އެމެރިކާގެ އިންތިހާބު ކާމިޔާބު ކުރުމުން ރައީސްގެ މަރުހަބާ ޓްރަމްޕަށް
އެމެރިކާގެ ރިޔާސީ އިންތިހާބު ކާމިޔާބުކޮށް، ވެރިކަމަށް ވަޑައިގަންނަވާނެ ކަމަށް ވަގުތީ ނަތީޖާތަކުން ދައްކާ އެ ގައުމުގެ ކުރީގެ ރައީސް އަދި ރިޕަބްލިކަން ޕާޓީގެ ކެންޑިޑޭޓް ޑޮނަލްޑް ޓްރަމްޕަށް ރައީސް ޑރ. މުހައްމަދު މުއިއްޒު މަރުހަބާ ވިދާޅުވެއްޖެ އެވެ.
ޓްރަމްޕް ވަނީ އޭނާ އާ ވާދަކުރެއްވި އެމެރިކާގެ މިހާރުގެ ނައިބު ރައީސް އަދި ޑިމޮކްރެޓްސްގެ ކެންޑިޑޭޓު ކަމަލާ ހެރިސްގެ މައްޗަށް އިންތިހާބުގައި ކުރިލިބިވަޑައިގެންފައިވާކަން އިއުލާނު ކުރައްވާފަ އެވެ.
އިންތިހާބުގެ ނަތީޖާތައް ދައްކާ ގޮތުން މިހާތަނަށް އައިއިރު، 267 އިލެކްޓޯރަލް ކޮލެޖު ވޯޓު ޓްރަމްޕަށް ވަނީ ލިބިވަޑައިގެންފަ އެވެ. ކަމަލާއަށް ލިބިވަޑައިގަތީ 224 އިލެކްޓޯރަލް ކޮލެޖެވެ. ރައީސްކަން ލިބެނީ 270 އިލެކްޓޯރަލް ކޮލެޖު ލިބިގެންނެވެ. ރިޕޯޓުތައް ބުނާ ގޮތުން ޓްރަމްޕަށް 300 އަށް ވުރެ ގިނަ އިލެކްޓޯރަލް ކޮލެޖު ލިބިވަޑައިގަންނަވާނެ އެވެ.
އިންތިހާބުގައި ޓްރަމްޕް ހޯއްދެވި ކާމިޔާބީއަށް މަރުހަބާ ދަންނަވައި "އެކްސް" ގައި ކުރެއްވި ޕޯސްޓުގައި ރައީސް ވިދާޅުވީ ރާއްޖެ އާއި އެމެރިކާ އާ ދެމެދު އޮންނަނީ އިހުތިރާމާއި ގެ މައްޗަށް ބިނާވެފައިވާ ގުޅުމެއް ކަމަށެވެ.
ކުރިއަށް އޮތް ތަނުގައި ވެސް ދެ ފަރާތުގެ ދެމެދު އޮތް ގުޅުން ހަރުދަނާކޮށް ހުރި ގޮންޖެހުންތަކަށް ހައްލު ހޯދައި، ދުނިޔޭގެ ސުލްހަމަސަލަސްކަން ކުރިއެރުވުމަށް މަސައްކަތް ކުރުމަށް އުންމީދުކުރައްވާ ކަމުގައި އެމަނިކުފާނު ފާހަަގަކުރެއްވި އެވެ.
