މުދަލު ޒަކާތުގެ ގޮތުގައި 73.8 މިލިއަން ރުފިޔާ ދައުލަތަށް
މިއަހަރުގެ މިހާތަނަށް ޒަކާތުގެ ގޮތުގައި ދައުލަތައް 73.8 މިލިއަން ރުފިޔާ ލިބިފައިވާ ކަމަށް މޯލްޑިވްސް އިންލޭންޑް ރެވެނިއު އޮތޯރިޓީ (މީރާ)ގެ ތަފާސް ހިސާބުތަކުން ދައްކައިފި އެވެ.
ތަފާސް ހިސާބުތައް ދައްކާގޮތުން، މިއަހަރުގެ އޮގަސްޓު މަހާ ހަަމައަށް ލިބިފައިވާ ވަރު މިދިޔަ އަހަރުގެ އޮގަސްޓް މަހާ ހަމައަށް ލިބުނު ވަރަށް ވުރެ 6.7 މިލިއަން ރުފިޔާ އިތުރެވެ. މިއަހަރުގެ މިހާތަނަށް ލިބިފައިވާ އަދަދު ވަނީ %9.8 އިތުރުވެފަ އެވެ.
ތަފާސް ހިސާބުތަކުން ދައްކާ ގޮތުގައި މިހާތަނަށް އެންމެ ބޮޑު އަދަދެއްގެ މުދަލު ޒަކާތް ލިބިފައި ވަނީ ޖުލައި މަހުގަ އެވެ. އެއީ 5 މިލިޔަން ރުފިޔާ އެވެ.
ރާއްޖޭގައި މުދަލު ޒަކާތް ނެރުން ވާޖިބުވާ ނިސޯބު ކަނޑައަޅަނީ އިސްލާމިކް މިނިސްޓްރީންނެވެ. އެ މިނިސްޓްރީން އެންމެފަހުން މުދަލު ޒަކާތުގެ ނިސޯބަށް މިދިޔަ މެއިމަހުގައި ބަދަލު ގެނެސްފައިވާއިރު، މިވަގުތު މުދަލު ޒަކާތް ވާޖިބުވާ ނިސޯބުގެ އަދަދަކީ 9353.40 ރުފިޔާ އެވެ.
އިސްލާމިކް މިނިސްޓްރީން ކުރިން ބަލައިގަންނަމުން އައި މުދަލު ޒަކާތް މީރާއިން ބަލައިގަންނަ ގޮތަށް ހަމަޖެއްސީ 2016 ވަނަ އަހަރެވެ.
