ކުންފުނީގެ ބިލު 10 މިނިޓް ތެރޭ ކޮމިޓީން ފާސްކޮށްފި
ކުންފުނީގެ ގާނޫނަށް ސަރުކާރުގެ ފަރާތުން ހުށަހެޅި އިސްލާހު ގެނައުމުގެ ބިލު ރައްޔިތުންގެ މަޖިލީހުގެ އިގުތިސޯދީ ކޮމިޓީން 10 މިނިޓް ތެރޭގައި ފާސްކޮށް މަޖިލިހުގެ ތަޅުމަށް މިއަދު ފޮނުވައިފި އެވެ.
ކުންފުނީގެ ގާނޫނަށް ފޭދޫ އުތުރު ދާއިރާގެ ކޮންގްރެސް ޕާޓީގެ މެމްބަރު އިސްމާއިލް ނިޒާރު ހުށަހަޅުއްވާފައި ވަނީ މިދިޔަ ބުދަ ދުވަހުގެ ރޭ ބޭއްވި މަޖިލިހުގެ ދައުރުން ބޭރުގައި ބާއްވާ ފުރަތަމަ ހާއްސަ ޖަލްސާގަ އެވެ. އެ ޖަލްސާގައި ވަނީ ބިލުގެ ފުރަތަމަ ކިޔުން އިއްވާފަ އެވެ.
ކުންފުނީގެ ގާނޫނަށް ހުށަހެޅި ހަތަރު އިސްލާހަކީ:
- ހާއްސަ އާންމު ޖަލްސާ ބާއްވަން ލިޔުން ލިބޭތާ ތިން ދުވަހުގެ ތެރޭގައި ޖަލްސާއަށް ދައުވަތު ދިނުން. އަދި 10 ދުވަހުގެ ތެރޭގައި ޖަލްސާ ބޭއްވުން.
- ހާއްސަ އާންމު ޖަލްސާއެއް ބޭއްވުމަށް ހަމަޖެހިފައިވާ ދުވަހުގެ މަދުވެގެން ހަތް ދުވަސް ދުވަސް ކުރިން ކުންފުނީގެ މެމްބަރުންނަށް ނޯޓިސް ފޮނުވުން.
- ގާނޫނުގައި ބަޔާންކޮށްފައި ވީނަމަވެސް އަދި އެހެން ގާނޫނެއްގައި ނުވަތަ ސަރުކާރުގެ ކުންފުންޏެއް އުފައްދާ ގާނޫނެއްގައި ނުވަތަ ކުންފުނީގެ ހިންގާ ގަވާއިދުގައި އެ ކުންފުންޏެއްގައި މަދުވެގެން ތިބެން ޖެހޭ ޑިރެކްޓަރުންގެ އަދަދު އިތުރުކުރެވުން.
- ބަޔާންކުރާ އަދަދަށް ޑިރެކްޓަރުން ނެތް ނަމަ އަދި މެނޭޖިން ޑިރެކްޓަރަކު ނެތް ނަމަ ޑިރެކްޓަރުން ނުވަތަ މެނޭޖިން ޑިރެކްޓަރު އައްޔަންކުރަން އެންގުމުގެ ބާރު ރަޖިސްޓްރާއަށް ދިނުން. އެގޮތުން އަންގާތާ 10 ދުވަހުގެ ތެރޭގައި އެ އަދަދަށް ޑިރެކްޓަރުން އައްޔަންކޮށް، ނުވަތަ މެނޭޖިން ޑިރެކްޓަރަކު އައްޔަން ކުރުމާ އެކު އެ މައުލޫމާތު ރަޖިސްޓްރާއަށް ހުށަހެޅުން.
ކޮމެންޓް