ދިވެހި ގައުމިއްޔަތުގެ އިސްވަރުގެ އޮފީސް ހުޅުވައިފި
"ދިވެހި ގައުމިއްޔަތުގެ އިސްވަރު" ގެ އަމަލީ މަސައްކަތްތައް ކުރުމަށް ގާއިމުކުރެވުނު އޮފީސް، ދިވެހި ގައުމިއްޔަތުގެ އިސްވަރުގެ އޮފީސް ރަސްމީކޮށް ހުޅުވައިފި އެވެ.
ގައުމީ ދާރުލްއާސާރުގައި އިއްޔެ ހަވީރު ބޭއްވި ރަސްމިއްޔާތުގައި ދިވެހި ގައުމިއްޔަތުގެ އިސްވަރުގެ އޮފީސް ހުޅުވައިދެއްވީ ރައީސް ޑރ. މުހައްމަދު މުއިއްޒުގެ އަނބިކަނބަލުން ސާޖިދާ މުހައްމަދެވެ.
ރަސްމިއްޔާތުގައި ދިވެހި ލެންގުއޭޖް، ކަލްޗާ އެންޑް ހެރިޓޭޖް މިނިސްޓްރީން ފާއިތުވި އަހަރު ދުވަހުގެ ތެރޭގައި ކުރި މުހިންމު މަސައްކަތްތައް ހިމެނޭ ފޮތް، "ހިދުމަތުގެ 52 ހަފުތާގެ ފޮތް" ވަނީ ނެރެފަ އެެވެ. ފޮތް ނެރެދެއްވީ ރައީސްގެ އަނބިކަނބަލުންނެވެ.
އިސްވަރުގެ އޮފީސް ހުޅުވުމުގެ ރަސްމިއްޔާތުގައި ވާހަކަ ދައްކަވަމުން ކަލްޗާ އެންޑް ހެރިޓޭޖް މިނިސްޓަރު އާދަމް ނަސީރު އިބްރާހިމް ވިދާޅުވީ ދިވެހި ގައުމިއްޔަތާ ގުޅުންހުރި ހުރިހާ އިދާރާތަކެއް ގުޅިގެން މަސައްކަތް ކުރާ ދާއިރާއަކަށް މި ދާއިރާ ބަދަލުވެގެންދާނެ ކަމަށެވެ.
މިއަދު ހުޅުވިގެންދިޔަ އޮފީހަކީ އެކަމަށް ފަހި މާހައުލަކަށް ވާނެ ކަމަށެވެ. އޮފީސް ފަރުމާ ކޮށްފައިވާ ގޮތަށް އަލިއަޅުއްވާލައްވާ ވިދާޅުވީ، އެ އޮފީހުގައި އިސްވާރުންގެ ކޮޓަރިކޮޅުތައް ހުންނާނެ ކަމަށެވެ.
ރަސްމިއްޔާތު ކުރިއަށްދިޔަ ތަން، ކަޅުއޮށްފުންމި، ދިވެހި ގައުމިއްޔަތުގެ ދަރުބާރަށް އިޝާރާތް ކުރައްވާ މިނިސްޓަރު ވިދާޅުވީ އެއީ ހުރިހާ އިދާރާތަކެއް ގުޅިގެން މަސައްކަތްކުރާނެ ތަން ކަމަށެވެ. އަދި ސްޓޭޖަކީ މަޝްވަރާތައް ބާއްވާނެ ތަން ކަމަށާއި އޮޑިޓޯރިއަމްއެއްގެ ގޮތުގައި އޮފީހުގެ ޖާގަ ބޭނުން ކުރެވެމުންދާނެ ކަމަށެވެ.
މިދިޔަ ސެޕްޓެމްބަރު މަހު ސަރުކާރުން ވަނީ އިލްމީ ދިރާސާތައް ކުރުމަށް "ދިވެހި ގައުމިއްޔަތުގެ އިސްވަރު" ގެ ނަމުގައި ކޮލެޖެއް އިފްތިތާހުކޮށްފަ އެވެ. އިސްވަރު އެކުލެވިގެންވަނީ މައިގަނޑު ފަސް ދާއިރާއެއްގެ މައްޗަށެވެ. އެއީ ދިވެހި ބަހާއި ދިވެހި ތާރީހާއި ދިވެހި ތަރިކަ އާއި ދިވެހި ސުމޭކު އަދި ދިވެހި ފަންނުގެ ދާއިރާ އެވެ. އެއިން ކޮންމެ ދާއިރާއަކަށް އިސް ބޭފުޅުން ވަނީ އައްޔަންކުރައްވާފަ އެވެ.
