ހަނގުރާމަ ހިނގާ ގައުމުތަކުގެ މީހުން ލިޔުން ފޯޖުކޮށްގެން ރާއްޖެ އެތެރެވާން އުޅޭ: ޝަމްއާން
ހަނގުރާމަ ހިނގަމުންދާ ގައުމުތަކުގެ މީހުން ވެސް ފޯޖުކޮށްފައިވާ ލިޔެކިޔުންތައް ބޭނުންކޮށްގެން ރާއްޖެއަށް އެތެރެވުމަށް މަސައްކަތްކުރާ ކަމަށް ކޮންޓްރޯލާ ޖެނެރަލް އޮފް އިމިގްރޭޝަން މުހައްމަދު ޝަމްއާން ވަހީދު ވިދާޅުވެއްޖެ އެވެ.
ދާދި ފަހުން ފެށި 'އެމްއެމްޓީވީ'ގެ ޕްރޮގްރާމެއްގައި ވާހަކަ ދައްކަވަމުން ޝަމްއާން ވިދާޅުވީ ފަތުރުވެރިއެއްގެ ގޮތުގައި ރާއްޖެއަށް ޒިޔާރަތްކުރާ މީހުން ދުރާލާ ވިސާ ނަގަން ނުޖެހޭއިރު، ރާއްޖެއަަށް މަސައްކަތްކުރަން އަންނަ މީހުންނަށް ވޯކް ޕާމިޓް ދޫކުރާ ކަމަށެވެ. މިވަގުތު އެ މަސައްކަތް ކުރަނީ ހޯމް މިނިސްޓްރީން ކަމަށެވެ.
"ވޯކް ޕާމިޓެއް ނެތި ރާއްޖެއަށް އެތެރެވާން އެ ފުރުސަތު ހޯދަން މި އަންނަނީ ޓޫރިސްޓެއްގެ ގޮތުގައި. ޓޫރިސްޓް ވިސާއަށް މި މީހުން ޝަރުތު ހަމަވޭތޯ ނޫނީ އިމިގްރޭޝަން ރިކުއަމަންޓް ހަމަވޭތޯ އަޅުގަނޑުމެންގެ ބޯޑަރުން ވަރަށް ރަނގަޅަށް ބަލާނެ،" ޝަމްއާން ވިދާޅުވި އެވެ.
ރާއްޖެއަށް މީހުން ޒިޔާރަތްކުރާ ގައުމުތަކުގެ ތެރެއިން އިތުރަށް ސަމާލުކަންދޭ ގައުމުތައް ހުންނަކަން ފާހަގަކުރެއްވި އެވެ. ރާއްޖެއިންދޭ ހުއްދަ ނުރަނގަޅު ގޮތަކަށް ބޭނުންކޮށްފާނެ ކަމަށް ބެލެވޭ ގައުމުތަކުން އަންނަ މީހުންނާ އިންޓަވިއުކުރާ ވަގުތު "ލޭޔާ" އެއް އިތުރުކުރާ ކަމަށެވެ. ރާއްޖެއަށް އެތެރެވާން މަސައްކަތް ކުރަނީ ހަމައެކަނި އާންމުކޮށް މަސައްކަތްތެރިން އަންނަ ގައުމުތަކުން ނޫން ކަމަށާއި އޭގެ ތެރޭގައި މެދުއިރުމަތީގެ ގައުމުތަކުން އަންނަ މީހުން ވެސް ހިމެނޭ ކަމަށެވެ.
"ހާއްސަކޮށް މިޑްލްއީސްޓް ނުވަތަ ހަނގުރާމަ މަތީ ސަރަހައްދުތަކުން ބައެއް މީހުން އެބައުޅޭ ފޯޖް ޑޮކިއުމެންޓެއް ނޫނީ ކައުންޓަފީޓް ޑޮކިއުމަންޓް ބޭނުންކޮށްގެން ރާއްޖެ އެތެރެވާން މަސައްކަތްކުރޭ،" ޝަމްއާން ވިދާޅުވި އެވެ.
އިމިގްރޭޝަން ކޮންޓްރޯލާ ވިދާޅުވި ގޮތުގައި ރާއްޖޭގެ ބޯޑަރު އިތުރަށް ހަރުދަނާކުރަން ކުރަމުން އަންނަ މަސައްކަތުގެ ތެރެއިން ބޯޑާ އިންޓެލިޖެންސް ޑިވިޝަނެއް އުފައްދާފައިވާ ކަމުގަ އެވެ. އެ ޑިވިޝަނުން ބޯޑަރުގައި ހާއްސަ މަސައްކަތްތަކެއް ކުރަމުންދާ ކަމުގަ އެވެ.
މިދިޔަ އަހަރު ފޯޖުކޮށްފައިވާ ލިޔެކިޔުންތައް ބޭނުންކޮށްގެން ރާއްޖެއަށް އެތެރެވާން މަސައްކަތްކުރި 50 އަށް ވުރެ ގިނަ މީހުންނާ ބޯޑަރުން "އިންޓަސެކްޓް" ކޮށްފައިވާކަން ވެސް ޝަމްއާން ފާހަގަކުރެއްވި އެވެ.
އިމިގްރޭޝަނުން އާންމުކުރި އެއާ ބޯޑާ ކޮންޓްރޯލުގެ ތަފާސް ހިސާބުތައް ދައްކާގޮތުން މިދިޔަ އަހަރުގެ 4 ވަނަ ކުއާޓަރުގައި ކައުންޓަފީޓް ޕާސްޕޯޓް ބޭނުންކޮށްގެން ރާއްޖޭން އެތެރެވާން އުޅުނު 4 މީހަކު އަތުލައިގަތެވެ. އެ އެ މުއްދަތުގައި ކައުންޓަފީޓް ރެސިޑެންޓް ކާޑު ބޭނުންކޮށް އެތެރެވާން އުޅުނު އެކަކު ހުއްޓުވާފައިވެ އެވެ.
މި އަހަރުގެ ފުރަތަމަ ކުއާޓަރުގައި ކައުންޓަފީޓް ޕާސްޕޯޓް ބޭނުންކޮށްގެން 6 މީހަކު، އިމްޕޯސްޓާކުރި މީހެއްގެ އިތުރުން ކައުންޓަފީޓް އައިޑީއެއް ބޭނުންކޮށްގެން ރާއްޖޭގެ ބޯޑަރުން ވަންނަން އުޅުނު މީހަކު ވަނީ ހިފަހައްޓާފަ އެވެ.
މިދިޔަ އެޕްރީލު މަހުން ފެށިގެން ޖޫން މަހުގެ ނިޔަލަށް އޮޅުވާލައިގެން ރާއްޖެ އެތެރެވާން އުޅުނު 17 މީހަކު އިމިގްރޭޝަނުން ވަނީ ހިފަހައްޓާފަ އެވެ. އެއީ ކައުންޓަފީޓް ޕާސްޕޯޓް ބޭނުންކުރި 16 މީހަކާއި ފޯޖްކޮށްފައިވާ ޕާސްޕޯޓު ބޭނުންކޮށްގެން އެތެރެވާން އުޅުނު މީހެކެވެ.
އެކި ގޮތްގޮތަށް އޮޅުވާލައިގެން އުޅޭ މީހުން ޔޫރަޕަށް އެތެރެވުމަށް ރާއްޖެ ބޭނުންކުރަނީ ޓްރާންސިޓްވާ ގައުމެއްގެ ގޮތުގަ އެވެ.
Ads by STO
