ފުއާދަށް ފޮރިން މިނިސްޓްރީގެ އެމްބެސެޑާ އެޓް ލާޖުގެ މަގާމު
ފޮރިން މިނިސްޓްރީގެ އެމްބެސެޑާ އެޓް ލާޖުގެ މަގާމަށް އިލެކްޝަންސް ކޮމިޝަން (އީސީ) ގެ ކުރީގެ ރައީސް ފުއާދު ތައުފީގް އައްޔަން ކުރައްވައިފި އެވެ.
ފުއާދު އީސީން ވަކިވެވަޑައިގެންނެވީ ކޮމިޝަނުގައި ދެ ދައުރު ފުރިހަމަވުމުންނެވެ. ގާނޫނުގައިވާ މެމްބަރުކަން އަދާކުރެވޭނީ އެންމެ ގިނަވެގެން ދެ ދައުރަށެވެ.
އީސީގައި އަދާކުރައްވަމުން ގެންދެވި ދައުރު މިދިޔަ ނޮވެމްބަރު މަހުގެ 23 ވަނަ ދުވަހު ހަމަވުމާ އެކު، ރާއްޖެއިން ތައިލެންޑަށް ކަނޑައަޅުއްވާ ސަފީރަކަށް ފުއާދު އައްޔަންކުރުމަށް ރައްޔިތުންގެ މަޖިލިހުގެ ރުހުން ހޯދުމަށް ރައީސް ޑރ. މުހައްމަދު މުއިއްޒު އޭނާގެ ނަން ފޮނުއްވީ އެ މަހުގެ 25 ވަނަ ދުވަހު އެވެ.
އެ މައްސަލަ ދިރާސާކުރަން މަޖިލިހުގެ ހާރިޖީ ގުޅުންތަކުގެ ކޮމިޓީއަށް ފޮނުވުމުން އެ ކޮމިޓީން މިދިޔަ އަންގާރަ ދުވަހު ވަނީ އޭނާ އެ މަގާމަށް އައްޔަންކުރުމަށް ފެންނަ ކަމަށް ފާސްކޮށްފަ އެވެ.
އެމްބެސެޑާ އެޓް ލާޖުގެ މަގާމަށް ފުއާދު އައްޔަންކުރެއްވިކަން ސަރުކާރުން ހާމަކޮށްފައިި ނުވި ނަމަވެސް، "ދެން" އަށް ކަށަވަރު ކުރެވިފައިވާ ގޮތުގައި އޭނާއަށް އެ މަގާމަށް އައްޔަންކުރައްވާފައި ވަނީ ނޮވެމްބަރު މަހުގެ 24 ވަނަ ދުވަހު އެވެ. ފުއާދު އެ މަގާމަށް އައްޔަންކުރެއްވީ ރާއްޖެއިން ތައިލެންޑަށް ކަނޑައަޅުއްވާ ސަފީރަކަށް އޭނާ އައްޔަންކުރައްވަންދެން ކަމުގައި ވެސް މައުލޫމާތު ވަނީ ލިބިފަ އެވެ.
ފުއާދު ވަނީ މީގެ އަހަރުތަކެއް ކުރިން ފޮރިން މިނިސްޓްރީގައި މަސައްކަތް ކުރައްވާފަ އެވެ. އެ މިނިސްޓްރީގެ ފޮރިން އިންވެސްޓްމެންޓް ޑިވިޝަންގައި އޭނާ އަދާކުރެއްވީ އިންގްލިޝް ސެކްރެޓަރީގެ މަގާމެވެ.
ފުއާދު އީސީގައި މަސައްކަތް ކުރައްވަން ފެއްޓެވީ 2008 ވަނަ އަހަރުގަ އެވެ. އެ ކޮމިޝަނުގެ ރައީސްކަމުގެ މަގާމާ އޭނާ ހަވާލުވެވަޑައިގެންނެވީ 2009 ވަނަ އަހަރުގެ ސެޕްޓެމްބަރު 15 ވަނަ ދުވަހު އެވެ. އެއީ އިންތިގާލީ މަރުހަލާގެ ތެރޭގަ އެވެ.
ދެވަނަ ދައުރަކަށް، އީސީގެ ރައީސް ކަމަށް ފުއާދު އައްޔަންކުރެއްވީ 2021 ވަނަ އަހަރުގެ ސެޕްޓެމްބަރު މަހުގެ 15 ވަނަ ދުވަހު އެވެ. ކޮމިޝަނުގެ ރައީސަކަށް އައްޔަން ކުރެއްވިއިރު ވެސް، ފުއާދަކީ އެ ކޮމިޝަނުގެ މެމްބަރެކެވެ. އޭނާ ކޮމިޝަނަށް އައްޔަންކުރެއްވީ 2019 ވަނަ އަހަރުގެ ނޮވެމްބަރު މަހުގަ އެވެ.
އާ ގާނޫނު އަސާސީގެ ދަށުން 2008 ވަނަ އަހަރުގެ ބޭއްވި ފުރަތަމަ ރިޔާސީ އިންތިހާބާއި 2009 ވަނަ އަހަރުގެ މަޖިލިސް އިންތިހާބާއި 2011 ވަނަ އަހަރުގެ ކައުންސިލް އިންތިހާބާއި 2013 ވަނަ އަހަރު ބޭއްވި ރިޔާސީ އިންތިހާބުގެ އިތުރުން 2023 ވަނަ އަހަރު ބޭއްވި ރިޔާސީ އިންތިހާބުގައި ފުއާދު ވަނީ އިސްދައުރެއް އަދާކުރައްވާފަ އެވެ.
