އޭސީސީ އާއި އީސީގެ ގާނޫނަށް ގެންނަން ހުށަހެޅި އިސްލާހުތަކަށް އެމްޑީޕީގެ ކަންބޮޑުވުން

އިލެކްޝަން ކޮމިޝަން (އޭސީ) އާއި އެންޓި ކޮރަޕްޝަން ކޮމިޝަން ( އޭސީސީ) އަށް ރައީސްއާއި ނައިބު ރައީސް އައްޔަންކުރަން ރައީސުލްޖުމްހޫރިއްޔާގެ ބާރުގެ ދަށަށް ގެނައުން ހުއްޓުވުމަށް އިދިކޮޅު މައި ޕާޓީ މޯލްޑިވިއަން ޑިމޮކްރެޓިކް ޕާޓީ (އެމްޑީޕީ) އިން ގޮވާލައިފި އެވެ. ގާނޫނަށް ހުށަހަޅާފައިވާ އިސްލާހާ ގުޅިގެން އެމްޑީޕީން މިއަދު ނެރުނު ބަޔާނެއްގައި ބުނީ އެއީ ގާނޫނު އަސާސީން އެކަށައަޅާފައިވާ ފާރަވެރިވުމުގެ ނިޒާމު ފުނޑާލައި، ބާރުތައް އެއްކޮށްލުމުގެ ސިލްސިލާގެ ތެރެއަށް އިތުރުވާ ބޮޅެއްކަމާއި، އެކަން ކުށްވެރިކުރާ ކަމަށެވެ. އެމްޑީޕީން ބުނީ އީސީ އާއި އޭސީސީގެ ރައީސް އާއި ނައިބު ރައީސުންނަކީ ކޮމިޝަންތައް ހިންގުމުގައި އެންމެ އިސް ދައުރެއް އަދާކުރަން ޖެހޭ ބޭފުޅުން ކަމަށްވާއިރު، ކޮމިޝަނުގެ މެންބަރުންގެ މެދުގައި ނަގާ ވޯޓަކުން އެ މަގާމުތަކަށް ބޭފުޅުން އައްޔަނު ކުރެވޭ ގޮތަށް އޮތް މާއްދާތައް ބަދަލުކުރަނީ ސަރުކާރުން ކޮމިޝަންތަކުގެ މިނިވަންކަމާއި މުސްތަގިއްލުކަން ނަގާލައި ސިޔާސީ ނުފޫޒު ފޯރުވުމަށް ކަމަށެވެ. އަދި އެއީ ސަރުކާރުން ހިންގާ ނާތަހުޒީބު އަމަލެއް ގޮތަށް އެ ޕާޓީން ވަނީ ސިފަކޮށްފަ އެވެ. އެއީ ޑިމޮކްރެސީ އަށް ކުރާ ދަތުރުގައި، އެތައް ބައެއްގެ މިންނެތް މަސައްކަތުން އެކަށައެޅި ނިޒާމުގައި ފަހަތަށް އެޅޭ ފިޔަވަޅެއް ކަމަށްވެސް އެމްޑީޕީ ބުންޏެވެ. ގާތްގަނޑަކަށް 50،000 އެއްހާ މެންބަރުން ހިމެނޭ އެމްޑީޕީން ބުނީ ރާއްޖޭގައި ބާއްވާ އިންތިހާބުތައް ބޭއްވުމުގެ ޒިންމާ މަތިކޮށްފައިވާ އީސީ އާއި ކޮރަޕްޝަންގެ އަމަލުތައް ތަހުގީގު ކުރުމުގެ ޒިންމާ އޮތް އޭސީސީއަކީ ވަކި ކޮޅަކަށް ނުޖެހި މިނިވަންކަމާ އެކު މަސައްކަތް ކުރާ މުސްތަގިއްލު ކޮމިޝަންތަކަށް ވުމަކީ އެ ކޮމިޝަންތަކުގެ އަސާސީ ސިފައެއް ކަމަށެވެ.