ސަމާގެ ހިތުން ރައްޔިތުންގެ ހިތްތަކަށް: ސަދަގާތުގެ ތެރެއިން އޯގާތެރިކަން
މީގެ އަހަރުތަކެއް ކުރިން މަރިޔަމް ސަމާ މުޅި ރާއްޖެއަށް މަޝްހޫރުވެގެން ދިޔައީ ޔޫޓިއުބަށް އަޕްލޯޑު ކުރި ވީޑިއޯތަކަކާއި ގުޅިގެން "ޔޫޓިއުބް ސަމާ" ގެ ނަމުންނެވެ. ސަމާގެ ވީޑިއޯތަކުގައި ރާއްޖޭގައި ހުރި ބައެއް މައްސަލަތަކާއި ގުޅޭ ވާހަކަތައް އޭނާ އާންމު ކުރި އެވެ. އެހެންނަމަވެސް ރައްޔިތުންގެ ފަރާތުން އޭރު ސަމާއަށް އަމާޒުވީ ނޭދެވޭ ފާޑުކިޔުންތަކެވެ.
އޭގެ އަހަރުތަކެއް ފަހުން ދެން ސަމާ ފެނުނީ ޓިކްޓޮކްގެ ޒަރިއްޔާއިންނެވެ. އޭނާގެ މާ މޮޅެތި ކޮންޓެންޓުތަކެއް ނުފެނުނަސް ބޮޑު އޯޑިއަންސެއް ސަމާ ކަށަވަރު ކުރީ ޓިކްޓޮކް ލައިވް ހޮސްޓެއްގެ ގޮތުގަ އެވެ. ލައިވްތަކުގައި ސަމާ ހިއްސާ ކުރަމުން ދިޔައީ އޭނާގެ ދިރިއުޅުމުގެ ވާހަކަތަކެވެ. އަވައްޓެރި ސްރީލަންކާގައި ދިރިއުޅުމުގެ ބައެއް ވޭތުކުރި މީހެއްގެ ހައިސިއްޔަތުން އެގައުމުގައި ހުރި ފަސޭހަތަކާއި ރާއްޖެ ބަދަލުވުމަށްފަހު ދިމާވި ގޮންޖެހުންތަކުގެ ވާހަކަތައްވެސް ސަމާ ހިއްސާ ކުރަމުން ދިޔަ އެވެ. މީގެ ތިން ވަރަކަށް އަހަރު ކުރިން ފެށިގެން ސަމާއަކީ ރާއްޖޭގެ ޓިކްޓޮކްގައި އެންމެ ބޮޑު އޯޑިއަންސެން އޮތް ލައިވް ހޮސްޓެވެ.
އެހީތެރިކަން ފޯރުކޮށްދިނުމުގެ މަސައްކަތް އަމަލީ ގޮތުން ސަމާ ފެށީ ކޮވިޑުގެ ބަލި މަޑުކަމަށްފަހު
ދެން އޮންލައިންގެ ސްޕޮޓްލައިޓް ޕްރޮގުރާމަށް ސަމާއަށް ދައުވަތު ދިނީމެވެ. ކަޅު ކުލައިގެ ރަސްމީ ފޭރާމެއްގައި ސަމާ އިންޓަވިއުއަށް އައީ އޭނާގެ މުޅިން އެހެން މަސައްކަތަކާއި ގުޅޭ ވާހަކަތަކެއް ދައްކާށެވެ. މިވާހަކަތަކާއި ބީރައްޓެހި ފަރާތްތަކަށް ތަންކޮޅެއް ދުރުން މި ވާހަކަ ތިލަކޮށްދޭނަމެވެ.
ސަމާ އަކީ ކ. ގުރައިދޫއަށް އުފަން މީހެކެވެ. ގުރައިދޫއަށް "މޮޔަ ގުރައިދޫ" އޭވެސް ބަޔަކު ކިޔަ އެވެ. އެހެންނަމަވެސް މިނަން އެރަށަށް ދެވުނީ އެރަށުގައި ހާއްސަ އެހީއަށް ބޭނުންވާ މީހުންގެ މަރުކަޒު ހުންނާތީ އެވެ. ވާހަކަ ފެށެނީ މިހާ ހިސާބުންނެވެ. ސަމާގެ އުމުރުން ވަރަށް ހަގު ދުވަސްވަރު އޭނާގެ މާމަ އޭނާ ގޮވައިގެން އެ މަރުކަޒަށް ދެ އެވެ. ދާ ކޮންމެ ފަހަރަކު ކޮންމެވެސް ގޮތަކުން ހާއްސަ އެހީއަށް ބޭނުންވާ ކޮންމެވެސް މީހަކަށް އެހީތެރިކަން ފޯރުކޮށްދެ އެވެ. ސަމާ ބޮޑުވީ މިމަންޒަރު ފެނިގެންނެވެ.
"ދެން ރޯދަ މަސް އަޔަސް ނެއިބަހުޑްގަ އުޅޭ އެހާ ފުދުންތެރިކަން ނުހުންނަ ފަރާތްތަކަށް މާމަ ދޭނެ، ގޭގަ އިންނާނެ ފިހާރައެއް، އެ ފިހާރައިން ހަނޑޫ، ހަކުރު، ފުށް ދެން ޑްރައި ފުޑް މި ހަދަނީއެއްނު ޕެކޭޖް، ހަމަ ޕެކޭޖް ހަދާފަ މާމަ ދޭނެ"
ޝައުގުވެރިކަމާއެކު ސަމާގެ ވާހަކަތައް އަޑު އަހަމުން ދިޔައިރު އެހީތެރިވުމަށް ސަމާގެ ކަށީގައި ހަރުލާފައި ހުރި އާދަ ދެނެގަނެވުނެވެ. ސަމާ އޭނާގެ ދެވަނަ ކައިވެންޏަށްފަހު ސްރީލަންކާގައި ދުވަސްތަކެއް ހޭދަ ކުރި އެވެ. ކަން ދިމާކުރި ގޮތުން ކޮވިޑް-19 ގެ ބަންދުގައި ސަމާ ދިރިއުޅެމުން ދިޔައީ ސްރީލަންކާގަ އެވެ. އެގައުމަކީ މުޅި އޭޝިޔާގައިވެސް އެންމެ ބޮޑަށް ހާލުގައި ޖެހުނު އެއް ގައުމެވެ. ދުވަހުގެ ބޮޑު ބައެއް ހޭދަކުރަން ޖެހުނީ ކަރަންޓާއި ނުލަ އެވެ. މަގުމައްޗަށް ނިކުތުން މުޅިންހެން މަނާކޮށްފައި އޮތުމާއި، ފިހާރަކުން ތަކެތި ނުލިބުމުގެ ދަތިކަން އިންތިހާއަށް އޮތެވެ. ލަންކާގައި އެ ދުވަސްވަރު ޒަރޫރީ ބޭނުންތައް ފުއްދުމަކީވެެސް ދަތިކަމަކަށް އޮތީ ވެފަ އެވެ.
ދެން އޮންލައިންގެ ސްޕޮޓްލައިޓް ޕްރޮގުރާމުގައި ސަމާ ވާހަކަ ދައްކަނީ
ސްރީލަންކާ އަކީ ނިސްބަތުން ރާއްޖެއަށްވުރެއް ފަގީރުން ގިނަ ގައުމެކެވެ. ސަމާގެ ވިސްނުމަށް މިކަން އައި ހިސާބުން ތަސައްވަރު ކުރެވުނީ ލަންކާގައި ފަގީރުން ދިރިއުޅޭނެ ހާލަތެވެ. ކުރިން ދަތުރު ކުރިއިރު ފަގީރުން ދިރިއުޅޭ ހާލަތު ފެނިފައިވުމުން އެމީހުން ކޮވިޑު ތެރޭގައި އުޅޭނެ ހާލަތު ވަޒަން ކޮށްލާކަށް ސަމާއަކަށް އުނދަގުލެއް ނުވި އެވެ. ކޮންމެވެސް ސިފައެއްގައި އެހީތެރިކަން ފޯރުކޮށްދޭން ބޭނުންވާތީ ސަމާ އޭނާގެ އިންސްޓަގްރާމުގެ ބޭނުން ހިފި އެވެ.
"ދިވެހިންނަކީ ދެން އަސްލު ވަރަށް ޖެނެރަސް ބައެއް. އެކަން ކަންނޭނގެ މި ދޮޅު އަހަރުގަ ހިތުން ހިތަށް މަސައްކަތުންވެސް ސާބިތުވެގެން މި ދިޔައީ"
އެކި ފަރާތްތަކުން ދިން އެހީއާއިއެކު ޒަރޫރީ ބޭނުންތައް ފުއްދައިލެވޭނެ، ހާއްސަކޮށް ކެއުމަށް ބޭނުންވާ ތަކެތި ގަނެ ފަގީރު އާއިލާތަކަށް ސަމާ ފޯރުކޮށްދިނެވެ. އަމަލީ ގޮތެއްގައި އެހީތެރިކަން ފޯރުކޮށްދޭން ސަމާ ފެށީ މިގޮތަށެވެ.
އޭގެ ފަހުން ސަމާ ޓިކްޓޮކް ފެށި އެވެ. ލައިވްތައް ކުރިއަށް ގެންދަނީ މަޖާ މާހައުލެއްގައި އޯޑިއެންސާއި ގުޅިގެންނެވެ. އަމިއްލަ ދިރިއުޅުމުގެ އެތައް ވާހަކަތަކަކާއި ރާއްޖޭގައި ހުރި މައްސަލަތަކުގެ ވާހަކަ ސަމާ ހިއްސާ ކުރަމުން ދިޔަ އެވެ. މިހެން ލައިވްތައް ކުރިއަށް ގެންދަނިކޮށް މީހަކު ސަމާގެ ލައިވްގައި އެދުނީ ބަލި ކުއްޖަކަށް އެހީއެއް ފޯރުކޮށްދޭށެވެ. އެއީ "ހިތުން ހިތަށް" އުފެދެން މެދުވެރިވި ސަބަބެވެ. އެއީ ސަމާ ޓިކްޓޮކް މެދުވެރިކޮށް އެހީތެރިކަން ފޯރުކޮށްދިން ފުރަތަމަ ކުއްޖާ އެވެ.
އާންމު ގޮތެއްގައި ބަލި މީހުންނަށް އެހީތެރިކަން ފޯރުކޮށްދެނީ އެފަދަ ބަލި ހާލަތެއް ކުރިމަތިވެފައިވާ ނުވަތަ އާއިލާގެ މީހެއްގެ ފަރާތުން ބަލީގެ ހާލަތު ދެނެގަނެވިފައިވާ މީހުންނެވެ. އެކަމަކު ސަމާގެ އެފަދަ އެއްވެސް ހާލަތެއް ނެތެވެ. ސަމާއަށް ފެނުނީ އެހީއަށް ބޭނުން ޖެހިފައިވާ މީހާ އެވެ. އެއް އުއްމަތެއްގެ މީހަކަށް ވީތީ އެއްވެސް ވަރެއްގެ ތަނަވަސްކަމެއް ނެތި ދެއަތް އުރައިލަން ޖެހިފައިވާ އާއިލާއަށް އެހީތެރިކަން ފޯރުކޮށްދޭން އަމިއްލަ ނަފްސަށް ކުރިމަތިކުރުވާ ޒިންމާ އެވެ.
އެހީތެރިކަން ފޯރުކޮށްދިނުމުގެ އާދަ ސަމާގެ ކިބައިގައި އަށަގަތީ އޭނާގެ މާމަގެ ފުށުން
ގުރައިދޫގައިވެސް ސަމާ ދިރިއުޅުނެވެ. އެރަށުގެ ސިއްހީ މަރުކަޒުގައި އެކްސްރޭ ނެގޭނެ ފެންވަރުވެސް ނުހުރެ އެވެ. މާލެއާއި ކައިރި ރަށެއް ކަމުން ކުޑަ ފައިސާކޮޅަކުން މަދު ވަގުތު ކޮޅެއްގެ ތެރޭގައި ގުރައިދޫއިން މާލެ އާދެވެ އެވެ. ސަމާއަށް ތަސައްވަރު ކުރެވުނީ އައްޑޫގައި ނުވަތަ ތުރާކުނުގައި ދިރިއުޅޭ މީހާ ބޭސް ފަރުވާއަށް މާލެ އަންނަން އުޅޭނެ ހާލެވެ. މިދައްކަނީ ބޮޑެތި ބަލިތައް ތަހައްމަލު ކުރާ މީހުންގެ ވާހަކަ އެވެ. ސަރުކާރުން ފޯރުކޮށްދެނީ ބަލި މީހާގެ ބޭސް ފަރުވާއަށް ބޭނުންވާނެ އަސާސީ ހަރަދެވެ. އެކަމަކު ތުއްތު ކުއްޖަކަށް މިފަދަ ހާލަތެއް ދިމާވާއިރު މަންމައާއި ބައްޕަ ކައިރީގައި ހުންނަން ބޭނުންވާނެ އެވެ. އަމިއްލަ ހާލައިގެން ނޫޅެވޭ އެހެން ކުއްޖަކު އެދެމަފިރިންގެ ހުރިނަމަ ބޭސް ފަރުވާއަށް ދާން ޖެހެނީ އެ ކުއްޖާވެސް ގޮވައިގެންނެވެ. ބޭރު ގައުމަކަށް ދާނަމަ އާސަންދަ އާއި އެންސްޕާ އެހީގެ އިތުރުން ލައްކައިން ފައިސާ ބޭނުންވެ އެވެ.
މި ތިލަކޮށްދިން ހަގީގަތަކީ ފަހަރުގައި ކޮންމެ ކޮންމެ މީހަކަށް ތަސައްވަރު ނުކުރެވިދާނެ ހާލަތެކެވެ. ހާއްސަކޮށް ބަލި ހާލަތެއް ކުރިމަތި ނުވާ އާއިލާއަކަށް މިކަން ނޭނގި އޮތުމަކީވެސް އެކަށީގެންވާ ކަމެކެވެ. އެކަމަކު ސަމާ މި ވާހަކަތައް ތިލަކޮށްދިނީ ކޮންމެ މީހަކަށްވެސް މިކަމުގެ ސީރިއަސްކަން އެނގޭނެ ގޮތަށެވެ.
"ދެން އެއްކަލަ ދުވަހު ލައިވްގަ އިންދާ ކުއްޖަކު އައިސް އެހީއަށް އެދިގެން ސަމާއަށް މިކަމުގެ ތެރެއަށް ވަދެވުނީމަ ސަމާ ހިތަށް އެރީ، އެއީ ޔޫސުފް، އެއީ ފުރަތަމަ ކޭސް، ސަމާ ހިތަށް އެރީ މީގެ ކިތަށް ޔޫސުފް ރާއްޖޭގަ އުޅޭނެ ބާއޭ"
ދޮޅު އަހަރެއްހާ ދުވަސް ވަންދެން ސަމާ ގެންދިޔައީ މި މަސައްކަތް ކުރަމުންނެވެ. ޓިކްޓޮކްގައި "ހިތުން ހިތަށް" ގެ ނަމުގައި އެކައުންޓެއް ހަދައި މަހުން މަހަށް އެހީތެރިކަން ފޯރުކޮށްދެމުން ދިޔަ އެވެ. އެހީތެރިވެދޭ ކޮންމެ މީހަކަށް ލައްކައާއި ގާތްކުރާ އަދަދަކަށް ފައިސާގެ އެހީތެރިކަން ދެމުން ގޮސް މިދިޔަ ތަނުގައި އޭނާ ވަނީ މިލިއަނަކަށްވުރެއް ގިނަ އަދަދަކަށް ފައިސާގެ އެހީ އެކި މީހުންނަށް ފޯރުކޮށްދީފަ އެވެ.
ޝައްކެއްވެސް ނެތް ގޮތުގައި ސަމާ މިކަމަށް އިސްވެ މަސައްކަތެއް ކުރިޔަސް މިއީ ހުރިހާ ދިވެހި ރައްޔިތުންގެ ދީލަތިކަމެވެ. މިކަން ސަމާވެސް ފާހަގަކުރެ އެވެ. އޭނާ ސިފަ ކުރަނީ ވަކި ވަކި ކަންކަމުގައި ހިޔާލު ތަފާތު ވިޔަސް މީހަކަށް އެހީއެއް ފޯރުކޮށްދޭން ޖެހުމުން ދިވެހިންނަކީ އެއްބައިވަންތަ ބައެއްގެ ގޮތުގަ އެވެ. ސަމާއަށް އޭނާގެ ޗެރިޓީ މަސައްކަތާއިގެން ކުރިއަށް ދެވުމުގެ އެންމެ ބޮޑު ސިއްރަކީ އާންމުން ފޯރުކޮށްދޭ އެހީތެރިކަމެވެ.
ސަމާގެ އެންޖީއޯ ރަޖިސްޓްރީ ކުރީ މިދިޔަ ނޮވެމްބަރު މަހުގެ ތެރޭގައި
ކޮންމެއަކަސް ދޮޅު އަހަރު ފަހުން ސަމާ މިވަނީ ރަސްމީކޮށް އެހީތެރިކަން ފޯރުކޮށްދިނުމުގެ މަސައްކަތް ފަށައިފަ އެވެ. "ހިތުން ހިތަށް" ގެ ނަމުގައި ޓިކްޓޮކްގައި ހިންގި އެކައުންޓު، ޔޫތު މިނިސްޓްރީގައި ރަޖިސްޓްރީ ކޮށްފައިވާ އެންޖީއޯއަކަށް މިވަނީ ބަދަލު ކޮށްފަ އެވެ. ސަމާއަކީ މި އެންޖީއޯގެ ޗެއާޕާސަން އެވެ. މިހާރު ސަމާގެ މަސައްކަތަކީ އެންޖީއޯ މެދުވެރިކޮށް ފޯރުކޮށްދޭ އެހީތެރިކަން ފުޅާ ކުރުމެވެ. ދުރާލާ ރޭވިގެން ކުރިއަށް ގެންދާ އެހީތަކުގެ އިތުރަށް ކުއްލި އެހީއަށް ބޭނުންވާ ފަރާތްތަކަށްވެސް އެންޖީއޯގެ ފަންޑުން ފައިސާ ފޯރުކޮށްދިނުމެވެ. ސަމާގެ ވިސްނުން ހުރީ އިހުނަށްވުރެއް މާ ފުޅާކޮށެވެ. އޭނާގެ އަމާޒަކީ ބޭސް ފަރުވާއަށް ސަލާން ޖަހަން ނިކުންނަ ރައްޔިތު މީހާ ގޮތް ހުސްވެފައި ނުހުރެ އަވަސް ފަރުވާއަށް ފޮނުވުމަށް ކޮންމެވެސް އެއްޗެއް ދިއްކޮށްލުމެވެ. ފުރާނައެއް ސަލާމަތް ކޮށްދިނުމުގައި ވެވުނު މިންވަރަކުން އެހީއެއް ފޯރުކޮށްދިނުމެވެ.
ސަމާ ދޭ އެންމެ ބޮޑު ޔަގީންކަމަކީ ފައިސާގެ ކަންކަމުގައި ހިޔާނާތްތެރި ނުވާނެ ކަމުގެ ޔަގީންކަމެވެ. މިދިޔަ ތަނުގައިވެސް ރައްޔިތުން އެންމެ ބޮޑު އިތުބާރެއް ސަމާއަށް އޮތީ ފައިސާގެ ކަންކަން ދެފުށް ފެންނާނެހެން ކުރާތީ އެކަމާއިމެދު އެވެ. މިކަން މިގޮތުގައި ދެމެހެއްޓުމަކީ ސަމާގެ އަމާޒެވެ. ސޯޝަލް މީޑިއާ މެދުވެރިކޮށް ފައިސާގެ މުއާމަލާތްތަކުގެ ތަފްސީލުތައް އޭނާ ހިއްސާ ކުރާނެ އެވެ. އަދި އަހަރީ ރިޕޯޓު ލަސް ނުވެ ނެރޭނެ އެވެ.
"މިކަން ގުޅިފަ މިއޮތީ ރައްޔިތުންނާތާ، އެހެންވީމަ ޕަބްލިކްގަ މި އޮތް އިތުބާރު މެއިންޓެއިން ކުރުން ވަރަށް މުހިންމު ފޮ ދަ ސޭކް އޮފް ހިތުން ހިތަށް"
އެންޖީއޯގެ މަސައްކަތް ކުރިއަށް ގެންދިޔަކަމުގައި ވިޔަސް ޓިކްޓޮކް ލައިވް ހޮސްޓިންގް ދޫކޮށްލުމުގެ ވިސްނުމެއް އޭނާގެ ނެތެވެ. ސަމާ ބުނާ ގޮތުގައި ހިތުން ހިތަށް ފެށުނީ ރައްޔިތުންގެ ތެރެއިންނެވެ. އެހެންކަމުން ޓިކްޓޮކްއަކީ ޗެރިޓީ މަސައްކަތަށް އެންމެ ބޭނުންވާނެ އެއް ޒަރިއްޔާ އެވެ. ކުރީގެ ރައީސް މުހައްމަދު ނަޝީދު ސިޔާސީ މަސައްކަތުގައި އުޅުއްވަމުން އެމަނިކުފާނާއި ރައްޔިތުންނާއި ދެމެދު އޮންނަނީ "ހިތާ ހިތުގެ ގުޅުމެއް" ކަމަށް އަބަދުވެސް ވިދާޅުވެ އެވެ. ސަމާވެސް އޯޑިއަންސް އާއި ދެމެދު އޮންނަ ގުޅުން ސިފަ ކުރަނީ "ހިތާ ހިތުގެ ގުޅުމެއްގެ" ގޮތުގަ އެވެ.
"ހިތުން ހިތަށް" އެންޖީއޯގެ މަސައްކަތަށް ސަމާގެ ޓީމުން ވަނީ ޓެލެގްރާމު ކޮމިއުނިޓީއެއް ހަދައިފަ އެވެ. އަދި އޮންލައިންކޮށް މި އެންޖީއޯގެ މެމްބަރަކަށް ވުމަށް ފޯމު ފުރޭނެ އިންތިޒާމުތައްވެސް ވަނީ ހަމަޖައްސައިފަ އެވެ. އޭނާ ވަނީ އޭނާގެ ޓީމުން ކުރާ ބުރަ މަސައްކަތްވެސް ފާހަގަކޮށްފަ އެވެ. މި މަސައްކަތާއި ނުލައި މިހާ ހިސާބަށް އައުން ދަތިވާނެކަން ސަމާ ފާހަގަކުރި އެވެ. ސަމާގެ ޓީމުން މިހާރު ދަނީ މާލެ ސަރަހައްދުގައި ދޮރުން ދޮރަށް ހަރަކާތެއް ކުރިއަށް ގެންދަން ތައްޔާރު ވަމުނެނެވެ. މީގެ ބޭނުމަކީ އެންޖީއޯގެ މެމްބަރުން އިތުރުކޮށް އެހީ ފޯރުކޮށްދިނުމުގެ މަސައްކަތް ހަލުވި ކުރުމެވެ. އަދި ސްޕޮންސާ ކުރަން ޝައުގުވެރިވާ ފަރާތްތަކަށްވެސް އެ ފުރުސަތު އޮތްކަން ސަމާ ފާހަގަކުރި އެވެ.
