ގެއަކުން ވައްކަން ކުރި ދެ މީހަކު ހައްޔަރުކޮށްފި
ހެންވޭރު ގެއަކުން ވައްކަންކުރި މައްސަލާގައި 2 މީހަކު ހައްޔަރުކޮށްފި އެވެ.
މީޑިއާތަކަށް މިއަދު ފޮނުވި މެސެޖެއްގައި ފުލުހުން ބުނީ އެ މައްސަލާގައި ހައްޔަރުކޮށްފައިވަނީ ހ. ސަމަރްގްރީންގެ/ މާލެ، އިބްރާހީމް ޒަކަރިއްޔާ (33އ) އަދި ކުރިބޯށިގެ/ ސ.ހިތަދޫ، މުހައްމަދު ޒަރީރު (36އ) ކަމަށެވެ.
ފުލުހުން ބުނީ ގެއަކުން ވައްކަންކުރި މައްސަލަ ހުށަހަޅާފައިވަނީ ބުރާސްފަތި ދުވަހު ކަމަށެވެ.
އެ ދެ މީހުން އެގެއިން ވަގަށް ނަގާފައިވާ ކަމަށް ތުހުމަތުކުރެވޭ އިލެކްޓްރޯނިކްސް ބައެއް ތަކެތި އެތަނުން އެހެން ގެއެއްގެ ތެރޭގައި ފޮރުވާފައި ހުއްޓާ ފުލުހުން ވަނީ ހޯދާފަ އެވެ.
ހޯދި ތަކެތީގެ ތެރޭގައި ލެޕްޓޮޕްތަކަކާއި، ޓެބްލެޓް ތަކަކާއި ފޯނު ތަކެއްގެ އިތުރުން އެހެން ސާމާނުތަކެއް ހިމެނޭ ކަމަށް ފުލުހުން ބުންޏެވެ.
އެ މައްސަލައާ ގުޅިގެން އެ ދެމީހުންގެ ބަންދަށް ގޮތެއް ނިންމުމަށް ކޯޓަށް ހާޒިރު ކުރުމުން 15 ދުވަހަށް ބަންދުކުރުމަށް ކްރިމިނަލް ކޯޓުން އަމުރުކޮށްފައިވެ އެވެ.
ޒަކަރިއްޔާގެ ބަންދުގެ މުއްދަތު އިއްޔެގައި ޖަހާފައިވާއިރު، ޒަރީރުގެ ބަންދުގެ މުއްދަތު ޖަހާފައިވަނީ މިއަދު އެވެ.
ފުލުހުން ބުނީ މައްސަލަ ތަހުގީގު ކުރަމުންދާ ކަމަށެވެ.
Ads by STO
