ރައީސްގެ ވައުދެއް: ކާޑުގެ ޑޮލަރު ލިމިޓް 1400އަށް، ބޭރަށް ފުރާ މީހުންނަށް 1000 ޑޮލަރު
2026 ވަނަ އަހަރުގެ ފުރަތަމަ ކުއާޓާގައި ބޭންކް ކާޑުގެ ޑޮލަރު ލިމިޓް 1400 އަށް އަދި ރާއްޖެއިން ބޭރަށް ފުރާ މީހުންނަށް 1000 ޑޮލަރު ބޭންކް ރޭޓްގައި ލިބޭނެ ކަމަށް ރައީސް ޑރ. މުހައްމަދު މުއިއްޒު ވައުދުވެ ވަޑައިގެންފި އެވެ.
މިހާރު ބޭންކް ކާޑު ލިމިޓަކީ ޑެބިޓް ކާޑަކަށް 250 ޑޮލަރު އަދި ކްރެޓިޑް ކާޑަކަށް 750 ޑޮލަރެވެ. ރާއްޖެއިން ބޭރަށް ފުރަންދާ މީހުންނަށް 500 ޑޮލަރު ބޭންކް ރޭޓުގައި ލިބެއެވެ.
ރައީސް މުއިއްޒުގެ ވެރިކަަމަށް އެއް އަހަރު ފުރުމާއި ގުޅިގެން މިރޭ ބޭއްވި ރަސްމިއްޔާތުގައި ރައީސް ވިދާޅުވީ، ޑޮލަރުގެ މައްސަލަ ހައްލުކުރަން މި ސަރުކާރުން ގިނަ މަސައްކަތްތަކެއް ކުރަމުންދާ ކަމަށެވެ. އެގޮތުން ފަތުރުވެރިންގެ ބޮލަކަށް ބޭންކަށް މާރުކުރަން ޖެހޭ ގޮތަށް އިސްލާހުކުރި ގަވާއިދާއެކު، ޑޮލަރުގެ މައްސަލައަށް ބޮޑު ހައްލެއް ލިބެގެންދާނެ ކަމަށް ވިދާޅުވި އެވެ.
އެއާއެކު 2026 ގެ ފުރަތަމަ ކުއާޓަރުގައި ރާއްޖެއިން ބޭރަށް ފުރާމީހުންނަށް މިހާރު ލިބޭވަރަށް ވުރެ ބޮޑު އަދަދެއްގެ ޑޮލަރު ބޭންކު ރޭޓުގައި ލިބޭނެ ގޮތް ހަމަޖެހިގެންދާނެ ކަމަށެވެ.
".... އެ ހިސާބަށްދާއިރު (2026) އަޅުގަނޑުމެންނަށް އެބަ ފުރުސަތު ލިބޭ މި 500 ޑޮލަރުގެ ބަދަލުގައި 1000 ޑޮލަރު ބޭރަށް ފުރާއިރުގައި ގަތުމުގެ ފުރުސަތު ދޭން" ރައީސް މުއިއްޒު ވިދާޅުވި އެވެ.
އެއަށް ފަހު އެމަނިކުފާނު ވިދާޅުވީ ކްރެޑިޓް ކާޑުގެ ލިމިޓްވެސް އިތުރުކުރަން އަމާޒު ހިފާފައިވާ ކަމަށެވެ.
"އަޅުގަނޑުމެން ޖެނުއަރީން ފެށިގެން ގޮސް 2026 ވަނަ އަހަރުގެ ފުރަތަމ ކުއާޓާ ނިމޭހިސާބަށްދާއިރަށް ސަސްޓެއިން ކުރެވޭ ގޮތަށް ޑޮލަރު މާރުކުރާ ކަމަށްވަންޏާ 1400 ޑޮލަރާ ހަމަޔަށް ކްރެޑިޓް ކާޑުގެ ލިމިޓް ބޮޑުކޮށްދޭނަަންް" ރައީސް ވިދާޅުވި އެވެ.
Ads by STO
