ޓްރާންސްޕޯޓް އޮތޯރިޓީގެ ކޮރަޕްޝަންގެ މައްސަލައެއް އޭސީސީ އަދި ސިވިލް ސަރވިސް ކޮމިޝަނަށް ހުށަހަޅައިފި
މޯލްޑިވްސް ޓްރާންސްޕޯޓް އޮތޯރިޓީގެ މެރިޓައިމް ރެޖިސްޓްރޭޝަން ޔުނިޓްގެ އެސިސްޓެންޓް ޑިރެކްޓަރުގެ މަގާމަށް ޝަރުތު ހަމަނުވާ މީހަކު ވަޒީފާ އަށް އައްޔަނު ކޮށްފައިވާ މައްސަލައެއް އެންޓި ކޮރަޕްޝަން ކޮމިޝަން އަދި ސިވިލް ސަރވިސް ކޮމިޝަން އަށް ހުށަހަޅައިފިއެވެ.
ޓްރާންސްޕޯޓު އޮތޯރިޓީގެ މެނޭޖިންގ ޑިރެކްޓަރު ހުސެއިން ނަޒީރުގެ މި މައްސަލަ އަމިއްލަ ފަރާތަކުން އޭސީސީއަށް ހުށަހަޅާފައިވާއިރު، އިތުބާރު ހުރި މަސްދަރަކުން “ދިޔަރެސް” އަށް މައުލޫމާތު ދީފައިވާ ގޮތުގައި، ހުސައިން ނަޒީރު މަގާމަށް އައްޔަނު ކުރެވުނު އިރު އޭނާއަކީ މެރިޓައިމްގެ ދާއިރާއިން އެއްވެސް ވަރަކަށް ތައުލީމެއް ނުވަތަ ތަޖުރިބާއެއް ހުރި ފަރާތެއްވެސް ނޫނެވެ. އަދި އިންޓަރވިއު ޕެނަލް އިންވެސް ވަނީ އޭނާ މަޤާމުގެ ޝަރުތުތަކާއި މިންގަނޑަށް ނުފެތޭ ކަމަށް ނިންމާފައެވެ.
މިމައްސަލަ އޮއްބާލުމަށް ސިވިލް ސަރވިސް ކޮމިޝަނަށް ނުފޫޒު ގަދަ ބަޔަކު އިނާމުތަކެއް ހުށައަޅުމުން ދާކަން މައްސަލަ ހުށައެޅި ފަރާތުން ތުހުމަތު ކުރެއެވެ. ޓްރާންސްޕޯޓު މިނިސްޓަރު ނަހުލާ ވެސް މިމައްސަލާގައި ފިޔަވަޅު އެޅުމަށް އުޒުރުވެރިވާ ކަމަށްވެސް މައުލޫމާތު ވަނީ ލިބިފައެވެ.
ދިވެހިރާއްޖޭގެ ކޮރަޕްޝަން މަނާކުރާ ޤާނޫނުގެ 8 ވަނަ މާއްދާގައި ބުނާގޮތުން ނުފޫޒު ހިންގަން ރިޝްވަތު ދިނުމަކީ ކުށެކެވެ. އެގޮތުން ވަކި ފަރާތަކަށް އެއްވެސް ކަހަލަ މަންފާއެއް ހޯދުމަށްޓަކައި ރިޝްވަތު ދިނުމާއި ހިފުމަކީ ވެސް ކުށެކެވެ.
