ރޭސް ކާރު އެކްސިޑެންޓް: އިކްރާމް ދައުވާތަކަށް އިއުތިރާފްވެއްޖެ

މިދިޔަ ޖުލައި 31 ވަނަ ދުވަހު ހުޅުމާލެ ފޭސް 2 ގައި ބާރު ސްޕީޑްގައި ދުއްވި ރޭސް ކާރެއް ކޮންޓްރޯލްނުވެ, ސައިކަލެއްގައި މަޑުކޮށްގެން އިން މީހެއްގެ ގައިގައި ޖެހި ހިނގި ނުރައްކާތެރި އެކްސިޑެންޓުގެ މައްސަލާގައި ދައުވާކުރި މ. ލޭންޑްއޮފްގާޑްން, އިބްރާހީމް އިކްރާމް ދައުވާތަކަށް އިއުތިރާފުވެއްޖެ އެވެ.

Ads by MWSC

އެ މައްސަލާގައި އިކްރާމްގެ އިތުރުން ދައުވާކުރި ހ. ނޫރަންމާގެއާއެ, އިކްރާމުއްރަހްމާނާއި ގއ. ކަނޑުހުޅުދޫ, އާޒާދުގެ, ޖިނާހު އިސްމާއީލެވެ.

އެ މައްސަލާގައި މިއަދު ކްރިމިނަލް ކޯޓުގައި ކުރިއަށްދިޔައަ އަޑުއެހުމުގައި ދައުވާތަކަށް ޖަވާބުދާރީވުމުގެ ފުރުސަތު ދީފައިވެ އެވެ.

އަދި ހުލާސާ ބަޔާން އިއްވުމާ ހަމައަށް އިއުތިރާފުވުމުގެ ފުރުސަތު އޮތް ކަމަށް އެ މައްސަލަ ބައްލަވާ ގާޒީ, އަލީ ނަދީމް ވިދާޅުވި އެވެ. އެއަށްފަހު އެ ދައުވާތަކަށް އިއުތިރާފްވާ ކަމަށް އިކްރާމްގެ ފަރާތުން ބުނެފައިވެ އެވެ.

ދައުވާތަކަށް އިކްރާމް އިއުތިރާފްވީ ނަމަވެސް އެ މައްސަލާގައި ދެން ދައުވާކުރި އިކްރާމުއްރަހްމާނާއި ޖިނާހު ވަނީ ދައުވާތަކަށް އިންކާރުކޮށްފަ އެވެ.

އިކްރާމް އިއުތިރާފްވުމާ ގުޅިގެން ގާޒީ ނަދީމް ވިދާޅުވީ އިކްރާމްގެ މައްސަލަ ކުރިއަށް ގެންދާނީ އަވަސްނިޔާއިން ކަމަށެވެ.

އެ 3 މީހުންވެސް ތިބީ ޝަރީއަތް ނިމެންދެން ބަންދުކޮށްފަ އެވެ. ނަމަވެސް މިއަދުގެ އަޑުއެހުމުގައި ބަންދު މުރާޖާ ކުރުމަށް ދެ ފަރާތުން ދެއްކި ވާހަކަތަކަކަށްފަހު އިކްރާމުއްރަހުމާން ޝަރީއަތް ނިމެންދެން ބަންދުކުރަން ކުރި އަމުރު ބާތިލުކޮށް, އޭނާ ދޫކޮށްލި އެވެ.

އިކްރާމުއްރަހްމާންގެ ވަކީލު ބުނެފައިވަނީ އޭނާ އެ ދުވަހު އެ ކާރަށް އެރީ ފަސިންޖަރެއްގެ ގޮތުގައި އާއިލާ މީހެއްގެ ގެއަށް ދިއުމަށް ކަމަށާއި އެ އެކްސިޑެންޓްގެ ޒިންމާ އޭނާ ނަގަން ނުޖެހޭނެ ކަމަށެވެ. އޭނާ ދޫކޮށްލާފައިވަނީ މުޖުަމައުގެ އެހެން މީހަކަށް އޭނާގެ ފަރާތުން ނުރައްކަލެއް އޮތް ކަމަށް ނުފެއްނަކަމަށް ބުނެ އެވެ.