އިޒުރޭލު ޕާސްޕޯޓް މަނާކުރާ ބިލު އަވަސްކުރަން ހުށަހެޅި ގަރާރު ބޭރުކޮށްލައިފި
އިޒްރޭލް ޕާސްޕޯޓުގައި ރާއްޖެއަށް އެތެރެވުން މަނާކުރަން އިމިގްރޭޝަން ގާނޫނަށް ހުށަހެޅި އިސްލާހުގެ ބިލު އަވަސްކޮށްދިނުމަށް އެދި ހުށަހެޅި ގަރާރު ބޭރުކޮށްލައިފި އެވެ.
ގަލޮޅު ދެކުނު ދާއިރާގެ އެމްޑީޕީ މެންބަރު މީކާއީލް އަހުމަދު ނަސީމް ހުށަހެޅުއްވި އެ ބިލު އަވަސްކޮށްދިނުމަށް ގޮވާލާ ގަރާރު ހުށަހެޅުއްވީ ގަލޮޅު އުތުރު ދާއިރާގެ އެމްޑީޕީގެ މެންބަރު މުހައްމަދު އިބްރާހިމެވެ.
އެ ގަރާރަށް މިއަދު ބަހުސްކޮށް ބަލައިގަތުމަށް ވޯޓަށް އެހުމުން ބިލު ބޭރުކޮށްލާފައިވަނީ 63 މެންބަރުންގެ ވޯޓުންނެވެ. ގަރާރާއެއްކޮޅަށް ވޯޓު ދެއްވީ 15 މެންބަރެކެވެ.
މުހައްމަދު އިބްރާހިމް ހުށަހެޅުއްވި ގަރާރުގައި ވަނީ އެ ބިލް ސަލާމަތީ ހިދުމަތްތަކާ ބެހޭ ކޮމިޓީ (241 ކޮމިޓީ) ގައި ހުއްޓިފައި އޮތް ސަބަބު ބަލާ, އެ ބިލުގެ މަސައްކަތް އަވަސްކުރުމަށް އެޅެން ހުރި ފިޔަވަޅުތައް ދެނެގެނެ ވީހާވެސް އަވަހަކަށް ބިލްގެ މަސައްކަތް ނިންމާ, ރައްޔިތުންގެ މަޖިލީހުން އެ ބިލް ފާސްކުރުމަށް ބާރު އަޅާ ސަރުކާރަށް ގޮވާލާފަ އެވެ.
މީގެ ފަސް މަސް ދުވަސް ކުރިން، މިދިޔަ ޖޫން މަހުގެ ކުރީކޮޅު މީކާއީލް ހުށަހެޅުއްވި ބިލު މިހާރު އޮތީ ކޮމިޓީގެ މަރުހަލާގައި ކަމަށްވާއިރު އެ ބިލުގެ މަސައްކަތް އަންނަ އަހަރުގެ ފެބްރުއަރީ މަހުގެ ނިޔަލަށް ފަސްކުރުމަށް ނިންމާފައިވެ އެވެ.
