ހައުސިންގެ ހުރިހާ ގިންތިއަކުންވެސް މަސްވެރިންނަށް ޖާގަ އޮންނާނެ: ހައިދަރު
ހައުސިންގެ ހުރިހާ ގިންތިއަކުންވެސް މަސްވެރިންނަށް ޖާގަ އޮންނާނެ ކަމަށް ހައުސިން މިނިސްޓަރު ޑރ. އަލީ ހައިދަރު އަހްމަދު ވިދާޅުވެއްޖެ އެވެ.
ހިޔާވަހި ފައިނޭންސިން ސްކީމްގައި ބައިވެރިވުމަށް ދިމަވާ ދަތިތަކާ ގުޅޭ ގޮތުން މިއަދު ބޭއްވި ނޫސްވެރިންގެ ބައްދަލުވުމުގައި ވާހަކަދައްކަވަމުން މިނިސްޓަރު ވިދާޅުވީ އެ ލޯނު ސްކީމަކީ މަސްވެރިންނަށް ވަކި ހާއްސަ ސްކީމެއް ނޫން ކަމަށެވެ.
މިނިސްޓަރު ވިދާޅުވީ މަސްވެރިންނެކޭ އެއްފަދައިން އެހެން ސިނާއަތްތަކަށްވެސް އެ ފުރުސަތު ހުޅުވާލެވި، މިހާރު އިއުލާންކޮށްފައި އޮތް ބޯހިޔާވަހިކަމުގެ ލޯނު ސްކީމުގެ ތެރެއިން ދިނުމަށް ހަމަޖެހިފައިވާ ކަމަށެވެ.
"އާންމުގޮތެއްގައި ބޭންކުތަކުން އެބަ ބަލާ ލިބޭ އާމްދަނީއަށް. މަސްވެރިންނަށް ލިބޭ އާމްދަނީ އަކީ ތަންކޮޅެއް އިންފޯމަލް މަސައްކަތަކަށްވާތީ، ކަނޑައެޅިގެން ވަކި ތަރުތީބަކުން މަހު މުސާރައަށް ނުވަތަ އުޖޫރައެއް ދޭ ގޮތަކަށް ނޫން މި އޮންނަނީ. މަސްވެރިކަމުގެ ސިނާއަތުގައި މަސައްކަތްކުރަނީ އެ އިރެއްގައި ބޭނޭ މަހަކުން ކޮންމެސް ވަރެއްގެ މިންވަރެއް މަސްވެރިންނަށް ދޭގޮތައް. އެހެންއޮތީމަ ބޭންކުތަކުން ބަލާއިރު މިސާލަކަށް ކަނޑައެޅޭ ވަކި އަދަދެއް ކޮންމެ މަހަކު ލިބޭ ކަމަކަށް ރަޖިސްޓާ ވެފައި ނޯންނާނެ"
ހައިދަރު ވިދާޅުވީ ހިޔާވެހި ފައިނޭންސިން ސްކީމަށް ހައްލެއް ގަނައުމުގެ ގޮތުން ދަފްތަރުގައި ރަޖިސްޓްރީކުރެވި، އުޅަނދުތަކުގެ އެ ރިކޯޑުތައް ބެލެހެއްޓި މަސްވެރިންނަށް ލިބެނީ ކިހާވަރެއްކަން ޔަގީންކުރެވުނީމަ ލޯނުތަކައް އެދި ހުށަހެޅުމުގެ ފުރުސަތު ހުޅުވިގެންދާނެ ކަމަށެވެ.
އެ ނޫސްވެރިންގެ ބައްދަލުވުމުގައި ފިޝަރީޒް މިނިސްޓަރު އަހްމަދު ޝިޔާމް ވިދާޅުވީ މިދިޔަ މަހުގެ ނިޔަލަށް 350 ވެސެލްއެއްގައި 2100 އަށް ވުރެ ގިނަ ފަޅުވެރިން ރަޖިސްޓްރީވެފައި ތިބި ކަމަށް ލަފާކުރެވޭ ކަމަށެވެ.
ޝިޔާމް ވިދާޅުވީ މަސްވެރިންގެ ދަފުތަރު އެކުލަވާލައި، މަސްވެރިންނަކީ ދައުލަތް ދަންނަ ބަޔަކަށް ހަދައި، ބޭންކިން ނިޒާމުގެ ތެރެއަށް ވެއްދުމާ އަދި ތަފާތު އެކިއެކި ބޭނުންތަކަށް ދޫކުރާ ލޯނު މަސްވެރިންނަށް ވެސް ލިބޭނެ ގޮތް ހެދުމަކީ ސަރުކާރުގެ މުހިންމު ސިޔާސަތެއް ކަމަށެވެ.
އެގޮތުން ދަފްތަރެއް އެކުލަވާލައި، މަސްވެރިންގެ ހައްގުތައް ރައްކާތެރިކުރުމަކީ ގާނޫނުގައި އޮންނަ މާއްދާއެއް ކަމަށް ޝިޔާމް ފާހަގަކުރެއްވި އެވެ. އަދި އެ މާއްދާގެ ދަށުން ކުރެވޭ މަސައްކަތުގެ ތެރެއިން މިއަހަރު ނިމުމުގެ ކުރިން ދަފްތަރުގެ މަސައްކަތް ނިންމާލެވޭނެ ކަމަށްވެސް ވިދާޅުވި އެވެ.
"ހިޔާވެހި ފައިނޭންސިން ޕްރޮގްރާމް" އިފުތިތާހުކޮށްފައި ވަނީ މި މަހުގެ 5 ވަނަ ދުވަހު އިސްލާމީ މަރުކަޒުގައި ބޭއްވި ހާއްސަ ރަސްމިއްޔާތެއްގަ އެވެ.
ހިޔާވެހި ފައިނޭންސިން ޕްރޮގްރާމަކީ ތާރީހުގައި އެންމެ ހެޔޮއަގުގައި ގެދޮރުވެރި ކަމަށް ދޫކުރެވޭ ލޯނެވެ. މި ލޯނު ދޫކުރާނީ އިސްލާމީ އުސޫލުން ކަމުގައި ހައުސިން މިނިސްޓްރީން ވަނީ ފާހަގަކޮށްފަ އެވެ.
ހިޔާވެހި ސްކީމުގެ ދަށުން ފައިނޭންސިން ދޫކުރުމަށް ހަމަޖެހިފައިވަނީ ތިން ގިންތިއަކަށް ބަހާލައިގެންނެވެ. އެއީ ރަށްވެހި، ސަހަރު އަދި ފަހިމާލެ އެވެ.
