ވިލުންވެރިކޮށް ގެދޮރު ބިނާކުރުމަށް އިރުޝާދުދޭ ފޮތެއް ނެރެފި
ރާއްޖޭގައި ވިލުންވެރި ގެދޮރު ބިނާކުރުމުގެ އިރުޝާދު، "ރެސިލިއަންސް ހައުސިން ގައިޑަންސް ފޯ ދަ މޯލްޑިވްސް" ގެ ނަމުގައި ހާއްސަ ފޮތެއް ރަސްމީކޮށް ނެރެފި އެވެ.
އެ ފޮތަކީ ކޮންސްޓްރަކްޝަން އެންޑް އިންފްރާސްޓްރަކްޗާ މިނިސްޓްރީ އާއި ވޯލްޑް ބޭންކް ގުޅިގެން އެކުލަވާލާފައިވާ ފޮތެކެވެ. ފޮތުގެ މައިގަނޑު މަގުސަދަކީ ރާއްޖޭގައި ބިނާކުރާ ގެދޮރުތަކަށް މޫސުމަށް އަންނަ ބަދަލުތަކާ ގުޅިގެން ދިމާވާ ކަންކަމަށް ދެމެހެއްޓެނިވި ގޮތެއްގައި ހައްލު ހޯދައިދީ މަގުދައްކައިދިނުމެވެ.
ފޮތް ރަސްމީކޮށް ނެރެދެއްވީ، ވިލުންވެރިކޮށް ގެދޮރު ބިނާކުރުމަށް އިރުޝާދުދޭ ފޮތެއް ނެރެފި މިނިސްޓަރު ޑރ. އަބްދުﷲ މުއްތޮލިބާއި ސިޓީސް، ލޯކަލް ގަވަންމަންޓް އެންޑް ޕަބްލިކް ވޯކްސް މިނިސްޓްރީގެ ސްޓޭޓް މިނިސްޓަރު މުހައްމަދު އިބްރާހީމެވެ.
އިމާރާތްތަކަށް ދިމާވާ ކަންކަމުގައި ދެމެހެއްޓެނިވި ހައްލުތައް ހޯދައިދިނުމަށް މަގު ދައްކައިދޭ ފޮތް ނެރުމުގެ ރަސްމިއްޔާތުގައި ވާހަކަ ދައްކަވަމުން މުއްތަލިބާއި ވޯލްޑް ބޭންކުގެ ސީނިއާ ހައުސިން ސްޕެޝަލިސްޓް ޑާއޯ ހެރިސަން އަދި ލޯކަލް ގަވަންމަންޓް އޮތޯރިޓީގެ ޗީފް އެގްޒެކެޓިވް އޮފިސަރު މުހައްމަދު ނިމާލް ވަނީ އެ ފޮތުގެ މުހިންމު ކަމުގެ މައްޗަށް އަލިއަޅުވާލައްވާފަ އެވެ. އަދި ދެމެހެއްޓެނިވި ގޮތެއްގައި ގެދޮރު އެޅުމުގެ މުހިންމުކަމާ ބެހޭގޮތުން އެ ބޭފުޅުން ވާހަކަ ދެއްކެވި އެވެ. އަދި ފޮތް އެކުލަވާލުމުގައި ގެންގުޅުނު އުސޫލުތަކާ ބެހޭގޮތުން ވެސް މައުލޫމާތު ދެއްވި އެވެ.
ރެސިލިއަންސް ހައުސިން ގައިޑަންސް ފޯ ދަ މޯލްޑިވްސް ފޮތް އިފްތިތާހު ކުރުމުގެ ތެރެއިން / ފޮޓޯ:ކޮންސްޓްރަކްޝަން މިނިސްޓްރީ
ފޮތުގައިވާ މައުލޫމާތުގެ އަލީގައި ކުރިއަށް އޮތްތަނުގައި ރާއްޖޭގައި އެޅޭ ގެދޮރުތައް ވެގެންދާނީ މޫސުމީ ބަދަލުތަކާ މެދު ދުރާލާ ވިސްނައި، ވީހާވެސް ބޮޑަށް ދެމެހެއްޓެނިވި ގޮތެއްގައި ތައްޔާރުކުރެވިފައިވާ ގެދޮރުތަކަކަށް ވާނެ ކަމަށް ކޮންސްޓްރަކްޝަން މިނިސްޓްރީން ބުންޏެވެ.
އެ މިނިސްޓްރީން ވަނީ ފޮތް އެކުލަވާލުމުގައި ސަރުކާރުގެ އިދާރާތަކާއި ޕްރައިވެޓް ސެކްޓާ އަދި އާންމު ރައްޔިތުންގެ ފަރާތުން މުހިންމު ހިޔާލުތަކެއް ލިބުނުކަން ފާހަގަކޮށްފަ އެވެ.
