ޓްރަމްޕްގެ ޓްވިޓާ ޕާސްވޯޑަކީ "ޔުއާރ ފަޔަރޑް"
ގެންގުޅޭ ލޮގިން އެކައުންޓެއްގެ ޕާސްވޯޑު ހަނދާން ނެތިއްޖެނަމަ އެންމެ ފުރަތަމަ ކުރަނީ ކޮންކަމެއް ހެއްޔެވެ؟ އަވަހަށް އެހެން ޕާސް ވޯޑަކަށް ބަދަލު ކުރާނީ ދޯއެވެ.
ނަމަވެސް އެމެރިކާގެ ރައީސް ޑޮނަލްޑް ޓްރަމްޕަށް މިކަހަލަ ކަމަކާއި ކުރިމަތިލާން ޖެހޭނެހެން ހިއެއް ނުވެއެވެ. އެއީ އޭނާ ޓްވިޓާގައި ގެންގުޅެނީ ފަސޭހައިން ހަނދާން ނެތޭނެ ޕާސްވޯޑަކަށް ނުވާތީއެވެ.
"ނެދަލޭންޑްސް ބޭސްޑް އެންއެލްޓައިމްސް" އިން ދާދި ފަހުން ޝާއިޢު ކޮށްފައިވާ ރިޕޯޓެއްގައި ބުނެފައިވަނީ، މީގެ ކުރިން ޓްވިޓާގައި ޓްރަމްޕް ބޭނުން ކުރި ޕާސްވޯޑެއް ލިންކްޑްއިން އިން ލީކުވި ކަމަށެވެ. އެޕާސްވޯޑަކީ "ޔުއާރ ފަޔަރޑް" ކަމަށް ވެސް ބުނެފައިވެއެވެ.
"ޔުއާރ ފަޔަރޑް" (ތިހުރީ ވަކިކޮށްފަ) އަކީ އެމެރިކާގެ ރައީސް އަށް ވުމުގެ ކުރިން ޓްރަމްޕް އެންމެ ގިނައިން ބޭނުން ކުރަމުންދިޔަ އެއް ބަހެވެ. ނުވަތަ އެއީ އޭނާގެ "އަނގަމަތީ ބަހެވެ."
ޓްރަމްޕް ގެ ޓްވިޓާ ޕާސްވޯޑް ލީކުވީ 2012 ވަނަ އަހަރު ލިންކްޑްއިން ގެ ޑޭޓާތަކަށް ޖެހުނު މައްސަލައެއްގައެވެ. އެއިރު ލިންކްޑްއިން ގައި ވެސް ޓްރަމްޕް ބޭނުންކުރީ ހަމަ އެޕާސްވޯޑު ކަމަށް ރިޕޯޓުތަކުން ބުނެއެވެ.
ޑަޗް ގެ ހެކަރުންތަކެއް ވަނީ އެއީ ޓްރަމްޕް ގެ ޓްވިޓަރ އެކައުންޓުގައި ވެސް އެޕާސްވޯޑް ބޭނުން ކުރެވޭތޯ 2016 ވަނަ އަހަރު ޓެސްޓު ކޮށްފައެވެ. ޓްރަމްޕްގެ އެކައުންޓަށް ވަދެވުމުން އެމީހުން ވަނީ ކަމާއިބެހޭ ފަރާތްތަކުގެ ސަމާލުކަމަށް އެކަން ގެނެސްފައެވެ. ހެކަރުން ބުނި ގޮތުގައި އެމީހުން އެޕާސްވޯޑް މަސައްކަތް ކުރޭތޯ ބެލީ، ޓްރަމްޕް އަށް ގެއްލުމެއް ދިނުމުގެ ނިޔަތަކު ނޫނެވެ.
Ads by STO
