އިޒްރޭލް ޕާސްޕޯޓު މަނާކުރާ ބިލުގެ މަސައްކަތް އަވަސްކުރަން ކުރެވެން ހުރި ކަމެއް ކުރާނަން: ނާޒިލް
އިޒްރޭލް ޕާސްޕޯޓުގައި ރާއްޖެއަށް އެތެރެވުން މަނާކުރަން ހުށަހަޅާފައިވާ ބިލުގެ މަސައްކަތް އަވަހަށް ނިންމުމަށް ކުރެވެން ހުރި މަސައްކަތްތައް އެ ޕާޓީން ކުރާނެ ކަމަށް އިދިކޮޅު މައި ޕާޓީ، މޯލްޑިވިއަން ޑިމޮކްރެޓިކް ޕާޓީ (އެމްޑީޕީ) އިން ބުނެފި އެވެ.
މަޖިލީހުގެ މިއަދުގެ ޖަލްސާއަށް އިޒްރޭލް ޕާސްޕޯޓުގައި ރާއްޖެއަށް އެތެރެވުން މަނާކުރަން ހުށަހަޅާފައިވާ ބިލުގެ މަސައްކަތް އަވަހަށް ނިންމުމަށް ގޮވާލައި އެމްޑީޕީގެ ފަރާތުން ކުއްލި މައްސަލައެއް ހުށަހެޅި އެވެ. އެ މައްސަލަ ހުށަހެޅުއްވީ ގަލޮޅު އުތުރު ދާއިރާގެ އެ ޕާޓީގެ މެމްބަރު މުހައްމަދު އިބްރާހިމް (ކުޑޫ) އެވެ. އެހެންނަމަވެސް ރިޔާސަތުން ވަނީ ކުއްލި މައްސަލައެއްގައި ފުރިހަމަވާން ޖެހޭ ޝަރުތުތައް ހަމަނުވާ ކަމަށް ބުނެ މައްސަލަ ބަލައިގަނެވެން ނެތްކަން ހާމަކުރައްވާފަ އެވެ.
އެމްޑީޕީގެ ޕީޖީ ގްރޫޕުން މަޖިލިހުގެ އިދާރާގެ ބޭރުގައި މިއަދު ނޫސްވެރިންނާ ބައްދަލުކޮށްދެއްކި ވާހަކައިގައި އެ ގްރޫޕުގެ ލީޑަރު ހިތަދޫ ދެކުނު ދާއިރާގެ މެމްބަރު އިބްރާހީމް ނާޒިލް ވިދާޅުވީ މިއަދުގެ ބޭއްވި ޖަލްސާއަށް ކުއްލި މައްސަލަ ހުށަހަޅަން ޖެހުނު ސަބަބަކީ އިޒްރޭލް ޕާސްޕޯޓް މަނާކުރުމާ މެދު ގޮތެއް ނުނިމި ލަސްވާ މައްސަލަ މަޖިލިހުގެ ހުރިހާ މެމްބަރުންގެ ބޮލުގައި އެކަން އެޅޭ ގޮތަށް އެޓާނީ ޖެނެރަލް ސިފަކުރައްވާފައިވުން ކަމަށެވެ. ކުއްލި މައްސަލައެއްގެ ގޮތުގައި މައްސަލަ ހުށަހެޅީ އެކަމާ ގުޅިގެން ކަމަށް އަވަސް ހައްލެއް ހޯދުމަށް ކުރެވުނު މަޝްވަރާތަކަށް ފަހު ކަމަށެވެ.
"މިއަދުގެ މައްސަލަ ކުއްލި މައްސަލައެއްގެ ގޮތުގައި ބަލައިނުގަނެ ނިންމި ނިންމުމަށް އަޅުގަނޑުމެންގެ ކަންބޮޑުވުންތަކެއް އެބަހުރި. އެހެންނަމަވެސް މަޖިލީހުން ކުއްލި މައްސަލަ ބަލައިނުގަތް ކަމުގައި ވިޔަސް އަޅުގަނޑުމެން ދެން ވެސް މަޖިލިސް ތެރެއިން ކުރެވެން އޮތް މަސައްކަތް ކުރާނެ،" ނާޒިލް ވިދާޅުވި އެވެ.
އިޒްރޭލުން ފަލަސްތީނުގެ ރައްޔިތުންނާ މެދު އަމަލުކުރަމުންދާ ލާއިންސާނީ ގޮތްތައް ކުށްވެރިކޮށް ސަރުކާރުން ކުރީ ކޮންކަމެއްކަން ސާފުކުރަން ޖެހޭ ކަމަށެވެ. ކަމާ ގުޅިގެން ކުރެވުނު ކަމެއް އަދި ނެތްކަން ފާހަގަކުރެއްވި އެވެ.
"ތަންތަނުގައި އެބަ ވިދާޅުވޭ ސަރުކާރުން މިކަމާ ހިތްހަމަނުޖެހޭ ވާހަކަ. ހިތްހަމަނުޖެހިގެން ކުރެވުނު ކަމެއް ނެތީމާ މިއީ އަޅުގަނޑުމެންގެ ކަންބޮޑުވުމަކީ،" ނާޒިލް ވިދާޅުވި އެވެ.
ނޫސްވެރިންނާ ބައްދަލުކުރުމަށް ފަހު އެމްޑީޕީގެ ޕީޖީ މެމްބަރުން ވަނީ ގޯއްޗާއި ފްލެޓް މައްސަލާގައި ކުރިއަށްދިޔަ އެއްވުމުގައި ބައިވެރިވެފަ އެވެ.
