ސަން ޓްރެވެލްސްގެ އެކައުންޓުތައް ފްރީޒް ކުރުމުން އެންމެ ބޮޑު މަޔޫސްކަމެއް ލިބިފައިވަނީ ގިނަ ދިވެހި މުވައްޒަފުންނަށް: އާދަމް ޝަރީފް
ސަން ޓްރެވެލްސް ގެ އެކައުންޓުތައް ފްރީޒް ކުރުމުން އެންމެ ބޮޑު މާޔޫސްކަމެއް ލިބިފައިވަނީ 1000 އަށްވުރެ ގިނަ ދިވެހި މުވައްޒަފުންނަށް ކަމަށް ރައްޔިތުންގެ މަޖިލީހުގެ މަޑުއްވަރީ ދާއިރާގެ މެންބަރު އާދަމް ޝަރީފް އުމަރު ވިދާޅުވެއްޖެއެވެ.
އާދަމް ޝަރީފް ކުރެއްވި ޓްވީޓެއްގައި ވިދާޅުވެފައިވަނީ ސަން ޓްރެވެލްސް ގެ އެކައުންޓު ފްރީޒް ކުރުމުން އެންމެ ބޮޑު މާޔޫސް ކަމެއް ލިބިފައިވަނީ 1000 އަށްވުރެ ގިނަ ދިވެހި މުވައްޒަފުންނަށް ކަމަށާއި މިއީ ވަރަށް ކަންބޮޑުވާ ކަމެއް ކަމަށެވެ.
"ކޮވިޑް ގައި ވެސް އެއްވެސް ސްޓާފެއް ވަކި ނުކުރޭ. އެންމެންނަށް މުސާރަ ލިބުނު. ޝަރުޢީ ނިޒާމަަށް މިވަނީ ސިޔާސީ ނުފޫޒު ވަރަށް ބޮޑަށް ވަދެފައި" އާދަމް ޝަރީފު ފާހަގަ ކުރައްވާފައިވެއެވެ.
ހިލްޓަން އިންޓަނޭޝަނަލް ކުންފުނީގެ މައްސަލައިގައި، ރައްޔިތުންގެ މަޖިލީހުގެ މީދޫ ދާއިރާގެ މެންބަރު އަހުމަދު ސިޔާމުގެ ސަން ޓްރެވެލްސްގެ އެކައުންޓުތައް ފްރީޒް ކުރުމަށް، ސިވިލް ކޯޓުން ވަނީ މިދިޔަ އާދީއްތަ ދުވަހު ބެންކް އޮފް މޯލްޑިވްސް (ބީއެމްއެލް) އަށް އަމުރެއް ނެރެފައެވެ. އެކައުންޓްތަކުގެ ތަފްސީލުތައް ސިވިލް ކޯޓަށް ފޮނުވުމަށް ވެސް އަމުރު ކޮށްފައިވެއެވެ.
ސަން ޓްރެވެލްސް ގެ އިރުފުށި ރިސޯޓް ހިންގަން ހިލްޓަންއާ އެކު ހެދި އެއްބަސްވުން ސަން ޓްރެވަލްސް އިން ބާތިލްކޮށްފައިވަނީ 2013 ވަނަ އަހަރުއެވެ.
Ads by STO
