ހެވީ މެޓަލް ޓެސްޓު ކުރާ މެޝިނެއް ނޭޝަނަލް ހެލްތު ލެބޯރެޓަރީއަށް ފޯރުކޮށްދޭން ފަހުމުނާމާއެއް
އެންވަޔަރަންމަންޓް މިނިސްޓްރީން ހއ. ބާރަށު ސިއްހީ މަރުކަޒުގައި މެޑިކަލް ކުނި މެނޭޖްކުރުމަށް ހާއްސަ ތަނެއް ގާއިމުކޮށް ހެލްތު މިނިސްޓްރީ އެތަން ހަވާލުކުރުމަށާއި ހެވީ މެޓަލްސް ޓެސްޓް ކުރުމަށް އިންޑަކްޓިވްލީ ކަޕްލްޑް ޕްލާސްމާ (އައިސީޕީ އެމްއެސް) މެޝިނެއް ނެޝަނަލް ހެލްތު ލެބޯރެޓަރީއަށް ފޯރުކޮށްދިނުމަށް ފަހުމުނާމާއެއްގައި ސޮއިކޮށްފި އެވެ.
"އެލިމިނޭޓިން ޕާސިސްޓަންޓް އޯގަނިކް ޕޮލިއުޓަންޓްސް ތްރޫ ސައުންޑް މެނޭޖްމަންޓް އޮފް ކެމިކަލްސް" (ޕޮޕްސް) މަޝްރޫއަކީ ގްލޯބަލް އެންވަޔަރަންމަންޓް ފެސިލިޓީ (ޖީއީއެފް) ގެ މާލީ އެހީ އާއި ޔުނައިޓަޑް ނޭޝަންސް ޑިވެލޮޕްމަންޓް ޕްރޮގްރާމް (ޔޫއެންޑީޕީ) ގެ އެހީތެރިކަމާ އެކު، އެންވަޔަރަންމަންޓް މިނިސްޓްރީން ކުރިއަށްގެންދާ މަޝްރޫއެކެވެ.
މި މަޝްރޫއުގެ ދަށުން ބާރަށު ސިއްހީ މަރުކަޒުގައި މެޑިކަލް ކުނި މެނޭޖްކުރުމަށް ހާއްސަ ތަނެއް ގާއިމުކޮށް އެތަން ހެލްތު މިނިސްޓްރީ ހަވާލުކުރުމަށާއި ނޭޝަނަލް ހެލްތު ލެބޯރެޓަރީގެ މަސައްކަތް ހަރުދަނާ ކުރުމަށް ހެވީމެޓަލްސް ޓެސްޓު ކުރެވޭ އައިސީޕީ އެމްއެސް މެޝިނެއް ފޯރުކޮށްދިނުމަށް އެންވަޔަރަންމަންޓް މިނިސްޓްރީ އާއި ހެލްތު މިނިސްޓްރީ އާ ދެމެދު ފަހުމުނާމާއެއްގައި ސޮއިކޮށްފައި ވަނީ އިއްޔެ އެވެ.
އެންވަޔަރަންމަންޓް މިނިސްޓްރީގެ ފަރާތުން ފަހުމުނާމާގައި ސޮއިކުރެއްވީ މިނިސްޓަރު ތޯރިގު އިބްރާހިމެވެ. ހެލްތު މިނިސްޓްރީގެ ފަރާތުން ސޮއިކުރައްވާފައި ވަނީ އަބްދުﷲ ނާޒިމް އިބްރާހިމެވެ.
މި ފަހުމުނާމާގެ ދަށުން ފޯރުކޮށްދީފައިވާ އައިސީޕީ އެމްއެސްއިން ފެން، ފަސްގަނޑު ސެޑިމެންޓްސް އަދި އިންސާނުންގެ ލޭގައި ހުންނަ ހެވީ މެޓަލްސް (މަކުއިރީ، ކެޑްމިއަމް، ލެޑް) ފަދަ މާއްދާ ހުންނަ މިންވަރު ދެނެގަނެވޭނެ އެވެ. އިންޖީނުލީ އެއްގަމު އުޅަނދުތަކުގައި ބޭނުން ކުރާ ލެޑްއެސިޑް ބެޓެރި އާއި ބައެއް ކަހަލަ އިލެކްޓްރޯނިކްސް އާލަތްތަކުގައި ލެޑް ފަދަ ހެވީ މެޓަލްސް އެކުލެވެ އެވެ. އަދި ފްލޮރިޒެންޓް ބޮއްކާއި ބައެއް ބާވަތްތަކުގެ ކޮސްމެޓިކްސްގައި މަކުއިރީ އެކުލެވެ އެވެ.
މި މެޝިނުން ވަރަށް ދަށް މިންވަރުގައި ހުންނަ ހެވީމެޓަލްސް ދެނެގަނެވޭނެ އެވެ. މި މެޝިންގެ އެހީގައި ތިމާވެށި ތަގައްޔަރުވުމުގެ ސަބަބުން އާންމު ސިއްހަތަށް ކުރާ ނޭދެވޭ އަސަރުތައް ދެނެގަތުމަށް ދިރާސާކުރުމަށް ބޭނުންވާ މައުލޫމާތު ހޯދޭނެ އެވެ. މިކަމުގެ ސަބަބުން ތިމާވެށި ހިމާޔަތް ކުރުމަށާއި އާންމު ސިއްހަތު ރައްކާތެރި ކުރުމަށް ސަރުކާރުން ކުރާ މަސައްކަތް ހަރުދަނާ ކުރެވޭނެ އެވެ. މި އެއްބަސްވުމުގެ ދަށުން އެންވަޔަރަންމަންޓް މިނިސްޓްރީގެ ފަރާތުން މި މެޝިނަށް ބޭނުންވާ ކެމިކަލް ރިއެޖެންޓްތައް ނޭޝަނަލް ހެލްތު ލެބޯރެޓަރީއަށް މި އަހަރު ނިމުމުގެ ކުރިން ފޯރުކޮށްދިނުމަށް ވަނީ ހަމަޖެހިފަ އެވެ.
މި ފަހުމުނާމާގެ ދަށުން ހަވާލުކުރެވުނު ފެސިލިޓީގައި ސިއްހީ ދާއިރާއިން އުފެދޭ ކުނި ހަރުދަނާ އުސޫލުތަކާ އެއްގޮތަށް މެނޭޖުކުރުމަށް ރަށު ފެންވަރުގައި ނައްތާލުމަށް އެންމެ ރަނގަޅު ޓެކްނޮލޮޖީ އަދި ތިމާވެއްޓާ ރައްޓެހި އުސޫލުތައް ތައާރަފު ކުރެވޭނެ އެވެ. އަދި ނޭދެވޭ ގޮތުގައި ކުނި ނައްތާލުމުން ޖައްވަށް ބޭރުވާ ވިހަ މާއްދާތައް މަދު ކުރެވޭނެ އެވެ. މިކަމުގެ ސަބަބުން ވެއްޓަށާއި ބާރަށުގައި ދިރިއުޅޭ ރައްޔިތުންގެ ސިއްހަތަށް ކުރިމަތިވެދާނެ ނޭދެވޭ އަސަރުތަކުން ރައްޔިތުން ރައްކާތެރި ކުރެވޭނެ އެވެ. ބާރަށުގައި ގާއިމު ކުރެވުނު ފެސިލިޓީއަކީ ސިއްހީ މަރުކަޒެއްގައި ސިއްހީ ކުނި މެނޭޖްކުރުމަށް ރާއްޖޭގައި ގާއިމުކުރެވުނު ފުރަތަމަ ފެސިލިޓީ އެވެ.
ޕޮޕްސް މަޝްރޫއުގެ ދަށުން ކުރަމުންދާ މަސައްކަތްތަކުގެ ތެރޭގައި ބާރަށު ސިއްހީ މަރުކަޒުގައި ގާއިމުކޮށްފައިވާ މެޑިކަލް ކުނި މެނޭޖްކުރުމުގެ ފެސިލިޓީގެ އިތުރުން ނުރައްކާތެރި ކެމިކަލް ހިމެނޭ ކުނި ސްޓޯ ކުރުމަށް އައްޑޫ ސިޓީގައި އިންޓެރިމް ހަޒަޑަސް ކެމިކަލް ވޭސްޓް ސްޓޯރޭޖް ފެސިލިޓީއަކާއި ރ. ވަންދޫގައި ހަޒަޑަސް ކެމިކަލް އެންޑް ވޭސްޓް މެނޭޖްމަންޓް ސިސްޓަމެއް ގާއިމުކުރުން ހިމެނެ އެވެ.
