ކޮންމެ އަތޮޅެއްގައި އެސްޓީއޯއިން ސްޓޯރޭޖް ގާއިމުކޮށް، އެއް ރޭޓެއްގައި ތެޔޮ ފޯރުކޮށްދެނީ
ރާއްޖޭގެ ކޮންމެ އަތޮޅެއްގައި ތެޔޮ ރައްކާކުރެވޭނެ ނިޒާމު ގާއިމުކޮށް، ސްޓޭޓް ޓްރޭޑިން އޯގަނައިޒޭޝަން (އެސްޓީއޯ) ރޭޓުގައި މަސްވެރިންނަށާއި އާންމު ރައްޔިތުންނަށް ތެޔޮ ލިބޭނެ މަގުފަހިކޮށްދިނުމުގެ މަސައްކަތް އެ ކުންފުންޏާ ގުޅިގެން ސަރުކާރުން ފަށައިފި އެވެ.
ކޮންމެ އަތޮޅެއްގައި ތެޔޮ ރައްކާކުރެވޭނެ ނިޒާމު ގާއިމުކުރުމުގެ މަޝްރޫއު އިފުތިތާހުކޮށްދެއްވީ އެކަމަށް ހާއްސަކޮށް ރައީސް އޮފީހުގައި މިއަދު ބޭއްވި ރަސްމިއްޔާތެއްގައި ރައީސް ޑރ. މުހައްމަދު މުއިއްޒެވެ.
މަޝްރޫއާ ގުޅޭގޮތުން ވާހަކަ ދައްކަވަމުން އެސްޓީއޯގެ މެނޭޖިން ޑިރެކްޓަރު ޝިމާދް އިބްރާހިމް ވިދާޅުވީ އަމާޒަކީ 2026 ވަނަ އަހަރުގެ ފެބްރުއަރީ މަހުގެ ކުރިން ރާއްޖޭގެ ހުރިހާ އަތޮޅެއްގައި ފިއުލް ސެޓަޕް ގާއިމުކޮށް، މަސްވެރިންނާއި އާންމު ރައްޔިތުންނަށް ތެޔޮ ލިބޭނެ ނިޒާމު ގާއިމުކުރުން ކަމަށެވެ.
މަސްވެރިންނަށް ފަސޭހައިން ތެޔޮ ލިބޭނެ މަގުފަހި ކުރުމަށް މި އަހަރުގެ ޖަނަވަރީ މަހު ހުޅުމާލޭގައި ވަނީ ސެޓަޕްއެއް ގާއިމުކޮށްފަ އެވެ. އަދި ޅ. ފެލިވަރާއި ގއ. ކޫއްޑޫގައި ހުންނަ އެފްއެސްއެމް ޝެޑުން ހެޔޮ އަގުގައި ދަނީ ތެޔޮ ފޯރުކޮށްދެމުންނެވެ. އަންނަ އަހަރުގެ ފެބްރުއަރީ މަސް ފެށެންވާއިރަށް، އައްޑޫ ސިޓީ ހުޅުމީދޫގައި ސެޓަޕް ގާއިމުކުރުމަށް ވަނީ ތާވަލުކޮށްފަ އެވެ.
މީގެ އިތުރުން، 2025 ވަނަ އަހަރުގެ އޮކްޓޯބަރު މަހުގެ ނިޔަލަށް ހއ. އިހަވަންދޫ، ހދ. ހަނިމާދޫ، ފ. ނިލަންދޫ، ގދ. ފަރެސްމާތޮޑާ އަދި ފުވައްމުލައް ސިޓީގައި ސެޓަޕް ގާއިމު ކުރުމަށް ވަނީ ހަމަޖެހިފަ އެވެ.
2026 ވަނަ އަހަރުގެ ފެބްރުއަރީ މަހުގެ ނިޔަލަށް ސެޓަޕް ގާއިމުކުރާނެ ރަށްތައް:
- ށ. މިލަންދޫ
- ނ. މަނަދޫ
- ބ. ތުޅާދޫ
- ވ. ފެލިދޫ
- ތ. ހިރިލަންދޫ
- ރ. ދުވާފަރު
- އއ. މަތިވެރި
- މ. މުލައް
- ދ. ކުޑަހުވަދޫ
- ލ. ގަން
ރަސްމިއްޔާތުގައި ވާހަކަ ދައްކަވަމުން ފިޝަރީޒް އެންޑް އޯޝަން ރިސޯސަސް މިނިސްޓަރު އަހްމަދު ޝިޔާމް ވަނީ ތެލަކީ އަސާސީ ހިދުމަތެއްގެ ގޮތުގައި ކަނޑައަޅުއްވައި، މުޅި ރާއްޖޭގެ ހުރިހާ އަތޮޅެއްގައި މަދުވެގެން ކޮންމެ އަތޮޅަކުން އެއް ރަށުން އެސްޓީއޯ ރޭޓުގައި ތެޔޮ ފޯރުކޮށްދޭ ނިޒާމެއް ގާއިމުކުރުމަކީ ރައީސްގެ ރިޔާސީ ވައުދެއްކަން ފާހަގަކުރައްވާފަ އެވެ.
މަސްވެރި ސިނާއަތުގައި މިހާތަނަށް އޮތް ވަގުތީ ހައްލު ހޯދުމުގެ ސަގާފަތް ނައްތާލައި، ދާއިމީ ހައްލު ހޯދައިދިނުމުގެ ތަސައްވުރެއް ރައީސް ގެންގުޅުއްވާކަން މިނިސްޓަރު ފާހަގަކުރެއްވި އެވެ. ވިދާޅުވީ މި ސަރުކާރުގެ ފުރަތަމަ ތިން އަހަރު ދުވަހުގެ ތެރޭގައި މަސްވެރިކަމުގައި ހުރި ގޮންޖެހުންތައް ހައްލު ކުރުމަކީ އަމާޒެއް ކަމަށެވެ.
މިއަދުގެ ރަސްމިއްޔާތުގައި ރައީސްގެ ނައިބު ހުސައިން މުހައްމަދު ލަތީފާއި ސަރުކާރުގެ ބައެއް މިނިސްޓަރުންނާއި އިސްވެރިން ބައިވެރިވެވަޑައިގަތެވެ.
Ads by STO
