އައްޑޫ ފިޝަރީޒް ކޮންޕްލެކްސް ތަރައްގީ ކުރަން ފައިސާ ލިބިއްޖެ
އައްޑޫ ފިޝަރީޒް ކޮންޕްލެކްސް ތަރައްގީ ކުރަން މިދިޔަ ހަފްތާގައި ފައިސާ ލިބިއްޖެ ކަމަށް ފިޝަރީޒް މިނިސްޓަރު އަހުމަދު ޝިޔާމް ވިދާޅުވެއްޖެ އެވެ.
ޝިޔާމް މިހެން ވިދާޅުވީ ރައްޔިތުންގެ މަޖިލީހުގެ މިއަދުގެ ޖަލްސާގައި މަރަދޫ ދާއިރާގެ މެންބަރު އަހުމަދު ދީދީ ކުރެއްވި ސުވާލަކަށް ޖަވާބު ދެއްވަމުންނެވެ.
މި ފުރުސަތުގައި މަރަދޫ ދާއިރާގެ މެންބަރު ވަނީ އައްޑޫ ސިޓީ، ފިޝަރީޒް ކޮންޕްލެކްސްގެ ކެޕޭސިޓީ ބޮޑުކުރުމަކީ މި ސަރުކާރުގެ ވައުދެއްކަމާއި، އަދި މަސްވެރިން އެކަމަށް ވަރަށް ބޮޑަށް ބޭނުންވެފައިވާ އެ މަސައްކަތް ފެށެނީ ކޮން ތާރީހެއްގައިތޯ ސުވާލުކުރެއްވި އެވެ.
އެ ސުވާލަށް ޖަވާބުދެއްވަމުން މިނިސްޓަރު ވިދާޅުވީ ރައީސް ޑރ. މުހައްމަދު މުއިއްޒުގެ ލަފާފުޅާއެއްގޮތައް މަސްވެރިކަމުގެ ސިނާއަތައް ދިމާވެފައިވާ ގޮންޖެހުންތައް ހައްލުކުރުމުގެ ގޮތުން މިފްކޯ މެދުވެރިކޮށް ކުރެވުނު މަސައްކަތުން، ފަންޑިން އެޖެންސީތަކާ ޕްރޮޕޯސަލްތަކާއެކީގައި މަސައްކަތް ފެށިގެން ދިޔަ ކަމަށެވެ.
އެކަމުގެ ނަތީޖާ އަކަށް ވެގެން ދިޔައީ އައިއެސްޓީބީ ފަރާތުން މިފްކޯ ގެ ތަރައްގީ އަށް ކުރަންހުރި މަސައްކަތްތަކުގެ ތެރެއިން އައްޑޫގެ ފިޝަރީޒް ކޮންޕްލެކްސް ހިމެނޭ ގޮތައް މި މަސައްކަތް ކުރެވޭނެ ފައިސާ ހަމަޖެހިގެންދިޔުން ކަމަށް މިނިސްޓަރު ފާހަގަކުރެއްވި އެވެ.
"މިދިޔަ ހަފްތާ މި ފައިސާ ހަމަޖެހިގެން މިދިޔައީ، މި މަސައްކަތް މިއަންނަ އަހަރުގައި ކުރީ ކޮޅު ފަށާ، 2025 ވަނަ އަހަރުގެ ފަހު ކޮޅު ނޫނީ 2026 ވަނަ އަހަރުގެ ކުރީ ކޮޅަށް އަޅުގަނޑުމެންނަށް މި މަސައްކަތް ނިންމާލެވޭނެ."
މީގެ އިތުރުން ޝިޔާމް ވިދާޅުވީ މަސްވެރިކަމުގެ ސިނާއަތުގައި ދިމާވާ އެންމެ ބޮޑު ގޮންޖެހުމަކީ، މަސް ރައްކާކުރުމުގެ ކެޕޭސިޓީ އަދި އޭގެ އަގު އެއްކުރުމުގެ ކެޕޭސިޓީ ނެތި، އެހާ ގިނަ ދުވަސްވަންދެން މަސްވެރި ސިނާއަތް އޮތް އޮތުން ކަމަށެވެ.
އެންމެ ފުރަތަމަ ފެލިވަރު ޕްރޮޑަކްޝަން ފެލިވަރު އޮޕަރޭޝަނަށް އައިފަހުންވެސް 47 އަހަރު ވެގެން ގޮސްފައިވާ ކަމަށް ޝިޔާމް ވިދާޅުވި އެވެ. އަދި ބައިގަރުނު ގުނާއިރުގައި އޭރު ފެސިލިޓީ ފެށުނު ގޮތާ މިއަދަކާ މާ ބޮޑު ތަފާތެއް ނެތް ކަމަށްވެސް ޝިޔާމް ވިދާޅުވި އެވެ.
މަސްވެރިކަމުގެ ސިނާއަތް ކުރިއެރުވުމަށް މާގިނަ މަސައްކަތްތަކެއް ކުރެވިފައި ނެތް ކަމާއި، މިފްކޯ އުފެދުނު ފަހުން 28 އަހަރުވީ އިރު މަސްވެރި ސިނާއަތުގައި ދިވެހިރާއްޖޭގެ މަސްވެރިން ތަރައްގީވެފައިވާއިރު، މަސްވެރިން އަތުން މަސް ގަންނަ ވަސީލަތްތައް ތަރައްގީވެފައި ނުވާ ކަމަށްވެސް ޝިޔާމް ފާހަގަ ކުރެއްވި އެވެ.
މި ފެސިލިޓީގެ ކެޕޭސިޓީ އިތުރުކުރުމުގެ ވާހަކަ، ވޭތުވެދިޔަ ސަރުކާރުން ވަރަށް ގިނަ ވާހަކަތައް ދެއްކި، ވަރަށް ގިނަ ހެޑްލައިންތައް އެބަހުރި 2019 ވަނަ އަހަރުން ފެށިގެންވެސް މި ވާހަކަތައް ދެއްކި. އެހެން ނަމަވެސް ހިތާމައަކީ މިކަމުގެ އަމަލީ މަސައްކަތް ކުރުމަށްޓަކައި އެއްވެސް މަސައްކަަތެއް ކޮށްފައި ނެތްކަމުގެ ހިތާމަވެރި ވާހަކަ.
ޝިޔާމް ވިދާޅުވީ މި ފެސިލިޓީގައި މި ވަގުތު މަސް ރައްކާ ކުރެވޭ ކެޕޭސިޓީއަކީ 1500 ޓަނު ކަމަށެވެ. އޭގެ އިތުރުން 50 ޓަނުގެ ބްރައިން ކެޕޭސީޓި ހުރި ކަމަށްވެސް ޝިޔާމް ވިދާޅުވި އެވެ.
"އިތުރު ކުރެވޭ ވަސީލަތާއެކީގައި އަޅުގަނޑުމެންނަށް އިތުރު 1000 ޓަނު މި ފެސިލިޓީއަށް އެބަ އިތުރުކުރެވޭ. އެއީ މަސް ފިނިކޮށް ރައްކާ ކުރުމަށްޓަކައި އިތުރު 1000 ޓަނާ އެކީގައި އިތުރު 50 ޓަނުގެ ބްރައިން ފްރީޒިންއާ އެކީ، އަޅުގަނޑުމެންނަށް އިރާދަކުރެއްވިޔާ މިތަނުގެ ކެޕޭސިޓީ 2500 އަށް އިތުރުކުރެވިގެން މިދިޔައީ. އަދި ދުވާލެއްގެ މައްޗަށް 100 ޓަނުގެ މަސް މި ޕެސިލީޓީއަށް ގަނެވޭ ގޮތައް 100 ޓަނުގެ ބްރައިން ފްރީޒިން އިތުރުވެގެން މިދިޔައީ."
މި ފަންޑު ފަހިކޮށްދިނުމަށް މަސައްކަތްކުރެއްވި ހުރިހާ ފަރާތްތަކަށް ޝިޔާމް ވަނީ ޝުކުރު އަދާކުރައްވާފަ އެވެ. އަދި މިއީ އައްޑޫ ސިޓީގެ މަސްވެރިންގެ ތަރައްގީއަށް ގެނެވޭނެ އެންމެ މުހިންމު ތަރައްގީގެ މަޝްރޫއު ކަމާއި، މިއީ އައްޑޫ މަސްވެރިންނަށް ލިބިގެންދާނެ އެންމެ ބޮޑު އުފާ ކަމަށްވެސް ޝިޔާމް ވިދާޅުވި އެވެ.
Ads by STO
