކޮށްގެންނެވެ. ހިނގަމުންދާ 20 ވަނަ މަޖިލިހުގައި އެއީ 31 މެމްބަރުންނެވެ.

ގާނޫނުގައި އޮންނަނީ ޕީޖީގެ މަގާމު ހުސްވެއްޖެ ނަމަ، ލަސްވެގެން 30 ދުވަހުގެ ތެރޭގައި އާ ބޭފުޅަކު މަގާމަށް އައްޔަންކުރަން ޖެހޭނެ ކަމަށެވެ.