އެންމެ ޖަލްސާއަކުން ސަރުކާރު ގުޑައިފި: ޝާހިދު
އެ ޕާޓީން ބޭއްވި އެންމެ ޖަލްސާއަކުން މި ސަރުކާރު ގުޑައިފި ކަމަށް އިދިކޮޅު މައި ޕާޓީ، މޯލްޑިވިއަން ޑިމޮކްރެޓިކް ޕާޓީ (އެމްޑީޕީ) ގެ ރައީސް އަބްދުﷲ ޝާހިދު ވިދާޅުވެއްޖެ އެވެ.
ޝާހިދު އެހެން ވިދާޅުވީ ރައްޔިތުންގެ މަޖިލީހުގެ މިއަދުގެ ޖަލްސާގައި މަޑަވެލި ދާއިރާގެ ކޮންގްރެސް ޕާޓީގެ މެމްބަރު މުހައްމަދު ޝަމީޒް ދެއްކެވި ވާހަކަތަކާ ގުޅިގެންނެވެ.
މަޖިލިހުގެ މިއަދުގެ ޖަލްސާގައި ޝަމީޒް ވަނީ ޝާހިދުގެ އިތުރުން ކުރީގެ ރައީސް އިބްރާހިމް މުހައްމަދު ސޯލިހު އާއި އެ ޕާޓީގެ ޗެއާޕާސަން ފައްޔާޒް އިސްމާއިލް ހައްޔަރުކުރަން ގޮވާލައްވާފަ އެވެ.
ޝަމީޒް އެ ވާހަކަތައް ދައްކަވާ މަންޒަރު ހިމެނޭ ވީޑިއޯއެއް "އެކްސް" ގައި ހިއްސާކުރައްވައި މިއަދު ޝާހިދު ވިދާޅުވީ އެމްޑީޕީން ބާއްވާލީ އެންމެ ޖަލްސާއެއް ކަމަށެވެ.
ޖަލްސާ އާ ގުޅިގެން އެމްޑީޕީ ސަރުކާރުގެ އިސްވެރިން ހައްޔަރުކުރަން މަޖިލިސް ތަޅުމުގައި ސަރުކާރު މެމްބަރުން "ގޮވާ ނަގަން" ފަށާފައިވާ ކަމަށް އެމަނިކުފާނު ވިދާޅުވި އެވެ.
"އަސްލުވެސް ވަރަށް ބޮޑަށް ގުޑައިފި،" ޝާހިދު ވިދާޅުވި އެވެ.
ރޭ އެމްޑީޕީން "ފުދިއްޖެ، ފުނޑިއްޖެ" ގެ ނަމުގައި ބޭއްވި ޖަލްސާއަކީ މި ފަހުން އެ ޕާޓީން ބޭއްވި އެންމެ ބޮޑު އެއް ޖަލްސާ އެވެ. ރޭގެ ޖަލްސާގައި ޝާހިދުގެ އިތުރުން ސޯލިހު އާއި މާލެ ސިޓީގެ މޭޔަރު އާދަމް އާޒިމް ވެސް ވާހަަކަ ދެއްކެވި އެވެ.
އެމްޑީޕީގެ އިސްވެރިން ހައްޔަކުރަން ޝަމީޒް ގޮވާލެއްވީ ނިމިދިޔަ އެމްޑީޕީގެ ސަރުކާރުން ރާއްޖޭގެ ފަޅުރަށްތަކާއި ގިރިތަކާއި ޗާގޯސް ވިއްކާލިކަމުގެ ތުހުމަތު ކުރައްވާފަ އެވެ.
ޝަމީޒް މިއަދު ވަނީ އެމްޑީޕީގެ ފިކުރަކީ ނުރައްކާތެރި ފިކުރެއް ކަމަށް ވެސް ސިފަކުރައްވާފަ އެވެ.
