ހައްގުތަކަށް ރައްކާތެރި ނުވެއްޖެ ނަމަ، ހެޔޮ އަމަލަކުން ކުރާނެ މަންފާއެއް ނެތް: ހުތުބާ
އިންސާނާ ކިތަންމެ ގިނަ ހެޔޮކަމެއް ކުރި ނަމަވެސް މީސްތަކުންގެ ހައްގުތަކަށް އޭނާ ރައްކާތެރި ނުވާ ނަމަ، އެ ހެޔޮ އަމަލަކުން އޭނާއަށް ކުރާނެ އެއްވެސް މަންފާއެއް ނޯންނާނެ ކަމުގައި މިއަދުގެ ހުކުރު ހުތުބާގައި ބުނެފި އެވެ.
ގިޔާމަތް ދުވަހުގެ މައްޗަށް އަލިއަޅުވާލައި ހުތުބާގައި ބުނީ އެ ދުވަހަކީ ދުންޔަވީ ހަޔާތް ނިމޭ ދުވަސް ކަމަށެވެ. މި ދުވަސް އަންނާނެ ވަގުތެއް ﷲ ފިޔަވައި އެއްވެސް ފަރާތަކަށް އެނގިގެން ނުވާ ކަމަށެވެ. އެ ދުވަހު އުޑުތަކާއި ބިންގަނޑު ފަޅައިގެންގޮސް އިރުގެ އަލި ނެތިގެންދާނެ ކަމަށެވެ. އަދި އެއްވެސް ތަރުޖަމާނަކާ ނުލައި ﷲ ކޮންމެ މީހަކާމެ ބަސް ވަހީކުރައްވާނެ ކަމަށެވެ. އެއީ ފަންސާސް ހާސް އަހަރާ އެއްވަރުގެ ދިގު ދުވަހެއް ކަމަށެވެ.
ދުންޔަވީ ހަޔާތުގެ އެންމެ ބޮޑު ހަގީގަތަކީ ލޯބިވާ މީހުންނާއި އެއްކޮށްފައިވާ ތަކެތި ދޫކޮށް، މަރުވެގެން ދާން ޖެހުން ކަމަށެވެ. އެކަމުން ފިލައިގެން ދެވޭނެ އެއްވެސް މީހަކު ނުހުންނައިރު، އާހިރަތަށް ޓަކައި ދުނިޔޭގައި އުޅޭ ބަޔަކު ކަމުގައި އަހަރެމެން ވާން ޖެހޭ ކަމުގައި މިއަދުގެ ހުތުބާގައި ފާހަގަކުރި އެވެ. ކޮންމެ ތަނެއްގައި ކޮންމެ ގޮތަކަށް މީހަކު ދުނިޔެ ދޫކޮށްފައި ވިޔަސް އެކަލާނގެ އެ މީހަކު މަހްޝަރުކުރައްވާނެ ކަމަށެވެ.
ހުކުރު ހުތުބާގައި ބުނި ގޮތުގައި މަހްޝަރު ބިމަށް ޖަމާވެފައި ތިބޭ ހިނދު، އިރު ހުންނާނީ އެ މީހުންނާ މޭލަކަށް ކައިރިކުރެވިފައި ކަމަށް ރަސޫލާގެ އަރިހުން ސައްހަ ގޮތުގައި ސާބިތުވެގެންވާ ކަމުގަ އެވެ. މި ދުނިޔެ އާ އިރާ ދެމެދު ނުވަދިހަ ތިން މިލިއަނެއްހާ މޭލު ހުންނައިރު، ހޫނުގަދަ ދުވަސްތަކުގައި އެހާމެ ހޫނުގަދައިރު، ގިޔާމަތް ދުވަހުގެ ގަދަ ހޫނުގައި ތިބެން ޖެހުމުން، އިންސާނުންގެ ހާލު ހުންނާނެ ގޮތް ތަސައްވުރު ކުރުމަށް ހުތުބާގައި ވަނީ ގޮވާލާފަ އެވެ.
އެ ދުވަހުގެ ބިރުވެރިކަމާއި ނާމާންކަމުން ނަޖާކުރައްވައި ﷲ ގެ އަރުޝީގެ ހިޔާވަހިކަން ދެއްވާ މީހުންގެ ތެރޭގައި އެކަލާނގެއަށް އަޅުކަންކުރުމުގައި ހެދިބޮޑުވަމުން އަންނަ ޒުވާނާ ހިމެނޭ ކަމުގައި ހުތުބާގައި ބުންޏެވެ. އެއީ ހެޔޮ އަމަލެއް ކުރުން ކަމަށް ވިޔަސް، ނުވަތަ ހަވާނަފުސު އެދި ގޮވާ ކަމެއް ކުރުން ކަމުގައި ވިނަމަވެސް، އެ ކަމެއް އެންމެ ފުރިހަމަ ގޮތުގައި ކުރެވޭނީ ޒުވާން އުމުރުގައި ކަމަށް ވާތީކަން ފާހަގަކުރި އެވެ.
"އެހެންކަމުން ހެޔޮކަންތައް ކުރުމަށް އަވަސްވެގަންނާށެވެ! އަދި ނުބައި ފާހިޝް ކަންކަމާ ދުރުހެލިވާށެވެ! ހަވާނަފުސުގެ މަގު ދޫކޮށް، މާތް ﷲ ގެ މަގަށް އަވަސްވެގަންނާށެވެ! ސަލާމަތުގެ މަގަކީ އެއީ އެވެ. އަރުޝީގެ ހިޔާވަހިކަން ލިބެން އޮތީ، اللهُ سُبْحَانَهُ وَتَعَالَى ގެ ހަޟުރަތުގައި ހުއްޓި ހުންނާން ޖެހޭ ހުރުމަށް ބިރުވެތިވެ ހަވާނަފުސުގެ އެދުންތަކުން ދުރުވެގަތް މީހާއަށެވެ."
މިއަދުގެ ހުތުބާގައި ބުނީ ގިޔާމަތް ދުވަހު ހިސާބު ބައްލަވައި އަމަލުތައް ވަޒަން ކުރެވޭއިރު އެއްވެސް މީހަކަށް އެއްވެސް ކަމަކުން ﷲ ބޭއިންސާފެއް ނުކުރައްވާނެ ކަމަށެވެ. ބުއްދިވެރި މީހަކީ އޭނާގެ ނަފުސު ހިސާބުކޮށް، އަމަލުތައް ވަޒަންކޮށް އެ ދުވަހަށް ތައްޔާރުވާ މީހާ ކަަމަށެވެ. އަދި ނުކުޅެދުންތެރިއަކީ ހަވާނަފުސަށް ތަބާވެ، ﷲ ގެ ހަޟްރަތުން ފޮނި އުންމީދުކުރާ މީހާ ކަމަށެވެ.
ރަސޫލާގެ ބަސްފުޅަކަށް އިޝާރާތްކުރައްވާ ހުތުބާގައި ބުނި ގޮތުގައި އިންސާނާ ކިތަންމެ ގިނަ ހެޔޮކަމަކާއިގެން ﷲ އާ ބައްދަލުކުރިޔަސް، މީސްތަކުންގެ ހައްގުތަކަށް އޭނާ ރައްކާތެރި ނުވެއްޖެ ނަމަ، އެ ހެޔޮ އަމަލަކުން އޭނާއަށް ކުރާނެ އެއްވެސް މަންފާއެއް ނޯންނާނެ ކަމުގަ އެވެ.
ގިޔާމަތް ދުވަހުން އުފާވެރިކަންހުރީ ހެޔޮ އަމަލުކޮށް އުޅުނު މީހުންނަށް ކަމަށާއި މާތް ﷲ ގެ މަގުން މޫނު އަނބުރައިލި މީހާ އެ ދުވަހުން ހިތާމަ ކުރާނެ ކަމަށް މިއަދުގެ ހުކުރު ހުތުބާގައި ފާހަގަކުރި އެވެ. ވުމާ އެކު ގޮވާލީ މާތް ﷲ އަށާއި އާހިރަތް ދުވަހަށް ފުރިހަމަ ގޮތުގައި އީމާންވާ ނަމަ، ކުރާ ކޮންމެ ކަމެއްގައި އެކަލާނގެއަށް އިހުލާސްތެރި ވުމަށެވެ.
