އެފްޑީސީން 13،000 ހައުސިން ޔުނިޓު އަޅަނީ
މާލެ ސަރަހައްދުގައި 13،000 ހައުސިން ޔުނިޓު އެޅުމަށް މަސައްކަތް ކުރަމުންދާ ކަމަށް ފަހި ދިރިއުޅުން ކޯޕަރޭޝަން (އެފްޑީސީ) ގެ މެނޭޖިން ޑިރެކްޓަރު ހަމްދާން ޝަކީލް ވިދާޅުވެއްޖެ އެވެ.
ސަރުކާރުގެ "ގެދޮރުވެރިޔާ" މަޝްރޫއުގެ ދަށުން ހުޅުމާލެ ދެވަނަ ފިޔަވަހީގައި 4،000 ފްލެޓު އެޅުމުގެ މަސައްކަތް އެފްޑީސީން އަންނަނީ ކުރަމުންނެވެ. އިންޑިއާގެ ދެ ކުންފުންޏަކާ ހަވާލުކޮށްގެން 2021 ވަނަ އަހަރު ފެށި އެ މަޝްރޫއުގެ ދަށުން ޖުމްލަ 32 ޓަވަރު އިމާރާތް ކުރާއިރު، އޭގެ ތެރޭގައި ހިމެނޭ "އަމާން އުދަރެސް" ގެ 16 ޓަވަރުގެ މަސައްކަތް ކުރަނީ ކަލްޕަޓަރު ޕްރޮޖެކްޓްސް އިންޓަނޭޝަނަލް ލިމިޓެޑް (ކޭޕީއައިއެލް) އިންނެވެ. "އަމާން ދޯދި" ގެ 16 ޓަވަރު އަޅަނީ ނެޝަނަލް ބިލްޑިންގްސް ކޮންސްޓްރަކްޝަން ކޮމްޕެނީ (އެންބީސީސީ) އިންނެވެ.
އެފްޑީސީގެ މަސައްކަތްތަކާ ގުޅޭގޮތުން ދައުލަތުގެ މީޑިއާއަށް މައުލޫމާތު ދެއްވަމުން ހަމްދާން ވިދާޅުވީ މިދިޔަ އެއް އަހަރު ދުވަހުގެ ތެރޭގައި 3 ފްރޭމްވޯކް އެގްރިމެންޓުގައި ސޮއިކޮށްފައިވާ ކަމަށެވެ. އެގޮތުން މި އަހަރުގެ ކުރީކޮޅު ސްރީ ލަންކާގެ ކުންފުންޏަކާ އެކު 3،000 ހައުސިން ޔުނިޓު އެޅުމުގެ އެގްރިމެންޓެއްގައި ސޮއިކޮށްފައިވާ ކަމަށެވެ.
އެ މަޝްރޫއަށް ބޭނުންވާ ފައިނޭންސް ހޯދުމުގެ މަސައްކަތް މިހާރު ކުރަމުން އަންނަ ކަމަށެވެ. މީގެ ދެ ހަފުތާއެއްހާ ދުވަސް ކުރިން ޕްރޮޖެކްޓަށް ބޭނުންވާ އިންޝުއަރެންސްގެ މަސައްކަތްތައް ކުރިއަށްދާ ކަމަށް އެ ކުންފުނިން މައުލޫމާތު ދީފައިވާ ކަމަށެވެ.
"އޭގެ އިތުރުން މީގެ ދެ ހަފުތާއެެއް ކުރިން އަޅުގަނޑުމެން ވާނީ ބޭރުގެ 2 ކުންފުންޏަކާ އެކީ ޖުމްލަ 10،000 ސޯޝަލް ހައުސިން ޔުނިޓު ތަރައްގީކުރަން ވަރަށް ބޮޑެތި ކުންފުނިތަކަކާ އެކީ ފްރޭމްވޯކް އެގްރިމެންޓެއްގައި ސޮއިކުރެވިފައި،" ހަމްދާން ވިދާޅުވި އެވެ.
އެފްޑީސީގެ މެނޭޖިން ޑިރެކްޓަރު ވިދާޅުވި ގޮތުގައި ކުރިއަށް އޮތް މަސް ދުވަހުގެ ތެރޭގައި އެކަމަށް ބޭނުންވާ ފައިނޭންސިން ޑޮކިއުމެންޓްސްތައް ލިބި މަޝްރޫއުގެ ފެށުމުގެ ހުއްދައަށް އެދި އިކޮނޮމިކް ކައުންސިލަށް ފޮނުވޭވަރު ވާނެ ކަމުގަ އެވެ. މަޝްރޫއުތައް ކުރިއަށް ގެންދާނީ ބޭރުގެ ފައިނޭންސިން އެޖެންސީތަކުން ލޯނު ނަގައިގެން ކަމަށެވެ.
"ކުރިއަށް އޮތް ހަތަރު މަސް ދުވަހުގެ ތެރޭގައި އެ ޕްރޮޖެކްޓް ލޯންޗްކުރަން. ބިންގާ އަޅާ ހިސާބަށް، ޕްރޮޖެކްޓް ލޯންޗްކުރަން ހަތަރު މަހަށް ޓާގެޓްކޮށްގެން މަސައްކަތް ކުރަނީ،" ހަމްދާން ވިދާޅުވި އެވެ.
މި ފެށޭ އަހަރު މާލެ ސަރަހައްދާއި އަތޮޅު ތެރޭގައި 27،000 އަށް ވުރެ ގިނަ ހައުސިން ޔުނިޓު އަޅަން ފަށާނެ ކަމަށް ރައީސް ޑރ. މުހައްމަދު މުއިއްޒު ވިދާޅުވެފައިވެ އެވެ. އޭގެ ތެރެއިން 15،000 ހައުސިން ޔުނިޓު މާލެ ސަރަހައްދުގައި އަޅާއިރު، ރަށްރަށުގައި 12،940 ޔުނިޓު އެޅުމަށް ވަނީ ނިންމާފަ އެވެ.
ޙުސް ދޮގު