ކުންފުނިތަކުގެ ނަމުގައި ގިނަ އަދަދަށް ވެހިކަލް ރަޖިސްޓްރީ ކުރުން ހުއްޓުވައިފި
ކުންފުނިތަކުގެ ނަމުގައި ވެހިކަލް ރަޖިސްޓްރީ ކުރެވޭނީ އެ ކުންފުންޏެއްގެ ވިޔަފާރިއަށް ނުވަތަ އެހެންވެސް ބޭނުމަކަށް އެ ކުންފުންޏަށް ބޭނުންވާ އަދަދަށް ކަމަށާއި، އިތުރަށް ކުންފުނިތަކަށް ވެހިކަލް ރަޖިސްޓްރީ ކުރުން ހުއްޓުވިފައިވާ ކަމަށް ޓްރާންސްޕޯޓް އެންޑް ސިވިލް އޭވިއޭޝަން މިނިސްޓަރު މުހައްމަދު އަމީން މިއަދު ވިދާޅުވެއްޖެ އެވެ.
ރައީސް އޮފީހުގައި މިއަދު ބޭއްވި ނޫސްވެރިންގެ ބައްދަލުވުމުގައި މިނިސްޓަރު އަމީން ވިދާޅުވީ، މީގެ ކުރިން ކުންފުނިތަކުގެ ނަމުގައި ގިނަ އަދަދެއްގެ ސައިކަލް ރަޖިސްޓްރީ ކޮށްގެން އެކި ކަހަލަ ކޮންޓްރެކްޓްގެ ދަށުން އެކި ފަރާތްތަކަށް ދެވޭނެ ނިޒާމެއް އޮތް ކަމަށެވެ. އެހެން އޮތުމުން ރަޖިސްޓްރީ އޮންނަނީ އެހެން ފަރާތެއްގެ އަތުގައި ކަމަށާއި، ސައިކަލްގެ ވެރިފަރާތަކަށް ވެފައި އޮންނަނީ އެހެން މީހެއް ކަމަށް މިނިސްޓަރު ވިދާޅުވި އެވެ.
އަމީން ވިދާޅުވީ، އެކަން ހުއްޓުވައި ގަވާއިދު އިސްލާހުކޮށް ގެޒެޓް ކުރެވިފައިވާ ކަމަށެވެ.
"ކުންފުނިތަކުގެ ނަމުގައި ރަޖިސްޓްރީ ގެންގުޅެވޭނީ އެ ކުންފުންޏެއްގެ ވިޔަފާރި ނުވަތަ އިތުރު ބޭނުމަކަށް ބޭނުންވާ އަދަދަކަށް،" އިސްލާހު ކުރެވިފައިވާ ގަވާއިދުގައިވާ ގޮތުގެ މައުލޫމާތު ދެއްވަމުން ވިދާޅުވި އެވެ.
އިތުރަށް މިނިސްޓަރު ވިދާޅުވީ، އެކަން ކުރުމުގެ މައިގަނޑު ބޭނުމަކީ މާލެ ސަރަހައްދަށް ވެހިކަލް ގެނައުން އިތުރުވެގެންދާ ދިއުން ނިމުމަކަށް ގެނައުން ކަމަށެވެ. އެކަން އެގޮތަށް ކޮށްފައިވަނީ ގާނޫނުގެ ދަށުން މިނިސްޓްރީއަށް ލިބިފައިވާ ބާރުގެ ދަށުން ކަމަށެވެ.
އޭގެ އިތުރުން، މާލެ ސަރަހައްދުގައި ނޫޅެވޭ ވަރަށް ސައިކަލް ގިނަވެ، އޭގެ ސަބަބުން އެކްސިޑެންޓްތަކާއި ނުރައްކާތެރި އެތައް ކަންތައްތަކެއް ކުރިމަތިވަމުންދާ ކަމަށެވެ. އަދި މިފަދަ ކަންކަން ދިމާވާއިރު، ސައިކަލް ދުއްވާ މީހާއާއި ސައިކަލުގެ ވެރިފަރާތް ދިމާނުވާކަން މިނިސްޓަރު ފާހަގަކުރެއްވި އެވެ.
