ޑްރަގު ފަރުވާއަށް ޒަކާތު ފަންޑުން ހޭދަކުރަން ޖެހޭނެތޯ ދިރާސާ ކުރަން ޖެހޭ: ޝަހީމް
މަސްތުވާތަކެތީގެ އަޅުވެތިކަމުގައި ޖެހިފައި ތިބި މީހުންނަށް ޒަކާތުގެ ބެހެނިވެރިންގެ ތެރޭގައި ހިމެނޭ އަޅުން މިނިވަން ކުރުމުގެ ބައިން ހަރަދު ކުރަން ޖެހޭނެތޯ ބެލުމަށް އިލްމީ ގޮތުން ދިރާސާ ކުރަން ޖެހޭ ކަމުގައި އިސްލާމިކް މިނިސްޓަރު މުހަައްމަދު ޝަހީމް އަލީ ސައީދު ވިދާޅުވެއްޖެ އެވެ.
ދިވެހިރާއްޖޭގެ ޒަކާތު ހައުސްއިން އިންތިޒާމްކޮށްގެން ރާއްޖޭގައި ފުރަތަމަ ފަހަރަށް ބާއްވާ ބައިނަލްއަގުވާމީ ޒަކާތު ކޮންފަރެންސް، އިންޒެކް 2024 ފަށާފައި ވަނީ މިއަދު ހެނދުނު އެވެ.
ކޮންފަރެންސް ފެށުމުގެ ގޮތުން އިސްލާމީ މަރުކަޒުގެ ޖަލްސާކުރާ މާލަމުގައި ބޭއްވި ރަސްމިއްޔާތުގައި ވާހަކަ ދައްކަވަމުން ޝަހީމް ވިދާޅުވީ މި ޒަމާނުގެ ޒަރޫރީ ހާޖަތްތައް އިތުރުވެފައިވާ ކަމަށެވެ. މި ޒަމާނުގައި މިނިވަން ކުރާނެ އަޅުން ނެތް ކަމަށެވެ.
"ނަމަވެސް އަޅުން މިނިވަން ކުރުމުގެ މަފްހޫމު މި ޒަމާނުގައި ފުޅާކޮށްފި ކަމުގައި ވަނީ ނަމަ، މަސްތުވާތަކެތީގެ އަޅުވެތިކަމުގައި ޖެހިފައި ތިބި މީހުންނަށް ޒަކާތުގެ އަޅުން މިނިވަން ކުރުމުގެ ބައިން ހަރަދު ނުކުރެވެންވީ ކީއްވެތޯ އިލްމީ ގޮތުން ދިރާސާކޮށްލަން ޖެހޭ ކަމެއް މި ކަމަކީ މިއީ،" ޝަހީމް ވިދާޅުވި އެވެ.
އޭގެ އިތުރުން އަސީރުންގެ ގޮތުގައި ތިބި މީހުން މިނިވަން ކުރުމަށާއި ރަހީނުކޮށްފައިވާ މީހުން ސަލާމަތް ކުރުމަށް ހަރަދު ނުކުރެވެންވީ ކީއްވެތޯ ވެސް ދިރާސާކުރަން ޖެހޭ ކަމަށެވެ.
ހަމައެގޮތަށް ޖިހާދު ކުރުމުގެ މަފްހޫމު މިއަދު ވަނީ ވަރަށް ބޮޑަށް ފުޅާވެފައިކަން ފާހަގަކުރެއްވި އެވެ. އިސްލާމީ މުޖުތަމައުތަކަށް ކުރިމަތިވެފައި ހުރި ހަނގުރާމަތަކަކީ ހަމައެކަނި އަސްކަރީ ހަނގުރާމަތަކެއް ނޫން ކަމުގައި ވިދާޅުވި އެވެ. ފިކުރީ، ސަގާފީ އަދި އިޖުތިމާއީ ހަނގުރާމަތަކާ މުޖުތަމައުތަކުން ކުރިމަތިލާން ޖެހިފައިވާ ކަމަށެވެ.
"އެހެންވީމާ ﷲ ގެ މަގުގައި ޖިހާދު ކުރުމުގެ މަފްހޫމް، ޒަކާތުން ހަރަދު ކުރަންވީ ހަމައެކަނި ހަނގުރާމައިގެ މައިދާނަށްތޯ ނުވަތަ އިސްލާމީ އުންމަތަށް ކުރިމަތިވެފައި ހުރި ފިކުރީ އަދި ސަގާފީ އަދި އިޖުތިމާއީ ހަނގުރާމަތަކާ ކުރިމަތިލާން ފީސަބީލިﷲ ގެ ބައި އަޅުގަނޑުމެންނަށް ބޭނުން ނުކުރެވޭނެތޯ އޭ،" ޝަހީމް ވިދާޅުވި އެވެ.
އެކަމުގެ މައްޗަށް އިލްމީ ގޮތުން ބަހުސްކޮށް، ބެހެނިވެރިންގެ މަފްހޫމް ފުޅާކުރަން ޖެހޭ ކަމަށެވެ.
މިނިސްޓަރު ވިދާޅުވި ގޮތުގައި ޒަކާތުގެ ފައިސާއިން އަޅުން މިނިވަން ކުރުމަށް ރާއްޖޭގައި ހޭދަކޮށްފައިވާކަން ތާރީހުން އެނގެން ނެތް ކަމުގަ އެވެ. އެހެންނަމަވެސް ރާއްޖޭގެ ދީނީ ކަންކަން ބެލެހެއްޓި އިދާރާތަކުން ނެރެފައިވާ ފޮތްތަކުގައި ޒަކާތުގެ ބެހެނިވެރިންގެ ތެރޭގައި އަޅުން މިނިވަން ކުރުމަށް ބައެއް އޮންނަ ކަމާއި އެބައިގެ ފިގުހީ ހުކުމްތަކުގެ ވާހަކަ ގެނެސްފައިވާ ކަމުގަ އެވެ.
ޒަކާތުގެ ބެހެނިވެރިންގެ އުސޫލަށް 2009 ވަނަ އަހަރު ގެނެވުނު ބަދަލުތަކުގައި އަޅުން މިނިވަންކުރަން، އާޔަތުގައި ބަޔާންކޮށްފައިވާ ބައިން މަސްތުވާތަކެތީގެ ޝިކާރައަކަށްވެފައިވާ ފަރާތްތަކަށް ފަރުވާ ކުރުމަށް ހަރަދު ކުރުމަށް ނިންމުނު ކަމުގަ އެވެ. އޭރުގެ އިސްލާމިކް މިނިސްޓްރީން ނެރުނު ސާކިއުލާ އާ ހަވާލާދީ ޝަހީމް ވިދާޅުވީ އެ ނިންމުން އިތުރަށް ދިރާސާ ކުރުމަށް ތަންފީޒުކޮށްފައި ނުވާ ކަމަށެވެ.
މައްސަލައަކީ އެ މައްސަލައަކާ މެދު އިލްމީ ބަހުސެއް ކުރެވެމުންދާ މައްސަލައެއް ކަމަށެވެ. މިއަދު ފެށި ކޮންފަރެންސްގެ ތެރޭގައި ބަހުސް ކުރުމަކީ ރަނގަޅު ކަމެއް ކަމުގައި ފާހަގަކުރެއްވި އެވެ.
"ހަށިވިއްކުމާ މި ބާވަތުގެ ކަންކަމުގައި އެކި ތަންތަނުގައި ކަސްތޮޅު އެޅިފައި ތިބި މީހުން. ދުނިޔޭގެ މާއްދީ އެދުމުގައި ތިބޭ މީހުން. އެ އަޅުވެތިކަމުގެ ތެރެއަށް އެ މީހުން ގޮސްފައި އެ ވަނީ މާލީ ގޮތުން އެ މީހުންނަށް ދިމާވެފައިވާ ދަތިކަމުގެ ސަބަބުން،" ޝަހީމް ވިދާޅުވި އެވެ.
އެކަމުން އެ މީހުން ސަލާމަތް ކުރުމަށް ޒަކާތުގެ ފައިސާއިން ހަރަދު ކުރެވިދާނެތޯ އިލްމީ ގޮތުން ބަހުސް ކުރެވިދާނެ ކަމަށް ވިދާޅުވި އެވެ. އޭނާއަށް ފެނިވަޑައިގަންނަވާ ގޮތުގައި އެ ކަންކަން އެގޮތަށް ކުރެވިދާނެ ކަމަށެވެ.
"އިލްމީ ޖަމާއަތަކުން އެކަން ނިންމަން ޖެހޭނީ. ފަތުވާ ކައުންސިލް ފަދަ ތަނަކުން،" ޝަހީމްގެ ވާހަަކައިގައި ވިދާޅުވި އެވެ.
ބައިނަލްއަގުވާމީ ޒަކާތު ކޮންފަރެންސްގެ މަގުސަދުތަކުގެ ތެރޭގައި ރާއްޖޭގައި ގާއިމުކުރެވިފައިވާ ޒަކާތުގެ ނިޒާމު ކުރިއެރުވުން ހިމެނޭއިރު، ކޮންފަރެންސްގައި އިލްމުވެރިންނާއި އެ މަސައްކަތުގައި އުޅޭ މީހުންނާއި ސިޔާސަތުތައް ކަނޑައަޅާ ފަރާތްތަކާ އަދި މުޖުތަމައުގެ އިސްވެރިން ބައިވެރިވެ އެވެ.
އިސްލާމިކް މިނިސްޓްރީން ބުނީ އެ ފަރާތްތައް ގުޅިގެން އިޖުތިމާއީ ދުޅަހެޔޮކަމާއި އިގުތިސޯދީ ހަމަޖެހުމަށް މުހިންމު ވަސީލަތެއްގެ ގޮތުގައި ޒަކާތުގެ ހިންގުން ހަރުދަނާކޮށް، ހަރުދަނާކަން އިތުރުކުރެވޭނެ އިސްތިރާޖުތައް ދެނެގަތުމަށް ހަމަޖެހިފައިވާ ކަމަށެވެ.
ކޮންފަރެންސްގައި ރާއްޖޭގެ އެކި މުއައްސަސާތަކުންނާއި މެލޭޝިޔާގެ ބައެއް އިންސްޓިޓިއުޝަންތަކުން ބައިވެރިވާއިރު، ޕެނެލިސްޓުންގެ ގޮތުގައި ރާއްޖޭގެ މަޝްހޫރު ދީނީ އިލްމުވެރިންނާއި އިސްލާމިކް ފައިނޭންސް އާއި އިގުތިސޯދީ ދާއިރާގެ މާހިރުން ބައިވެރިވެ އެވެ.
