މާލެ އެއްގަމު ތޮށި މަރާމާތުކުރަން ޑިޒައިން އެއްބަސްވުމުގައި ޖަޕާނާ އެކު ސޮއިކޮށްފި
މާލެ އެއްގަމު ތޮށި މަރާމާތުކުރަން ޑިޒައިންގެ މަސައްކަތް ކުރަން ފަރާތަކާ ހަވާލުކޮށް، ކޮންސަލްޓަންޓަކާ އެކު އެއްބަސްވުމެއްގައި ސޮއިކޮށްފި އެވެ.
"ޕްރޮޖެކްޓް ފޮ ޑިޒާސްޓާ ރެޒިލިއަންސް އެންހޭންސްމަންޓް އިން މާލެ އައިލެންޑް" ގެ ދަށުން މި މަޝްރޫއު ކުރިއަށް ގެންދިއުމަށް ދިވެހި ސަރުކާރުން ޖަޕާނުގެ ސަރުކާރާ އެކު އެކްސްޗޭންޖް އޮފް ނޯޓްސްގައި ސޮއިކޮށްފައިވަނީ މިދިޔަ ސެޕްޓެމްބަރު މަހުގެ 19 ވަނަ ދުވަހު އެވެ. އަދި ގްރާންޓް އެއިޑްގެ އެއްބަސްވުމުގައި މިދިޔަ އޮކްޓޫބަރު މަހުގެ 28 ވަނަ ދުވަހު ސޮއިކޮށްފައިވެ އެވެ.
ކޮންސްޓްރަކްޝަން އެންޑް އިންފްރާސްޓްރަކްޗާ މިނިސްޓްރީން އިއްޔެ ބުނީ މަޝްރޫއުގެ ޑީޓެއިލް ޑިޒައިން ކުރުމުގެ އެއްބަސްވުމުގައި މިދިޔަ އަންގާރަ ދުވަހު ސޮއިކޮށްފައިވާ ކަމަށެވެ.
އިންފްރާސްޓްރަކްޗާ މިނިސްޓްރީގެ ފަރާތުން އެއްބަސްވުމުގައި ސޮއިކުރެއްވީ އެ މިނިސްޓްރީގެ ސްޓޭޓް މިނިސްޓަރު އިބްރާހީމް ތޮއާމް މުހައްމަދެވެ. ކޮންސަލްޓަންޓް ޓީމުގެ ފަރާތުން ސޮއިކުރައްވާފައިވަނީ ޗީފް ކޮންސަލްޓަންޓް ހިރޯމީ ނަމިކީ އެވެ.
އެއްބަސްވުމަކީ މާލޭގެ އެއްގަމު ތޮށި މަރާމާތު ކުރުމުގެ މަސައްކަތުގެ ޑީޓެއިލް ޑިޒައިން ކުރުމުގެ ގޮތުން ވެފައިވާ އެއްބަސްވުމެކެވެ. އެ އެއްބަސްވުމުގެ ދަށުން އަންނަ އަހަރުގެ ފުރަތަމަ ކުއާޓަރާ ހަމައަށް ޑިޒައިނިން ފޭސް ނިންމުމަށް ރާވާފައިވާ ކަމަށް މިނިސްޓްރީން ބުންޏެވެ.
ޖަޕާނު ސަރުކާރުގެ އިކޮނޮމިކް އެންޑް ސޯޝަލް ޑިވެލޮޕްމަންޓް ޕްރޮގްރާމުގެ ދަށުން ކުރިއަށް ގެންދިއުމަށް ނިންމާފައިވާ މި މަޝްރޫއަށް ހިލޭ އެހީގެ ގޮތުގައި 20 މިލިއަން ޖަޕަނީސް ޔެން (140،000 ޑޮލަރު) ދޭން ނިންމާފައިވެ އެވެ.
މި މަޝްރޫއާ ގުޅޭގޮތުން މީގެކުރިން މިނިސްޓަރު މޫސާ ޒަމީރު ވިދާޅުވެފައިވަނީ މިއީ ކަނޑުގެ ލޮނުގަނޑު އުފުލުމާއި މޫސުމާ ގުޅުންހުރި އެހެނިހެން ކާރިސާތަކުގެ ނުރައްކަލުން ރާއްޖެ ސަލާމަތް ކުރުމަށް މުހިންމު މަޝްރޫއުއެއް ކަމަށެވެ. އަދި އަންނަން އޮތް ޖީލަށް ދެމެހެއްޓެނެވި ރައްކާތެރިކަން ފޯރުކޮށްދޭނެ މަޝްރޫއުއެއްގެ ގޮތުގައި މި މަޝްރޫއު ސިފަކުރެއްވި އެވެ.
