އޭސީސީ އާއި އީސީގެ މެމްބަރުންތަކެއް ވަކިކުރަން ނިންމައިފި
އެންޓި ކޮރަޕްޝަން ކޮމިޝަން (އޭސީސީ) އާއި އިލެކްޝަންސް ކޮމިޝަން (އީސީ) ގެ ފަސް މެންބަރުން ވަކިކުރަން މިއަދު ރައްޔިތުންގެ މަޖިލީހުގެ މިނިވަން މުއައްސަސާތަކާ ބެހޭ ކޮމިޓީގައި ނިންމައިފި އެވެ.
ސިއްރު ކޮށްގެން މިއަދު ކުރިއަށްދިޔަ ކޮމިޓީގައި ހިމެނިވަޑައިގަންނަވާ މެމްބަރަކު ވަނީ "ދެން" އަށް އެކަން ކަށަވަރު ކޮށްދީފަ އެވެ.
މައުލޫމާތު ލިބިފައިވާ ގޮތުން އެ ކޮމިޓީގެ ބައްދަލުވުމުގައި މަގާމުން ވަކިކުރަން ފާސްކުރީ އޭސީސީގެ ނައިބު ރައީސް އަބްދުއްސަލާމް އާއި މެންބަރު ތޯހާ މުހައްމަދު އެވެ.
އަދި އީސީގެ ނައިބު ރައީސް އަލީ ނަޝާތާއި އެ ކޮމިޝަނުގެ މެންބަރު ޑރ. މުހައްމަދު ޒާހިރު އަދި މުހައްމަދު އާސިފް ވަކިކުރަން ފާސްކޮށްފައިވެ އެވެ.
މިނިވަން މުއައްސަސާތަކުގެ ކޮމިޓީއަށް އީސީގެ ނައިބު ރައީސާއި މެންބަރުންތަކެއް ސުލޫކީ މިންގަނޑާ ހިލާފަށް އަމަލުކޮށްފައިވާ ކަމަށް ތުހުމަތުކޮށް އެ މައްސަލަ ހުށަހަޅާފައިވަނީ މިދިޔަ އޮކްޓޯބަރު މަހުގެ ތެރޭގަ އެވެ.
އޭސީސީގެ ނައިބު ރައީސް އަބްދުއްސަލާމް އާއި މެންބަރު ތޯހާ ވަކިކުރަން ހުށަހެޅީ އޭސީސީގެ ގާނޫނާއި ހިލާފަ އަމަލުކޮށްފައިވާ ކަމަށް ތުހުމަތުކޮށް އެ ކޮމިޓީއަށް ހުށަހެޅުނު މައްސަލައަކާ ގުޅިގެންނެވެ.
އެ ކޮމިޓީން ވަނީ ސިވިލް ސާވިސް ކޮމިޝަން (ސީއެސްސީ) ގެ ރައީސް މުހައްމަދު ނާސިހުގެ މައްސަލައެއްވެސް ބަލާފަ އެވެ. މައްސަލަ ބެލުމަށްފަހު، ކޮމިޓީއިން ނިންމީ ނާސިހު ވަކި ނުކުރުމަށެވެ.
މިނިވަން މުއައްސަސާތަކުގެ މެންބަރުންނަށް ތުހުމަތުކޮށް މަޖިލީހަށް ލާފައިވާ ހުރިހާ މައްސަލައެއް މިނިވަން މުއައްސަސާތަކުގެ ކޮމިޓީން ދިރާސާ ކުރަމުންދާއިރު، އެ މައުލޫމާތުތައް ސިއްރު ކުރެ އެވެ.
