ކުޅުދުއްފުއްޓާއި ތިނަދޫގައި ޓާޝަރީ ހޮސްޕިޓަލެއް އިމާރާތްކޮށް ދޭނެ ބަޔަކު ހޯދަން ސަރުކާރުން ބީލަމަށް ހުށަހަޅައިފި
ހދ. ކުޅުދުއްފުއްޓާއި، ގދ. ތިނަދޫގައި ޓާޝަރީ ހޮސްޕިޓަލެއް އިމާރާތް ކޮށްދޭނެ ބަޔަކު ހޯދަން ސަރުކާރުން ބީލަމަށް ހުށަހަޅައިފިއެވެ.
ފިނޭންސް މިނިސްޓްރީން ކުރި އިއުލާނެއްގައި ވަނީ ކޮންޓްރެކްޓާ ފައިނޭންސްގެ އުސޫލުން ތިނަދު އާއި ކުޅުދުއްފުށީގައި ޓާޝިއަރީ ހޮސްޕިޓަލެއް އެޅުމަށް ބީލަން ހުޅުވާލާފައިވާއިރު، މިދެ މަޝްރޫއުގެ ބިޑް ސެކިއުރިޓީގެ ގޮތުގައި 2.3 މިލިއަން ރުފިޔާ ދައްކަން ޖެހޭ ކަމަށެވެ.
މަސައްކަތަށް ޝަރުތުހަމަވާ މީހުން ނެގުމުގެ މަސައްކަތް ކުރިއަށް ދާނީ، ފިނޭންސް މިނިސްޓްރީން ކުރި އިއުލާނުގައި ވާގޮތަށް އިންޓަނޭޝަނަލް ކޮމްޕެޓިޓިވް ބިޑިން (އައިސީބީ) އުސޫލުގެ މަތިންނެވެ.
ތިނަދޫއާއި، ކުޅުދުއްފުށީގައި ޓާޝަރީ ހޮސްޕިޓަލެއް އިމާރާތްކޮށްދޭނެ ފަރާތެއް ހޯދުމަށް ސަރުކާރުން ހުށަހަޅާފައިވާ މި ބީލަން ހުޅުވަން ހަމަޖެހިފައިވަނީ އަންނަ މަހުގެ 22 ވަނަދުވަހުގެ ހެނދުނު 10 ޖަހާއިރު ކަމަށް ވެސް އިއުލާންގައިވެއެވެ.
ކުޅުދުއްފުއްޓާއި ތިނަދޫގައި މިހާރު ވެސް ހޮސްޕިޓަލެއް ހުންނައިރުގައި، މި ސަރުކާރުން ރާއްޖޭގެ އެކި ކަންކޮޅުތަކުގައި ވަނީ ޒަމާނީ ފެންވަރުގެ ޚިދުމަތްތަކާއެކު ހޮސްޕިޓަލް އިމާރާތްކުރަން ނިންމާފައެވެ. އަދި ބައެއް ހެލްތު ސެންޓަރު ތަކުގެ ފެންވަރު ރަނގަޅު ކުރުމުގެ މަސައްކަތް ސަރުކާރުން އަންނަނީ މިހާރު ވެސް ކުރަމުންނެވެ.
