ފަތުރުވެރިންނަށް މޫދުގައި ދިމާވާ އެކްސިޑެންޓުތައް ހުއްޓުވަން އަވަސް ފިޔަވަޅުތަކެއް އަޅަނީ
ރާއްޖެއަށް ޗުއްޓީ ހޭދަކުރަން އަންނަ ފަތުރުވެރިންނަށް މޫދުގައި ދިމާވާ އެކްސިޑެންޓްތައް ހުއްޓުވަން އަވަސް ފިޔަވަޅުތަކެއް އެޅުމަށް ނިންމައި، ފަތުރުވެރިންނަށް މޫދު ކުޅިވަރާއި މޫދާ ގުޅުންހުރި އެކްސްކާޝަން ހިދުމަތްތައް ދިނުމާ ބެހޭ ސަލާމަތީ މިންގަނޑުތަކެއް ޓޫރިޒަމް މިނިސްޓްރީން އެކުލަވާލައި އަމަލުކުރަން އަންގައިފި އެވެ.
ފަތުުރުވެރިންނަށްދޭ ހިދުމަތްތަކުގެ ތެރޭގައި މޫދާ ގުޅުންހުރި ހަރަކާތްތަކާ ގުޅިގެން ގިނަ އެކްސިޑެންޓުތަކެއް ހިނގައި ފުރާނައަށް ގެއްލުންވާ ފަދަ ހިތާމަވެރި ހާދިސާތަކެއް ވަނީ ހިނގާފަ އެވެ. އެފަދަ ހާދިސާތައް ދިމާވެފައި ވަނީ މޫދު ކުޅިވަރުތަކާ އަދި ހަމަޖައްސައިދެވޭ އެކިއެކި މޫދާ ގުޅުންހުރި އެކްސްކާޝަންތައް ކުރިއަށް ގެންގޮސްފައިވާއިރު ކަމަށް މިނިސްޓްރީން ބުނެ އެވެ.
މިފަހުން އދ. ދިގުރަށް ކައިރިއަށް ފީނަންގޮސް ދޯނިން މޫދަށް ފުންމާލި ވަގުތު ދޯނީގެ ބުރަފަތީގައި ޖެހި އުމުރުން 15 އަހަރުގެ އަންހެން ކުއްޖެއް މަރުވެފަ އެވެ. އެއީ ފެހުރިއްސާ ބެހޭ ދިރާސާއެއް ހެދުމަށް "ސްޓަޑީ ޓުއާ" އެއް ގައި އެ ރަށަށް ގޮސް އުޅުނު ސިންގަޕޫރު ޓީމެއްގައި ހިމެނުނު ކުއްޖެކެވެ. އެ ހާދިސާގެ އިތުރުން މިދިޔަ މަހު 2 ފަތުރުވެރިއަކު ގެނބިގެން މަރުވެފައިވެ އެވެ.
ފަތުރުވެރިންނަށް މޫދު ކުޅިވަރުގެ ހިދުމަތް ދިނުމާ ބެހޭ ސާކިއުލާ ޓޫރިޒަމް މިނިސްޓްރީން ޓޫރިސްޓް ގެސްޓްހައުސްތަކާއި ހޮޓާތަކަށާއި މީހުން ދިރިއުޅޭ ރަށްރަށުގައި ހިންގާ ފީނުމުގެ ހިދުމަތްދޭ ތަންތަނަށާއި ހޯމްސްޓޭތަކަށާއި ޓޫރިސްޓް އުޅަނދު ހިންގާ ފަރާތްތަކުގެ އިތުރުން ލޯކަލް ގަވަމަންޓް އޮތޯރިޓީ އަދި އަތޮޅު ކައުންސިލް އިދާރާތަކާއި ރަށު ކައުންސިލްތަކަށް ފޮނުވާފައި ވަނީ މިދިޔަ ބުރާސްފަތި ދުވަހު އެވެ.
ޓޫރިޒަމް މިނިސްޓްރީން ބުނީ މޫދު ކުޅިވަރުގެ ހިދުމަތް ދިނުމާ ބެހޭ ސަލާމަތީ މިންގަނޑުތަކެއް އެކުލަވާލީ ރާއްޖެއަށް ޒިޔާރަތްކުރާ ފަތުރުވެރިން މޫދު ކުޅިވަރުގެ އަދި މޫދާ ގުޅުންހުރި އެކްސްކާޝަންތައް ހަދާއިރު ރައްކާތެރިކަމުގެ ގޮތުގައި އެ ކަންކަން ކުރުމަށާއި އެފަދަ ހިދުމަތްދޭ ތަންތަނާއި އެ ފަރާތްތަކުގެ ޒިންމާތައް ކަނޑައެޅުމަށް ކަމަށެވެ.
ފަތުރުވެރިން އެކްސްކާޝަންތައް ހަދާއިރު ރައްކާތެރި ގޮތުގައި އެ ކަންކަން ކުރުމަށާއި އެފަދަ ހިދުމަތްތައްދޭއިރު، ޒިންމާތައް ކަނޑައެޅި ކަންކަން ކުރާނެ ގޮތުގެ ގަވާއިދެއް ވަރަށް އަވަހަށް އެކުލަވާލާނެ ކަމަށް އެ މިނިސްޓްރީން ވަނީ ބުނެފަ އެވެ. ގަވާއިދު އެކުލަވާލައި ގެޒެޓު ކުރުމުގެ ކުރިން ސާކިއުލާގައިވާ ސަލާމަތީ މިންގަނޑުތަކަށް އަމަލު ކުރުމަށް ޓޫރިޒަމް މިނިސްޓްރީން އެދެ އެވެ.
މޫދުކުޅިވަރުގެ ހިދުމަތް ދިނުމާ ބެހޭ ސާކިއުލާގައި ފާހަގަކޮށްފައިވާ މިންގަނޑުތައް:
- ކުޅިވަރުގެ ހަރަކާތެއް ފެށުމުގެ ކުރިން ހަރަކާތާ ގުޅޭ ސަލާމަތީ ކަންކަމުގެ މައުލޫމާތު ބައިވެރިންނަށް ދިނުން
- ކަމަށް ބޭނުންކުރާ އާލާތްތަކަކީ ސަލާމަތީ މިންގަނޑުތަަކަށް ފެތޭ ތަކެއްޗަށްވުން. ތަކެތި ބޭނުންކުރަން ކަނޑައަޅާފައިވާ ގޮތް ނޫން ގޮތްގޮތަށް ބޭނުން ނުކުރުން
- ސަރަހައްދު ވަކި ކޮށްގެން ހިންގިދާނެ މޫދު ކުޅިވަރުތައް، އެ ކުޅިވަރެއް ހިންގުމަށް ކަނޑައެޅިފައިވާ ސަރަހައްދުގައި ހިންގުން
- ފަތަން ނުދަންނަ ފަތުުރުވެރިއަކު ކުޅިވަރުތަކުގައި ބައިވެރިވާ ނަމަ، ލައިފް ޖެކެޓް އަޅުވައިގެން ބައިވެރިކުރުން
- މޫސުމަށް އަންނަ ބަދަލުތަކާ މެދު ސަމާލުވުން. މޫސުން ގޯސްވެދާނެ ކަމަށް ލަފާދީފި ނަމަ ނުވަތަ ކުޅިވަރު ހިންގާ ވަރަށް ވުރެ މޫސުން ގޯސްވެއްޖެ ކަމަށް އިންސްޓްރަކްޓަރަށް ފެނިއްޖެ ހާލަތެއްގައި ކުޅިވަރު މެދުކަނޑާލުން
- ކޮންމެ ދުވަހެއްގެ ވެސް މޫސުމުގެ މައުލޫމާތު ބައިވެރިންނަށް ދިނުން
- މޫސުމަށް އަންނަ ބަދަލު އަންގައިދިނުމަށް މެޓު އޮފީހުން ކަނޑައަޅާފައިވާ ކަލަ ކޯޑު ދިދަ ނުވަތަ ސާފަސް ބެލޫން ފަދަ ތަކެތި ބޭނުން ކުރެވިދާނެ
- އިންސްޓްރަކްޓަރާއި މޫދު ކުޅިވަރު ސެންޓަރާ ދެމެދު މުއާމަލާތު ކުރެވޭނެ މުއާސަލާތީ ވަސީލަތެއް އިންސްޓްރަކްޓަރުގެ އަތުގައި ނުވަތަ ބޭނުންކުރެވޭ ފަދަ ތައްޔާރީ ހާލަތެއްގައި އޮތުން
- ކުޅިވަރުތަކުގައި ބައިވެރިވާ ފަރާތްތަކުގެ މައުލޫމާތު ހިމެނޭ ލޮގެއް ބެލެހެއްޓުން
- ރާވައިގެން ހިންގާ ކުޅިވަރުތަކުގައި ބައިވެރިވާ ފަރާތްތަކުގެ ސިއްހީ ހާލަތާ ބެހޭ އިގުރާރު ފޯމު ފުރުވައި ސޮއިކުރުވުން
- އުމުރުން 16 އަހަރު ނުފުރޭ ކުދިން ކުޅިވަރުތަކުގައި ބައިވެރިވާ ނަމަ އިގުރާރުގައި ބެލެނިވެރިޔާ ލައްވާ ސޮއިކުރުވުން
ޓޫރިޒަމް މިނިސްޓްރީން އެކުލަވާލި މި މިންގަނޑުތަކަށް މި މަހުގެ 21 ވަނަ ދުވަހުން ފެށިގެން ވަނީ އަމަލުކުރަން ފަށާފަ އެވެ.
ފަތުރުވެރިކަމުގެ ޕީކް ސީޒަނާ ކުރިމަތިލާއިރު، ރާއްޖެއަށް ޒިޔާރަތްކުރާ ހުރިހާ ފަތުރުވެރިންގެ ސަލާމަތާއި ރައްކާތެރި ކަމަށް ކުރެވެން ހުރި ހުރިހާ ކަމެއް ކުރުމަށާއި މޫދާ ގުޅުންހުރި އެކްސްކާޝަންތަކުގެ ތެރެއިން ދިމާވާ ހިތާމަވެރި ހާދިސާތައް ތަކުރާރުވިޔަ ނުދިނުމަށް އެއްބާރުލުންދޭން މިނިސްޓްރީން ވަނީ އިލްތިމާސްކޮށްފަ އެވެ.
