ކައުންސިލްތަކަށް ފަޅުރަށްރަށް ދިނުމަށް ޕްރޮޕޯސަލްތައް އިވެލުއޭޓްކުރަން ފަށައިފި
ރަށްރަށުގެ ކައުންސިލްތަކަށް ފަޅުރަށްރަށް ދިނުމަށް ޕްރޮޕޯސަލްތައް އިވެލުއޭޓްކުރަން ފަށައިފި އެވެ.
ކައުންސިލްތައް މާލީގޮތުން ބާރިވެރިކުރުވައި ރައްޔިތުންނަށް ނަފާ ލިބޭނެ ގޮތަކަށް ރަށްރަށަށް ފަޅުރަށެއް ލިބޭނެ ނިޒާމެއް ގާއިމުކުރުމަކީ ރައީސް ޑރ. މުހައްމަދު މުއިއްޒުގެ ވައުދެކެވެ.
އެކަމާ ގުޅޭ ގޮތުން ލޯކަލް ގަވާމަންޓް މިނިސްޓަރު އާދަމް ޝަރީފް މިއަދު އެކްސްގައި ވިދާޅުވީ ރައީސްގެ ވައުދާ އެއްގޮތަށް ފަޅުރަށް ހޯދުމަށް ޕްރޮޕޯސަލްސް އިވެލުއޭޓް ކުރުމުގެ މަސައްކަތް ފަށާފައިވާ ކަމަށެވެ.
އަދި އިވެލުއޭޝަން ކުރިއަށް ގެންދާނީ ސަރުކާރުން އައްޔަނުކޮށްފައިވާ ހާއްސަ ކޮމިޓީއަކުން ކަމަށެވެ.
"މި ހަފްތާގައި އިވެލުއޭޓް ނިމޭނެ ކަމަށް އުއްމީދު ކުރެވޭ" މިނިސްޓަރު ވިދާޅުވި އެވެ.
ސަރުކާރުން ކައުންސިލްތަކަށް ރަށްރަށް ދޫކުރުމަށް ހަމަޖެހިފައި ވަނީ އެކަމަށް އެދި ޕްރޮޕޯސަލް ހުށަހަޅާފައިވާ ކައުންސިލްތަކަށް އެ ރަށްތައް 25 އަހަރަށް ދަނޑުވެރިކަމާއި، މަސްވެރިކަން ނޫން އެހެނިހެން އިގްތިސާދީ މަސައްކަތް ކުރުމަށެވެ.
އާދަމް ޝަރީފް މިދިޔަ އޮގަސްޓް މަހު ވިދާޅުވީ 25 އަހަރަށް ފަޅުރަށް ހޯދަން ހަތަރު ކައުންސިލަކުން ޝައުގުވެރިކަން ފާޅުކޮށްފައިވާ ކަމަށެވެ.
މިނިސްޓަރު ވިދާޅުވީ 25 އަހަރުގެ މުއްދަތަށް ފަޅުރަށެއް ލިބުމަކީ ކައުންސިލްތައް ބާރުވެރިކުރުމުގެ އިތުރުން ރަށްރަށަށް ދިމާވެފައިވާ އިޖްތިމާއި މައްސަލަތަކަށް ވެސް ހައްލު ލިބުމަށް މަގުފަހިވެގެން ދާނެ ކަމެއް ކަމަށާއި، އެގޮތުން ސިނާއީ މަސައްކަތްތައް ކުރުމަށް އިތުރަށް މަގުފަހިވެގެން ދާނެ ކަމަށް ދެކިވަޑައިގެންނަވައި ކަމަށް ވެސް ވިދާޅުވި އެވެ.
Ads by STO
