ފަލަސްތީނާ އެކު ދިވެހިން ޓެލެތޯނުން ލިބުނު ފައިސާ އަންރުވާއަށް ފޮނުވައިފި
"ފަލަސްތީނާ އެކު ދިވެހިން" ގެ ނަމުގައި ބޭއްވި ޓެލެތޯނުން ލިބުނު ފައިސާ ޔުނައިޓެޑް ނޭޝަންސް ރިލީފް އެންޑް ވޯކްސް އޭޖެންސީ ފޯ ޕަލަސްތީނިއަން ރެފިއުޖީޒް (އަންރުވާ) އަށް ފޮނުވައިފި އެވެ.
ރައީސް ޑރ. މުހައްމަދު މުއިއްޒުގެ އިރުޝާދުގެ ދަށުން ގައުމީ ފެންވަރުގައި ކުރިއަށް ގެންދިޔަ "ފަލަސްތީނާ އެކު ދިވެހިން" ޓެލެތޯނު ޕަބްލިކް ސާވިސް މީޑިއާ (ޕީއެސްއެމް) އިން ބާއްވާފައި ވަނީ ޖޫން މަހުގެ 12 ވަނަ ދުވަހު އެވެ. ޓެލެތޯނުން ޖުމްލަ 1،248،826.56 ޑޮލަރު ލިބިފައިވެ އެވެ. އޮޑިޓް ފާމެއް ކަމަށްވާ ކްރޯ މޯލްޑިވްސް އެލްއެލްޕީން ވަނީ އެ އަދަދު ލިބުނުކަން ކަށަވަރުކޮށްދީފަ އެވެ.
ފޮރިން މިނިސްޓްރީން ރޭ ނެރުނު ނޫސް ބަޔާނެއްގައި ބުނީ ފަލަސްތީނުގެ ރައްޔިތުންނާ ދެކޮޅަށް އިޒްރޭލުން ހިންގަމުންދާ ނަސްލު ނައްތާލުމުގެ އަމަލުތަކާއި ބައިނަލްއަގުވާމީ ގާނޫނާއި އިންޓަނޭޝަނަލް ހިއުމެނިޓޭރިއަން ލޯ އާ ހިލާފަށް ދެމުންގެންދާ ހަމަލާތައް ދިވެހި ސަރުކާރުން ހަރުކަށި އިބާރާތުން ކުށްވެރިކުރާ ކަމަށެވެ.
"ފަލަސްތީނާ އެކު ދިވެހިން" ޓެލެތޯނުން ލިބުނު ފައިސާ އަންރުވާއަށް ފޮނުވާފައި ވަނީ މިދިޔަ އޮގަސްޓު މަހުގެ 20 ވަނަ ދުވަހު ކަމަށް އެ މިނިސްޓްރީން ބުނެ އެވެ.
"މިފަދަ ބޮޑު އަދަދެއްގެ ފައިސާ ފަލަސްތީނުގެ ރައްޔިތުންނަށް ހަދިޔާކޮށްފައިވާކަމީ ފަލަސްތީނުގެ މިނިވަން ކަމަށް ރާއްޖެއިން ކުރާ ތާއީދާއި، އަބަދުވެސް، އަދި ވަކިން ހާއްސަކޮށް މިފަދަ ދަތި އުދަނގޫ ދަނޑިވަޅެއްގައި އެ ގައުމާއި އެ ގައުމުގެ ރައްޔިތުންނާ އެކު ސާބިތުކަމާ އެކު ދިވެހިން ތިބިކަމުގެ އަލިގަދަ ހެއްކެކެވެ،"
އިތުރަށް ބުނި ގޮތުގައި ދިވެހި ސަރުކާރުން މިހާރު ދަނީ ދިވެހި ރައްޔިތުން ހަދިޔާކުރި ފައިސާ ހަރަދުކުރާނެ ކުރު މުއްދަތުގެ އަދި ދިގު މުއްދަތުގެ ޕްރޮގްރާމްތަކާއި ޕްރޮޖެކްޓުތަކާ ގުޅޭގޮތުން އަންރުވާ އާއެކު މަޝްވަރާ ކުރަމުން ކަމުގަ އެވެ.
ރާއްޖޭގެ މަރުކަޒީ ބޭންކުން އަންރުވާއަށް ފައިސާ ޖަމާކުރިކަމުގެ "ޑެބިޓު އެޑްވައިޒަރު" ގެ ކޮޕީ އާއި "އަންރުވާ ފޯ ޕަލަސްތީން" އެކައުންޓަށް ރާއްޖެއިން ފޮނުވި ފައިސާ ލިބިފައިވާކަން ކަށަވަރުކޮށްދީ ޖޭޕީ މޯގަން ބޭންކުން އިޝޫކޮށްފައިވާ ޓްރާންސެކްޝަން ތަފުސީލު ފޮރިން މިނިސްޓްރީގެ ބަޔާނާ އެކު ވަނީ އާންމުކޮށްފަ އެވެ.
