ޕްލޭނެއް ނެތި ގެންދިއުމުން ބުޅާތަކުގެ ދުޅަހެޔޮ ކަމަށް ނޭދެވޭ އަސަރުކުރާނެ: މިނިސްޓްރީ
އަމަލުކުރާނެ އެސްއޯޕީތަކަށް ރިއާޔަތްނުކޮށް އޮޅުހިޔާއަށް ބުޅާތައް ގެންދަން ފަށައިފި ނަމަ، ބުޅާތަކުގެ ސިއްހަތަށާއި ދުޅަހެޔޮ ކަމަށް ނޭދެވޭ އަސަރުތަކެއް ކުރުން އެކަށީގެންވާތީ ކަންކަން ފުރިހަމަ ކުރުމަށް ފަހުގައި ނޫނީ އެތަނަށް ބުޅާތައް ނުގެންދިއުމަށް އެގްރިކަލްޗާ އެންޑް އެނިމަލް ވެލްފެއާ މިނިސްޓްރީން އިލްތިމާސްކޮށްފި އެވެ.
މާލޭގެ މަގުތަކުން ބުޅާތައް ނަގައި އޮޅުހިޔާއަށް ބުޅާތައް ގެންދިއުމުގެ މަސައްކަތް މިއަދު ފަށާނެ ކަމަށް ސިޓީ ކައުންސިލުން ވަނީ ބުނެފަ އެވެ. ތަނުން ދެވޭ ހިދުމަތް ފެށުމަށް މީހުންނާއި ތަކެތި ހޯދުމުގެ މަސައްކަތް ކުރަމުންދާ ކަމަށް މިދިޔަ މަހުގެ ފަހުކޮޅު އެ ކައުންސިލުން ބުނެފައިވެ އެވެ.
މިނިސްޓްރީން އެހެން ބުނީ މާލެ ސިޓީގެ މަގުތަކުގައި ވީއްލިގެން އުޅޭ ބުޅާތައް އޮޅުހިޔާއަށް ގެންދިއުމަށް ސިޓީ ކައުންސިލުން ކުރަމުން އަންނަ މަސައްކަތްތަކާ ގުޅޭގޮތުން މިއަދު ނެރުނު ނެރުނު ނޫސް ބަޔާނެއްގަ އެވެ.
އެނިމަލް ވެލްފެއާ މިނިސްޓްރީން ބުނީ ބުޅާތައް އޮޅުހިޔާއަށް ގެންދިއުމުގައި އަމަލުކުރާނެ އެސްއޯޕީތަކާއި ޕްލޭންތަކާއި ލަފާތައް ސިޓީ ކައުންސިލާ ހިއްސާކޮށްފައި ވިނަމަވެސް، މިހާތަނަށް އެއްވެސް ހިޔާލެއް އެ ކައުންސިލުން ދީފައި ނުވާ ކަމަށެވެ. ވުމާ އެކު އެ ކައުންސިލުން މިހާރު ރާވާފައިވާ ގޮތަށް މަގުމަތީގައި ވީއްލިގެން އުޅޭ ބުޅާތައް އޮޅުހިޔާއަށް ގެންދިއުމަކީ މިނިސްޓްރީއަށް ފެންނަ ކަމެއް ނޫން ކަމަށެވެ.
"އެސްއޯޕީތަކަށް ރިއާޔަތްނުކޮށް އެތަނަށް ބުޅާތައް ގެންދަން ފަށައިފި ނަމަ ބުޅާތަކުގެ ސިއްހަތަށާއި ދުޅަހެޔޮ ކަމަށް ނޭދެވޭ އަސަރުތަކެއް ކުރުން އެކަށީގެންވެ އެވެ. އަދި އެސްއޯޕީގައި ބަޔާންކޮށްފައިވާ އިންތިޒާމުތައް ހަމަނުޖައްސާ އޮޅުހިޔާއަށް ބުޅާތައް ގެންދިއުމުން ބުޅާތަކަށް އަޅާލުމަށް ބޭނުންވާ މިންގަނޑުތައް ކަށަވަރު ނުވުމުގެ ނުރައްކާ އެބައޮތެވެ،"
މިވަގުތު އޮޅުހިޔާއަށް ބުޅާތައް ގެންދިއުމަކީ މިނިސްޓްރީއަށް ފެންނަ ކަމެއް ނޫން ކަމަށް ބުނެ އެނިމަލް ވެލްފެއާ މިނިސްޓްރީން ވަނީ ކަންތައްތަކެއް ފާހަގަކޮށްފަ އެވެ.
- އޮޅުހިޔާގައި މަސައްކަތްކުރާ އެއްވެސް ފަންނީ މަސައްކަތްތެރިއެއް މިހާތަނަށް ރަޖިސްޓްރީ ކުރެވިފައި ނުވުން
- އަަލަށް ގެނެވޭ ބުޅާތައް ކަރަންޓީނު ކުރުމަށް ބޭނުންވާ ކޮށިތައް އެ ތަނުގައި މިވަގުތު ނެތުން
- ތަނުގައި އޮޕަރޭޝަންތައް ހިންގުމަށް އެކަށީގެންވާ ނިޒާމެއް ގާއިމުވެފައި ނެތުން
- އޮޅުހިޔާގައި އުފެދޭ ނުރައްކާތެރި ބަޔޮލޮޖިކަލް ވޭސްޓް ނައްތާލުމަށް އެއްވެސް ނިޒާމެއް އަދި ގާއިމުވެފައި ނެތުން
- ތަނަށް މިވަގުތު ގެންދެވޭ ބުޅާތަކަށް އެކަށީގެންވާ ކާނާ އާއި ފެން ފޯރުކޮށްދިނުމުގެ ނިޒާމެއް ގާއިމުވެފައި ނެތުން
- މިވަގުތު ގެންދާ ބުޅާތަކަށް އަޅާލާނެ އެއްވެސް މުވައްޒަފެއް ހަމަޖައްސާފައި ނެތުން
- ހިދުމަތް ދިނުމަށް ބޭނުންވާ ބޭސް ނުވަތަ ބޭސް ހޯދުމަށް މިވަގުތު އެއްވެސް ނިޒާމެއް ހަމަޖެހިފައި ނުވުން
- އޮޅުހިޔާގެ މަސައްކަތްތައް އިތުރަށް ހަރުދަނާ ކުރަން ބައެއް ސްޓްރަކްޗަރަލް ބަދަލުތައް ގެނައުމަށް މިނިސްޓްރީން ސިޓީ ކައުންސިލަށް ހުށަހަޅާފައިވުން
މައްސަލަތަކާ ގުޅިގެން ފާހަގަކުރެވޭ ކަންކަމަށް އަލިއަޅުވާލާ ނެރުނު ބަޔާނުގައި އެނިމަލް ވެލްފެއާ މިނިސްޓްރީން ބުނީ އޮޅުހިޔާއިން ހިދުމަތް ފެށުމުގެ ކުރިން މި މައްސަލަތައް ހައްލުކުރަން ޖެހޭ ކަމަށެވެ.
އަޕްޑޭޓުތައް ހޯދުމަށާއި މި މައްސަލަ ހައްލުކުރަން މާލެ ސިޓީ ކައުންސިލުގައި އެދިފައިވި ނަމަވެސް މިހާތަނަށް އެކަން ކޮށްފައި ނުވާކަން މިނިސްޓްރީން ފާހަަގަކުރި އެވެ.
އޮޅުހިޔާއަށް ބޭނުންވާ ކަންކަން ފުރިހަމަ ކުރުމަށް ފަހުގައި ނޫނީ އެތަނަށް ބުޅާތައް ނުގެންދިއުމަށް ސިޓީ ކައުންސިލަށް އެނިމަލް ވެލްފެއާ މިނިސްޓްރީން ވަނީ އިލްތިމާސްކޮށްފަ އެވެ.
