ވޭޕްއަށް ދެވިހިފާފައިވާ 9 އަހަރުގެ ކުދިން އެބަތިބި، މަނާކުރީ އޮޅުވާލައިގެން މަސްތުވާތަކެތި ދޭތީ: އިހުސާން
ވޭޕްއަށް ދެވި ހިފާފައިވާ ކުޑަކުދިންގެ ތެރޭގައި އުމުރުން އެންމެ 9 އަހަރުގެ ކުދިން އެބަތިބި ކަމަށާއި ސަރުކާރުގެ އޮތް ކަންބޮޑުވުމަކީ އެފަދަ ތަކެތީގެ ތެރެއަށް ލާފައި އޮޅުވާލައިގެން އެ ކުދިންނަށް މަސްތުވާތަކެތި ދެމުން އައުން ކަމުގައި ހޯމްލޭންޑް ސެކިއުރިޓީ އެންޑް ޓެކްނޯލޮޖީ މިނިސްޓަރު އަލީ އިހުސާން ވިދާޅުވެއްޖެ އެވެ.
ރައީސް އޮފީހުގައި މިއަދު ބޭއްވި ނޫސްވެރިންގެ ބައްދަލުވުމުގައި ވާހަކަ ދައްކަވަމުން އިހުސާން ވިދާޅުވީ ސްކޫލުތަކުގައި ކިޔަވަމުން އަންނަ ދަރިވަރުންގެ ތެރެއިން ގްރޭޑް ތިނެއްގައި އުޅޭ ކުދިންގެ ތެރޭގައި ވޭޕްއަށް ދެވި ހިފާފައިވާ ކުދިން އުޅޭ ކަމަށެވެ.
"މަސްތުވާތަކެތި އޭގެ ތެރެއަށް ލާފައި ކުދިންނަށް އޮޅުވާލައިގެންނާ އެއްޗެހި މަސްތުވާތަކެތި މި ދެނީ. އެހެންވީމާ މިއީ އާދަޔާ ހިލާފު ތަފާތު ޓްރެންޑެއް،" އިހުސާން ވިދާޅުވި އެވެ.
މިއީ މަސްތުވާތަކެތި ބޭނުންކުރާ އާންމު އުސޫލުގެ ތެރެއިން ނުފެންނަ ޓްރެންޑެއް ކަމަށެވެ. އުމުރުން ނުވަ އަހަރުން ފެށިގެން އެގާރަ އަހަރާ ދެމެދުގެ ކުދިން އެފަދަ ތަކެތި ބޭނުންކުރާތަން މިހާތަނަށް ފެނިފައިނުވާ ކަމަށެވެ. ކަމުގައި އޮތް ބިރަކީ މި ނިޒާމުގެ ތެރެއިން މަސްތުވާތަކެތި ބޭނުންކުރަމުން އަންނަ ޖީލެއް ރާއްޖެ އުފެދިދާނެ ކަމުގެ ބިރު ކަމަށެވެ.
ހޯމްލޭންޑް މިނިސްޓަރު ވިދާޅުވި ގޮތުގައި ރާއްޖެ ހިމެނޭ ސަރަހައްދުގައި 11 ގައުމެއް އޮންނައިރުގައި، އޭގެ ތެރެއިން 8 ގައުމަކުން ވޭޕް ބޭނުންކުރުން މަނާކޮށްފައިވާ ކަމުގަ އެވެ. އެ ގައުމުތަކުން މަސްތުވާތަކެތީގެ މައްސަލައަށް ގޮތް ނިންމުމުގައި ވެސް "އެޓޭކް" ކުރީ ވޭޕަށް ކަމުގަ އެވެ.
ސަރުކާރުން ވޭޕް މަނާކުރަން ނިންމި ނިންމުން ދިފާއު ކުރައްވާ ވިދާޅުވީ ކޮންމެ މީހަކު ކުރި ނަމަވެސް ރަނގަޅު ކަމެއް ކޮށްފި ނަމަ އެކަމަކީ ރަނގަޅު ކަމެއްގެ ގޮތުގައި ބަލައިގަންނަން ޖެހޭނެ ކަމަށެވެ. ވުމާ އެކު އެކަން އެގޮތަށް ބަލައިގަތުމަށް އެދިވަޑައިގެންނެވި އެވެ.
"ދިވެހިރާއްޖޭގައި ވޭޕް، އަޅުގަނޑު ގަބޫލެއް ނުކުރަން 18 އަހަރުން މަތީގެ ބޭފުޅުން ހަމައެކަނި ބޭނުންކުރާ ނަމަ މި ޑިސިޝަން ރައީސް ނަންގަވާނެ ކަމަކަށް. އަދި ހަމަ އެއާއެކު ވޭޕް ތްރޫކޮށް މަސްތުވާތަކެތި ސްޕްރެޑް ނުކުރާ ނަމަވެސް މި ޑިސިޝަން މިގޮތަށް ނަންގަވާނެ ކަމަކަށް،" އިހުސާން ވިދާޅުވި އެވެ.
އިހުސާން ވިދާޅުވި ގޮތުގައި ތަފާސް ހިސާބުތަކުން ފެންނަނީ އާދަޔާހިލާފު މިންވަރަކަށް ސްކޫލުތަކުގެ ތެރޭގައި ފަސޭހަކަމާ އެކު، އަގުހެޔޮކޮށް "ޑިސްޓްރިބިއުޝަން ނެޓްވޯކްތައް" ހެދިގެން އެކަން ކުރަމުން އަންނަ މަންޒަރު ކަމުގަ އެވެ.
މަސްތުވާތަކެއްޗަކީ އޭގެ ޒާތުގައި ހެޔޮއަގެއްގައި ލިބޭ އެއްޗަކަށް ނުވާއިރު، ވޭޕް "އިންފިއުސްޑް" މަސްތުވާތަކެތި ތަންކޮޅެއް ހެޔޮ އަގުގައި ބަހަމުން އަންނަ ކަމުގަ އެވެ. ކަމުގެ މައުލޫމާތު ފުލުހުންނަށް ލިބި، ކުރެވޭ ތަހުގީގުތަކަށް އެކަން ފާހަގަކުރެވިފައިވާ ކަމުގަ އެވެ.
އޭގެ އިތުރުން ޓެލެގްރާމް ޗެނަލްތައް ހަދައިގެން ވޭޕް ވިއްކުމުގެ ކަންކަން ކުރަމުން އަންނަ ކަމަށް ވެސް މިނިސްޓަރު ވިދާޅުވި އެވެ. މީގެކުރިން އެހެން ކަންކަމުގައި ޗެނަލްތައް ހަދައިގެން ހިންގަނިކޮށް "އިންޓަސެޕްޓް" ކުރި ގޮތަށް މި މައްސަލަ އާ ގުޅިގެން ވެސް ކަންކަން ބަލަމުންދާ ކަމުގައި ފާހަގަކުރެއްވި އެވެ.
