ގިނަ އަދަދެއްގެ އަންހެނުންނާއި ޒުވާނުން ހައްޔަރުކުރީތީ ހިތާމަކުރަން، މިހާރުން މިހާރަށް ދޫކޮށްލާ: ޝިޔާމް
މިއަދު ހަވީރު މާލޭގައި ބާއްވަން އުޅުނު ސައިކަލު ބުރު ހުއްޓުވާ، ގިނަ އަދަދެއްގެ އަންހެނުންނާއި ޒުވާނުން ހައްޔަރުކުރީތީ ހިތާމަ ކުރާ ކަމަށް ނައިފަރު ދާއިރާގެ މެންބަރު އަދި ޕީޕީއެމް ގެ ނައިބު ރައީސް އަހުމަދު ޝިޔާމް ވިދާޅުވެއްޖެއެވެ.
ޝިޔާމް ކުރެއްވި ޓްވީޓެއްގައި ވިދާޅުވެފައިވަނީ "އަޅުވެތިކަމާއި ދެކޮޅަށް" ރައްޔިތުން ސުލްޙަވެރި ސައިކަލު ބުރެއް ޖަހަން އުޅުމުން އެކަން ހުއްޓުވުމަށް ޙާލަތާއި ނުބައްދަލު ބާރު ރައީސް އިބްރާހިމް މުޙައްމަދު ޞާލިޙު ވިދާޅުވެގެން ފުލުހުން ބޭނުންކޮށް، ގިނަ އަދަދެއްގެ އަންހެނުންނާއި ޒުވާނުން ހައްޔަރު ކުރީތީ ހިތާމަ ކުރައްވާ ކަމަށާއި މިހާރުން މިހާރަށް އެމީހުން ދޫކޮށްލަން ގޮވާލާ ކަމަށެވެ.
ރަސްފަންނު ސަރަޙައްދުން ފެށިގެން މަޖީދީމަގުން ބާއްވަން އުޅުނު ސައިކަލު ބުރު ފުލުހުން ހުއްޓުވާ، އޭގެެތެރެއިން 41 މީހަކު ވަނީ ފުލުހުންގެ ބެލުމުގެ ދަށަށް ގެންގޮސްފައެވެ.
އާންމު ސިއްހަތުގެ ކުއްލި ނުރައްކަލުގެ ހާލަތު ރާއްޖޭގައި އިއުލާން ކޮށްފައި ވަނިކޮށް އަދި ޑިރެކްޓާ ޖެނެރަލް އޮފް ޕަބްލިކް ހެލްތު އަންގާފައިވާ އެނގުންތަކާ ހިލާފަށް އެއްވުންތައް ނުބޭއްވުމަށާއި މިފަދައިން އެއްވުންތައް ބާއްވާ ފަރާތްތަކާއި އެފަދަ އެއްވުންތަކުގައި ބައިވެރިވާ ފަރާތްތަކަށް ފިޔަވަޅު އަޅާނެ ކަމަށް ފުލުހުން ވަނީ މިއަދު ނެރުނު ބަޔާނެއްގައި ބުނެފައެވެ.
