ހިޔާވެހި ފައިނޭންސް މެދުނުކެނޑި ކޮންމެ އަހަރަކު ބަޖެޓުގައި ހިމަނާ ލޯނު ދޫކުރާނަން: ރައީސް
ގެދޮރު އަޅަން ބޭނުންވާ ފަރާތްތަކަށް ދޫކުރާ ހިޔާވެހި ފައިނޭންސިންގް ސްކީމް މެދުނުކެނޑި ކޮންމެ އަހަރަކު ބަޖެޓުގައި ހިމަނާ ލޯނު ދޫކުރާނެ ކަމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު މިއަދު ވިދާޅުވެއްޖެ އެވެ.
އެ ސްކީމް އިފްތިތާހްކުރުމަށް އިސްލާމީ މަރުކަޒުގައި މިއަދު ހެނދުނު ބޭއްވި ރަސްމިއްޔާތުގައި ވާހަކަދައްކަވަމުން ރައީސް ވިދާޅުވީ އެއީ ކުރިއަށް އޮތް 4 އަހަރު ތެރޭގައިވެސް ލިބޭނެ ސްކީމެއް ކަމަށެވެ.
ކޮންމެ އަހަރަކުވެސް ސަރުކާރުގެ ބަޖެޓުގައި 1 ބިލިއަން ރުފިޔާ ހިމަނާނެ މަޝްރޫއުއެއްކަން ރައީސް މުއިއްޒު ފާހަގަކުރެއްވި އެވެ.
"މިއީ ދާއިމަށް ކޮންމެ އަހަރަކުވެސް ކުރިއަށް ގެންދާނެ މަޝްރޫއުއެއް. މި އަހަރުގައި މި ފާސްކުރަން ހުށަހަޅާފައިވާ މިއަންނަ އަހަރުގެ ބަޖެޓުގައި މި ސްކީމް ކުރިއަށް ގެންދިއުމަށް އެއް ބިލިއަން ރުފިޔާ ސަރުކާރުން ބަޖެޓުން ކަނޑައަޅާފައިވާނެ"
އޭގެ އިތުރުން ރައީސް ވިދާޅުވީ 1،000 މިލިއަން ރުފިޔާ ބޭނުންކޮށްގެން ހައުސިން ޑިވެލޮޕްމަންޓް ފައިނޭންސް ކޯޕަރޭޝަން (އެޗްޑީއެފްސީ) އާއި ބޭންކް އޮފް މޯލްޑިވްސް (ބީއެމްއެލް) އަދި މޯލްޑިވްސް އިސްލާމިކް ބޭންކް (އެމްއައިބީ)މެދުވެރިކޮށް 5 ފަސެންޓްގެ އިންޓަރެސްޓްގައި އެ ލޯނުތައް ދޫކުރަމުންދާނެ ކަމަށެވެ.
އަދި 1 ބިލިއަން ރުފިޔާ އިންވެސްޓްކޮށްގެން 2 ބިލިއަނަށްވުރެ ގިނަ ރުފިޔާގެ ލޯނު ދޫކުރެވޭނެ ކަމަށްވެސް ރައީސް ވިދާޅުވި އެވެ.
"އެއްބިލިއަން ރުފިޔާ އިންވެސްޓް ކުރެވިގެން ހަރަދު ކުރެވިގެންދާނީ މި ރޭވިފައި އޮތް ގޮތުން، ކަމުގައިވާތީވެގެން އިފެކްޓްވްލީ ހަގީގަތުގައި ދެ ބިލިއަން ރުފިޔާގެ ލޯނު މި ސްކީމްގެ ދަށުން، މިއަދު މި ދޫކުރެވޭ ލޯނުގެ ދަށުން 1 މިލިއަން ރުފިޔާގެ ކެޕްގެ ދަށުގައި ރާއްޖޭގެ ގާތްގަނޑަަކަށް ހުރިހާ ރަށަކަށް ދޫކުރާ ލޯން ސްކީމާ އާބަން ސެންޓާ ގޮތުގައި ކަނޑައެޅޭ ލިސްޓު ގެޒެޓްކުރެވޭ ލިސްޓެއް އެރަށްތަކަށް އެއީ 3 މިލިއަން އާ ހަމައަށް. އަދި މާލެއާއި ފުރަމާލެ ކަނޑައަޅާފައިވާ 6 މިލިއަން ކެޕްގެ ދަށުން ދޫކުރެވޭ ލޯނުތައް"
އެމަނިކުފާނު ވިދާޅުވީ އެ ހުރިހާ ލޯނެއް ދޫކުރަން އަންނަ އަހަރު ފަށާއިރު، ދޫކުރާނީ 2 ބިލިއަނަށްވުރެ ގިނަ ރުފިޔާގެ ލޯނުތައް ކަމަށެވެ. އަދި އެ ލޯނު ކޮންމެ އަހަރަކުވެސް ލިބޭނެ ކަމަށްވެސް ރައީސް ފާހަގަކުރެއްވި އެވެ.
ރައީސް ވިދާޅުވީ އެކަމުގެ ސަބަބުން ވަރަށް ގިނަ ފަރާތްތަކަށް އެމީހެއްގެ ގޯތި އޮވެ، ގެ އެޅޭނެ ގޮތެއް ނެތް މީހުންނަށް ގެ އަޅައި ނިންމާނެ ފުރުސަތު ލިބިގެންދާނެ ކަމަށެވެ. އަދި ގެ އަޅަން ފަށާފައި ކޮންމެވެސް ސަބަބަކާ ހެދި ނުނިމި ތިބޭ މީހުންނަށްވެސް ގެ ނިންމާލުމުގެ ފުރުސަތުވެސް ލިބިގެންދާނެ ކަމަށް ރައީސް ވިދާޅުވި އެވެ.
މިއަދު އިފްތިތާހްކުރި ހިޔާވަހި ސްކީމްގެ ދަށުން ލޯނު ދޫކުރަން ހަމަޖެހިފައިވަނީ ޖުމްލަ 3 ބަޔަކަށް ބަހާލައިގެންނެވެ. އެއީ އާބަން ޑެވޮލަޕްމަންޓް ސެންޓަރުތަކުގައި ގެދޮރު އެޅުމަށްޓަކައި ދޫކުރެވޭ ލޯނާއި، ފުރަމާލޭގައި ގެދޮރު އެޅުމަށްޓަކައި ދޫކުރެވޭ ލޯން އަދި ރާއްޖޭގެ އެހެނިހެން ސަރަހައްދުތަކުގައި ގެދޮރު އެޅުމަށްޓަކައި ދޫކުރެވޭ ލޯން އެވެ.
25 އަހަރުގެ މުއްދަތައް ބަހާލައިގެން ދައްކާ ނިންމުމަށް ހުޅުވާލި މި ލޯނަށް އެދި ހުށަހެޅުމަށް ހުޅުވާލާފައިވަނީ ހިޔާވެހި ޕޯޓަލް މެދުވެރިކޮށެވެ.
