240 ބިޔަރު ދަޅާއެކު 7 މީހުން ހައްޔަރު ކޮށްފި
މާލޭގެ ގެއެއް ބަލާ ފާސްކޮށް 240 ބިޔަރު ދަޅާ އެކު 7 މީހުން ހައްޔަރު ކޮށްފިއެވެ.
ފުލުހުން ބުނީ ޑްރަގް އިންޓެލިޖެންސަށް ލިބުނު މައުލޫމާތަކާއި ގުޅިގެން މާފަންނުގައި ހުރިގެއެއް ބަލާ ފާސް ކުރި ކަމަށާއި، އެގެ ބަލާ ފާސްކުރުމުން އެގެއިން 240 ބިޔަރު ދަޅު ފެނި، 7 މީހުން މިހާރު ހައްޔަރު ކުރެވިފައިވާ ކަމަށެވެ. މިއީ އިއްޔެ ޑްރަގް އެންފޯސްމަންޓް ޑިޕާޓްމެންޓާއި، ޑްރަގް އިންޓެލިޖެންސް އާއި ގުޅިގެން ހިންގި އޮޕަރޭޝަނެއް ކަމަށްވެސް ފުލުހުން މައުލޫމާތު ދެއެވެ.
ކޯޓު އަމުރެއްގެ ދަށުން އެގެ ބަލާ ފާސްކުރުމުގައި 240 ބިޔަރު ދަޅުގެ އިތުރުން މަސްތުވާ ތަކެތި ހިމެނޭ ކަމަށް ބެލެވޭ ދެބިޑި ފެނިފައިވާ ކަމަށްވެސް ފުލުހުން ވަނީ ބުނެފައެވެ.
މި ގެ ބަލާ ފާސްކުރުމުގައި 7 މީހުން ހައްޔަރު ކުރެވިފައި ވާއިރު، އޭގެ ތެރޭގައި ހިމެނެނީ 17 އަހަރާއި 28 އަހަރާއި ދެމެދުގެ މީހުންނެވެ. ފުލުހުން މިހާރު އަންނަނީ މި މައްސަލަ ބަލަމުންނެވެ.
ރާއްޖޭގައި ދިރިއުޅޭ ބަނގުލަދޭޝް މީހެއްގެ އަތުން ދާދި ފަހުން ވަނީ ގިނަ އަދަދެއްގެ ކެނަބީސް އަތުލައިގަނެފައެވެ. އަދި މި މައްސަލަ ބަލަމުން ދާއިރު އަތުލައި ގަނެވުނު ކެނަބީސްގެ މަގުމަތީ އަގު ގާތްގަނޑަކަށް 3 މިލިއަން ދިވެހި ރުފިޔާއަށް އަރާނެ ކަމަށް މޯލްޑިވްސް ކަސްޓަމްސް އިން ލަފާކުރެއެވެ.
