ބިންމައްޗަށް ވައްޓާލި ޓީޝޫކޮޅަކުން މަސްތުވާތަކެތި ފެނިގެން ހައްޔަރުކޮށްފި
ބިންމައްޗަށް ވައްޓާލި ޓީޝޫކޮޅަކުން މަސްތުވާތަކެތި ފެނިގެން މީހަކު ހައްޔަރުކޮށްފި އެވެ.
މި މައްސަލާގައި ހައްޔަރުކޮށްފައިވަނީ ތ އަތޮޅުގެ ރަށަކަށް ނިސްބަތްވާ އުމުރުން 36 އަހަރުގެ ފިރިހެނެކެވެ.
އޭނާ ހައްޔަރުކޮށް ބަންދަމެދު ގޮތެއް ނިންމުމަށް އިއްޔެ ކްރިމިނަލް ކޯޓަށް ހާޒިރުކުރުމުން 5 ދުވަހަށް ބަންދުކުރަން އަމުރުކޮށްފައިވެ އެވެ. އަމުރުގައި ބުނެފައިވަނީ 5 ދުވަހުގެ މުއްދަތެއް ބަންދަށް ދީފައިވަނީ ވަކީލެއްގެ ފުރުސަތަކަށް އެދިފައިވާތީ ކަމަށެވެ.
އަމުރުގައި ބުނެފައިވަނީ ތުހުމަތުކުރެވޭ ކޮންމެސް މިންވަރެއްގެ ހެކި ގަރީނާ ހުށަހަޅާފައިވާ ކަމަށެވެ. އެގޮތުން ފުލުހުންގެ ބަޔާން ހުށަހަޅާފައިވާ ކަން އަމުރުގައި ފާހަގަކޮށްފައިވެ އެވެ.
ފުލުހުންގެ ބަޔާނާ ހަވާލާދީ އަމުރުގައި ބުނެފައިވަނީ އެ މީހާގެ ވައަތު މުށު ތެރެއިން ބޮޑި ކޮށްލާފައި އޮތް ޓިޝޫގަނޑެއް އޭނާ ހުރި ދިމާ ބިންމައްޗަށް ވައްޓާލި މަންޒަރު ފެނުނު ކަމަށާއި އެ ޓިޝޫގަނޑުގެ ތެރެއިން މަސްތުވާތަކެތި ކަމަށް ޝައްކުކުރެވޭ އެއްޗެއް ހުރި 1 ޕެކްޓް ފެނިފައިވާ ކަމަށެވެ.
އެ މީހާއަކީ ގިނަ އަދަދެއްގެ ހައްޔަރާއި ބަންދު ލޮގް އޮތް ފަރާތަކަށްވާތީ ބަންދުން ދޫކޮށްލައިފިނަމަ ކުށް ތަކުރާރުކުރުމުގެ އިހުތިމާލު އޮތުމުން މުޖުތަމައުގެ ސަލާމަތަށް ނުރައްކަލެއް ކުރިމަތިވެދާނެ ކަމަށް އަމުރުގައި ބުނެފައިވެ އެވެ.
ބަންދާމެދު ގޮތެއް ނިންމުމަށް އެދޭ ފޯމުގައި ފުލުހުން އެދިފައިވަނީ ޑްރަގް އޮފެންޑާ ރިމާންޑް ސެންޓަރެއްގައި ބަންދުގައި ބަހައްޓައިދިނުމަށެވެ. އެހެންނަމަވެސް ފަރުވާ ބޭނުންނުވާ ކަމަށާއި މަސްތުވާތަކެތި ބޭނުންނުކުރާ ކަމަށް ބުނެ ރިމާންޑް ސެންޓަރުގައި ހުރުމަށް ދެކޮޅު ހަދާފައިވާ ކަމަށް އަމުރުގައި ބުނެފައިވެ އެވެ.
އެހެންކަމުން ކަސްޓޯޑިއަލް ޖަލެއްގައި ބަންދުގައި ބެހެއްޓުމަށް ފުލުހުންގެ ފަރާތުން އިއުތިރާޒް ނުކުރާތީ އޭނާ ބަންދުކޮށްފައިވަނީ ކަސްޓޯޑިއަލް ޖަލެއްގަ އެވެ.
