ގާނޫނު އަސާސީއަށް ހުށަހެޅި އިސްލާހުތައް ފާސްކުރަން މަޖިލީހުގެ ޖަލްސާއެއް ހަވީރު ބާއްވަނީ
ގާނޫނު އަސާސީއަށް އިސްލާހުތަކެއް ގެންނަ ސަރުކާރުގެ ފަރާތުން ރައްޔިތުންގެ މަޖިލީހަށް ހުށަހެޅި އިސްލާހު ފާސްކުރަން މަޖިލީހުގެ ޖަލްސާއެއް މިއަދު ހަވީރަށް ތާވަލުކޮށްފި އެވެ.
މިއަދު ހަވީރު 5:30 ބާއްވާ ޖަލްސާގައި އެޖެންޑާގައި އޮތީ ސަރުކާރުގެ ފަރާތުން ހުޅުދޫ ދާއިރާގެ ޕީއެންސީ މެންބަރު މުހައްމަދު ޝާހިދު (ޝާޑު) ގާނޫނު އަސާސީއަށް އިސްލާހު ގެނައުމުގެ ބިލު ކޮމިޓީން ދިރާސާކޮށް ނިންމި ގޮތުގެ ރިޕޯޓާ، އެ ރިޕޯޓަށް ވޯޓު ނެގުމެވެ.
މިއަދުގެ ޖަލްސާއަށް ތައާރަފްކުރި އެ ބިލްގެ އިބްތިދާއީ އަޑުއެހުން ނިންމާލާފައިވަނީ 2 ގަޑިއިރު ނުވަނީހެވެ. އެއަށްފަހު 15 މިނެޓްފަހުން ބޭއްވި މުޅި މަޖިލިސް ކޮމިޓީގެ މަސައްކަތް ނިންމާލާފައިވަނީ 2 ގަޑިއިރާއި 30 މިނެޓުންނެވެ.
5 އިސްލާހެއް ހިމެނޭ އެ ބިލް ކޮމިޓީން ފާސްކޮށްފައިވަނީ 75 މެންބަރުންގެ ވޯޓުންނެވެ. އަދި ބިލް ބަލައި ނުގަތުމަށް 13 މެންބަރުން ވޯޓު ދެއްވި އެވެ.
މެންބަރުންގެ ގޮނޑި ގެއްލުން
ޝާޑު ހުށަހެޅުއްވި ބިލުގައި މެންބަރުކަމުގެ ގޮނޑި ގެއްލޭ ހާލަތްތަކެއް ބަޔާންކޮށްފައިވެ އެވެ. އެއީ މަޖިލީހަށް އިންތިހާބުވާ ސިޔާސީ ޕާޓީ އަމިއްލަ އަށް ވަކިވުން ނުވަތަ ޕާޓީން ވަކިކުރުމުގެ އިތުރުން އަމިއްލަ ގޮތުން އިންތިހާބުވާ މެންބަރަކު ޕާޓީއެއްގެ މެންބަރަކަށްވުމެވެ.
މަޖިލީހުގެ ރުހުމާއިއެކު ސިފައިން ތިބުން
މަޖިލީހުގެ މެންބަރުންގެ ޖުމްލަ އަގުލަބިއްޔަތުން ފާސްވެގެން ނޫނީ ރާއްޖޭގެ ސަރަހައްދުގައި ބޭރުގެ ސިފައިންނަަށް ނުތިބެވޭ ގޮތަށް ގާނޫނުގައި ލިޔަން އިސްލާހު ހުށަހަޅާފައިވެ އެވެ. އެއްބަސްވުމެއްގެ ދަށުން ނުވަތަ އެ ނޫންވެސް ގޮތަކަށް ބޭރުގެ ފަރާތަކަށް ރާއްޖޭގެ ސަރަހައްދުގެ އެއްވެސް ބައެއް އަސްކަރީ ބޭނުންކުރަން ހުއްދަ ދެވޭނީ މަޖިލީހުގެ ރުހުން ހޯދައިގެން ކަަމަށް ހުށަހެޅި އިސްލާހުގައިވެ އެވެ.
ކަނޑުން ސަރަހައްދެއް ދޫކޮށްލެވޭނީ މަޖިލީހުން ފާސްކޮށްގެން
ރާއްޖޭގެ ހާއްސަ އިގްތިސާދީ ސަރަހައްދަށް އެއްވެސް ބަދަލެއް ގެނެވޭނީ ނުވަތަ އެއިން ސަރަހައްދަކަށް އުނިކަމެއް އަންނަ ފަދަ ކަމެއް ކުރެވޭނީ މަޖިލީހުގެ ޖުމްލަ މެންބަރުންގެ ތިންބައިކުޅަ ދެބައިގެ އަގުލަބިއްޔަތުން ފާސްކޮށްގެން ހެދުމަށާއި، ރާއްޖޭގެ ކަނޑުގެ ސަރަހައްދަށް އެއްވެސް ބަދަލެއް ގެނެވޭނީ މަޖިލީހުގެ ޖުމްލަ މެންބަރުންގެ މަދުވެގެން ތިންބައިކުޅަ ދެބައިގެ އަގުލަބިއްޔަތުން ގާނޫނު އަސާސީގައި ލިޔަން ހުށަހަޅާފައިވެ އެވެ.
އެ މާއްދާއަށް ބާރަށު ދާއިރާގެ ޕީއެންސީ މެންބަރު އިބްރާހިމް ޝުޖާއު އިސްލާހު ހުށަހެޅުއްވީ ތިންބައިކުޅަ ދެބައިގެ އަގުލަބިއްޔަތުގެ ބަދަލުގައި ހަތަރު ބައިކުޅަ ތިންބައިގެ އަގުލަބިއްޔަތަށް ބަދަލުކުރުމަށެވެ. މުޅި މަޖިލިސް ކޮމިޓީން އެ ބިލް ފާސްވެފައިވަނީ އެ އިސްލާހާއެކު އެވެ.
ގައުމީ ތަރަައްގީގެ ޕްލޭން ރައީސަށް
ގާނޫނު އަސާސީގެ 115 ވަނަ މާއްދާގައި ބ ގައިވާ ގޮތުން ރައީސުލްޖުމްހޫރިއްޔާގެ ބާރުތަކާއި މަސްއޫލިއްޔަތުތަކުގެ ތެރޭގައި ދައުލަތުގެ މައިގަނޑު ސިޔާސަތުތައް ކަނޑައަޅައި އެ ސިޔާސަތުތައް ސަރުކާރުގެ ކަމާގުޅޭ އިދާރާތަކަށާއި މުއައްސަސާތަކަށް އެންގުމާއި، އެތަންތަނަށް ބޭނުންވާ އިރުޝާދު ދިނުމެވެ.
ޝާޑު ހުށަހެޅުއްވި ބިލުގައި އިތުރަށް ލިޔެފައިވަނީ (ކުރު ރާސްތާއަށާއި، މެދު ރާސްތައަށާއި، ދުރު ރާސްތާއަށް އަމާޒުކޮށް ގައުމީ ތަރައްގީގެ ޕްލޭންތަކާއި ތަސައްވަރުތައް އެކަށައެޅުން) އެވެ.
ރައްޔިތުންގެ ހިޔާލު ހޯދުމުގެ މާއްދާ އިސްލާހުކުރެވޭނީ ރައްޔިތުންގެ ހިޔާލުން
ގާނޫނުއަސާސީގެ 2 ވަނަ ބާބުގައި ހިމެނޭ ހައްގުތަކާއި މިނިވަންކަމުގެ ބާބާއި ރިޔާސީ އަދި މަޖިލިސް މެންބަރުންގެ ދައުރު ހިމެނޭ ގާނޫނުއަސާސީގެ މާއްދާތަކަށް އިސްލާހު ގެންނަން ރައްޔިތުންގެ ހިޔާލު ހޯދުމުގެ ވޯޓަކަށް ދާން ބުނާ މާއްދާ އިސްލާހު ކުރަން ރައްޔިތުންގެ ހިޔާލު ހޯދަން ޖެހޭ ގޮތަށް ގާނޫނުއަސާސީ އިސްލާހުކުރަން އެ ބިލުގައި ހުށަހަޅާފައިވެ އެވެ.
ކޮމިޓީ މަރުހަލާގައި ޝުޖާއު ހުށަހެޅުއްވީ ރައްޔިތުންގެ ހިޔާލު ހޯދުމުގެ މާއްދާއަށް ދިވެހިރާއްޖޭގެ ސަރަަހައްދު ހިމެނުމަށެވެ. ބިލު ފާސްވީ އެ އިސްލާހާއެކު އެވެ.
