ރޭގަނޑު އަވަހަށް ނުނިދަނީއެއް ނޫނެވެ. ނުނިދެނީ އެވެ.
ރޭގަނޑު ނުނިދާ ހޭލާ އުޅޭ މީހުން މިހާރަކަށް އައިސް އިންތިހާއަށް ގިނަވެއްޖެއެވެ. އަދި އެކަމަކީ ސިއްހަތަށް ވަރަށް ގެއްލުން ހުރި ކަމެއްކަމުގައި ބުނެ އެމީހުންނަށް ނަސޭހަތް ދޭ މީހުންވެސް ވަރަށް ގިނަ ވެއްޖެއެވެ. އެހެންނަމަވެސް އެމީހުން ނުނިދާ ތިބެނީ ކޮން ސަބަބަކާއި ހުރެ ކަމެއް އެއްވެސް މީހަކު ބަލާލަން މަސައްކަތް ކުރި ހެއްޔެވެ؟
ގަބޫލު ކުރަމެވެ. ބައެއް މީހުން ގޭމު ކުޅުމުގެ ތެރޭގައިވެސް ރޭގަނޑުގެ ނިދި ނަގާލައެެެވެ. އެކި ކަހަލަ ފިލުމުތައް ބެލުމުގައި ނުނިދާ ހޭލާ އޮވެއެވެ. އެހެންނަމަވެސް އެންމެން ނުނިދަނީ މި ސަބަބާއި ހުރެ ބާވައެވެ؟
ނިދަން އަރާ ވަގުތަކީ ހަޔާތުގެ ކަންކަމާއި އެންމެ ބޮޑަށް ވިސްނާ ފިކުރުކުރެވޭ ވަގުތު ކަމުގައި ބުނާ އަޑު އަހަމެވެ. އާނއެކެވެ. އެއީ ހަގީގަތެެވެ. އެ ވަގުތަކީ ކަންކަމާ ގިނައިން ވިސްނޭ ވަގުތެކެވެ. ދިރިއުޅުމުގައި ދިމާވެފައިވާ ކަންތައްތައް ހަނދާންވާ ވަގުތެކެވެ. އަދި އާންމުކޮށް މިފަދަ ކަންތައްތަކާއި ވިސްނެނީ ޙަޔާތުގެ ކޮންމެވެސް ހިސާބެއްގައި އަޑިގަނޑެއް އައިސްފައިވާ މީހުނަށެވެ. އެކަމުގެ ސަބަބުން ނޭދެވޭ އަސަރު ވަރަށް ބޮޑަށް ކޮށްފައިވާ މީހުނަށެވެ. އެކަމާއި މެދު ވިސްނުމުގެ ސަބަބުން ނިދި އެއްކޮށް ފިލައިގެން ދަނީއެވެ. ނިދަން ބޭނުން ވިޔަސް ނިދި ނާންނަނީ އެވެ.
މިހެން ކަންތައްތަކާއި ވިސްނަން އިނދެ ، މުޅި ރޭ އެއްކޮށް ނިމިގެން ދާއިރުވެސް ގިނަފަހަރަށް ނުވެސް އެނގެއެވެ. އަނެއް ކޮޅުން ދުވާލު ވުމުން ވެސް ނިންޖެއް ނާދެއެވެ. އެފަދަ މީހުންނަކީ ވަރަށް މަޑުމައިތިރި މީހުންނެވެ. އެކި އެކި ކަންކަމާއި މެދު ބަސްހުއްޓި ގެއްލިފައި އިނދެވޭ މީހުނެވެ. މިއަށް “ޑިޕްރެޝަން” އޭވެސް ކިޔާ އުޅެއެވެ.
ރޭގަނޑު ނިދަން ބޭނުންވިޔަސް ނިދި ނައުމުގެ ސަބަބުން ނުނިދާ އުޅުމަކީ ރަނގަޅު ކަމެއް ނޫނެވެ. ބައެއް މީހުން ނިދުމަށްޓަކައި ނިދާ ބޭސް ވެސް ކައެވެ. އެހެންނަމަވެސް މުޖުތަމައުގައި މިފަދަ މީހުންނާއި ދިމާލަށް “ބުޅަލެއްގެ ދިރިއުން” އުޅެމުން އަންނަ މީހެކޭ ބުނާ އަޑު މަދުން ނަމަވެސް އަޑު އަހަމެވެ. ހަގީގަތުގައި އެފަދަ މީހުންނާއި ދިމާލަށް އެފަދަ ބަހެއް ބުނުމުގެ ކުރިން އެމީހުން ނިންޖަށް ޓަކައި ތަހައްމަލު ކުރަމުންދާ ވޭނާއި ކެކުޅުން ދެނެގަތުން ވަރަށް މުހިންމެވެ.
ރޭގަނޑު އެއްކޮށް ނުނިދާ ހޭލާ އުޅުނަސް އޮންލައިން ގައި އިންނަ ތަން ފެނިދާނެއެވެ. އާދޭހެވެ. ގިނަފަހަރަށް ނުނިދި ހަޔާތުގެ ކަންކަމާއި ދޭތެރޭ ވިސްނޭތީ އެފަދަ ކަންކަމާއި މެދުނުވިސްނުމަށްޓަކައި ފޯނުގެ އެހީތެރިކަން އެމީހުން ބޭނުން ކުރެއެވެ. ދަންވަރު އޮންލައިން ގައި އިންނަ ތަން ފެނުމުން ބައެއް ފަހަރު ސުވާލު ވެސް ކޮށްލެވެއެވެ. ޖަވާބުގައި ގިނަ ފަހަރަށް ބުނަނީ ނުނިދިފައޭ ނުވަތަ ނިދި ނައިސްގެން އުޅޭ ވާހަކަ އެވެ.
އާދޭހެވެ. ނިންޖަކީ ރަނގަޅު ސިއްހަތެއްގައި ހުރުމަށް ޓަކައި ވަރަށް މުހިންމު އެއްޗެކެވެ. ރޭގަނޑު ނުނިދޭނަމަ އެކަމަށް ފަރުވާ ކުރާށެވެ. އެކަމަށް ޓަކައި ސިއްހީ މާހިރުން އެތިބެނީ އަބަދުވެސް އެހީ ވެދިނުމަށް ތައްޔާރަށެވެ. ދީނުގައި މިކަމަށް އޮންނަ އުސޫލުތައް ދެނެގަންނާށެވެ. ވުޟޫ ކޮށްލުމަށްފަހު ނިދުމަށް ތައްޔާރު ވާށެވެ. މާތް الله ގެ އިރާދަފުޅުން ނިދަން އެހާ އުނދަގުލެއް ނުވާނެއެވެ.
ވަރަށް ބޮޑު ހަގީގަތެއް