ރާއްޖެއަށް ވަޑައިގަތުމަށް ރަސްގެފާނު ޗާލްސްއަށް ދައުވަތު ދެއްވައިފި
ރާއްޖެއަށް ވަޑައިގަތުމަށް އިނގިރޭސިވިލާތުގެ ރަސްގެފާނު ޗާލްސް ތިން ވަނައަށް ދިވެހިރާއްޖޭގެ ރައީސުލްޖުމްހޫރިއްޔާގެ ނައިބު، އަލްއުސްތާޒު ހުސައިން މުހައްމަދު ލަތީފު ދައުވަތު ދެއްވައިފި އެވެ.
ސަމޯއާގައި މިހާރު ކުރިއަށްދާ ކޮމަންވެލްތު ހެޑްސް އޮފް ގަވަމަންޓް މީޓިން (ޗޮގަމް) ގައި ބައިވެރިވެ ވަޑައިގަތުމަށް އެ ގައުމަށް ކުރައްވާ ދަތުރުފުޅުގެ ތެރެއިން ރަސްގެފާނު ޗާލްސް އާއެކު ނަންގަވާފައިވާ ފޮޓޯއެއް ނައިބު ރައީސް ވަނީ ރޭ "އެކްސް" ގައި ޕޯސްޓްކުރައްވާފަ އެވެ.
ވިދާޅުވީ ޗޮގަމް 2024 ގެ ތެރެއިން ބޭއްވުނު އެސްއެމްއައި އިވެންޓާއި ރަސްގެފާނު ހޯސްޓް ކުރެއްވި ރޭގަނޑުގެ ފަރިއްކޮޅުން އެމަނިކުފާނާ ބައްދަލުވުމަކީ ލިބިވަޑައިގެންނެވި ޝަރަފެއް ކަމަށެވެ. ރަސްގެފާނު ޗާލްސްއަށް ރާއްޖެ ވަޑައިގަތުމުގެ ދައުވަތު ރައީސް ޑރ. މުހައްމަދު މުއިއްޒުގެ ފަރާތްޕުޅުން އަރުވާފައިވާ ކަމަށެވެ.
ރަސްގެފާނު ޗާލްސްއަކީ ކޮމަންވެލްތުގެ އެންމެ އިސްވެރިޔާ އެވެ. ކޮމަންވެލްތު ގައުމުތަކުގެ އިސްވެރިންގެ ބައްދަލުވުން ބާއްވަނީ ކޮންމެ ދެ އަހަރަކުން އެއް އަހަރު އެވެ. ބައްދަލުވުން ބާއްވަނީ މެމްބަރު ގައުމުތަކުގެ ތެރެއިން އެކި ފަހަރު އެކި ގައުމުގަ އެވެ.
މިއީ ޕެސިފިކް ސަރަހައްދުގެ ސްމޯލް އައިލެންޑް ޑިވެލޮޕިން ސްޓޭޓް (ސިޑްސް) ގެ ގައުމެއްގައި ކޮމަންވެލްތު ގައުމުތަކުގެ އިސްވެރިންގެ ބައްދަލުވުން ބާއްވާ ފުރަތަމަ ފަހަރެވެ.
ސަމޯއާގެ ވެރި ރަށް އަޕިއާގައި ބާއްވާ ކޮމަންވެލްތު ގައުމުތަކުގެ އިސްވެރިންގެ މި އަހަރުގެ ބައްދަލުވުމުގައި ބައިވެރިވާ ރާއްޖޭގެ ވަފުދުގެ އިސް ލީޑަރެއްގެ ގޮތުގައި މިފަހަރު ވަޑައިގެންނެވީ ނައިބު ރައީސް އެވެ.
