ހުރިހާ ޓީޗަރުންނަށް ސެން ތަމްރީނު ދެނީ
ހުރިހާ ޓީޗަރުންނަކީވެސް ހާއްސަ އެހީތެރިކަމަށް ބޭނުންވާ ކުދިންނަށް ކިޔަވައިދޭ ސެން ޓީޗިން ދާއިރާއިން ތަމްރީނުވެފައިވާ ޓީޗަރުންނަށް ހެދުމުގެ މަސައްކަތް ފަށާފައިވާ ކަމަށް ރައީސް ޑރ މުހައްމަދު މުއިއްޒު މިއަދު ވިދާޅުވެއްޖެ އެވެ.
ރައީސް އެހެން ވިދާޅުވީ މާފަންނު މަދަރުސާއަށް 40 އަހަރު ފުރުމުގެ މުނާސަބަތުގައި މިއަދު ހަވީރު އޮތް ހާއްސަ ރަސްމިއްޔާތު ޝަރަފުވެރި ކޮށްދެއްވައި، ވާހަކަފުޅު ދައްކަވަމުންނެވެ.
އެ ރަސްމިއްޔާތުގައި ރައީސް ވިދާޅުވީ ސެން ޓީޗަރުން ތަމްރީނު ކުރުމުގެ އާ ޕްރޮގްރާމެއް ފެށުމުގެ މަސައްކަތް އެޑިއުކޭޝަން މިނިސްޓްރީން ކުރަމުންދާ ކަމަށެވެ. އެކަން ކުރިއަށްދަނީ އާ ކޮންސެޕްޓެއްގައި ކަމަށް ރައީސް ވިދާޅުވި އެވެ.
އިންކްލޫސިވް ގޮތެއްގައި ހުރިހާ ޓީޗަރުންނަކީވެސް އެ ދާއިރާއިން ތަމްރީނު ލިބިފައިވާ ޓީޗަރުންނަށް ހެދުމާއި، ހާއްސަކޮށް، އެ ދާއިރާގެ (ސެން) ޓީޗަރުން އުފެއްދުމަށް
އެމަނިކުފާނު ވިދާޅުވީ އެ ކަމުގައި ޝައުގުވެރިކަން ފާޅުކުރާ ހުރިހާ ފަރާތްތަކަކަށް ފުރުސަތުދީގެން، ކުރިއަށް އޮތް ތަނުގައި ހާއްސަ އެހީއަށް ބޭނުންވާ ކުދިންނަށް އިންކްލޫސިވް ގޮތެއްގައި ހަމަ އެއްވެސް ތަފާތެއް ނުގެނެސް، ތައުލީމީ ފުރުސަތު ހޯދައިދިނުމުގައި މެނިފެސްޓޯގައި ކަނޑައަޅާފައި އޮތް ގޮތަށް، އެ ސިޔާސަތު ތަންފީޒުކުރުމަކީ އެންމެ ބޭނުންވާ ގޮތް ކަމަށެވެ.
ރައީސް މުއިއްޒު ވިދާޅުވީ މާލޭގެ މޭޔަރަކަށް ހުންނެވިއިރުގައި މާފަންނު ސްކޫލްގައި ހާއްސަ އެހީއަށް ބޭނުންވާ ކުދިންނަށް ލޯތްބާއި ކުލުނާ އެކީގައި އެހީތެރިކަން ދެމުންދާ ތަން ފެނިވަޑައިގެންފައިވާ ކަމަށެވެ. ޓްރެއިންޑް ޓީޗަރުން އަދި ޓީޗަރުންނަށް އެ ޓްރޭނިން ލިބުމުން، އިތުރަށް ހާއްސަ އެހީއަށް ބޭނުންވާ ކުދިންނަށް ދެވޭނެ އެހީތެރިކަން އަދި ޓްރޭނިން އަދި ތައުލީމު ވަރަށް ބޮޑަށް އިތުރުވެގެންދާނެ ކަމަށް ވިދާޅުވި އެވެ.
ރައީސް ވިދާޅުވީ އެކަންކަން ކުރުމަށްޓަކައި އެޑިއުކޭޝަން މިނިސްޓްރީން މިހާރު ވަނީ ރާއްޖޭގެ ހުރިހާ ދިމާއެއްގައި ހުރި އެފަދަ ސްކޫލްތައް ޝާމިލުވާ ގޮތެއްގައި އެކަން ފުޅާކުރުމުގެ މަސައްކަތްތަކެއް ފަށާފައި ކަމަށެވެ.
އަންނަ އަހަރުގެ ތެރޭގައި، އެކި ލެވެލް ލެވެލްއަށް ޓްރޭނިން ދިނުމަށް، ޑިޕްލޮމާ އިން ފެށިގެން ޑިގްރީއާ ހަމަޔަށް ޓްރޭނިން ދިނުމުގެ ޕްރޮގްރާމްތަކެއް ގެންދިޔުމުގެ މަސައްކަތް ކުރާތީ، އެކި ދުވަސްވަރަށް އެކި ކުދިންނަށް އެކި ޓީޗަރުން ތަމްރީނު ކުރެވިގެންދާނެ ކަމަށް ވިދާޅުވި އެވެ.
އިސްލާމްދީނުގެ ވަރުގަދަ އަގީދާގެ މަތީގައި ތިބި، ގައުމު ދެކެ ލޯބިވާ، ގައުމިއްޔަތުގެ ރޫހު ފުރިހަމައަށް އަށަގެންފައިވާ، ގައުމުގެ މުސްތަގުބަލާ ހަވާލުވެވޭނެ ފަދަ ޒިންމާދާރު، ދަރިންތަކެއް ބިނާ ކުރުމަށް އެންމެން އެކުގައި، އެއް ރޫހެއްގައި، ގައުމީ ވިސްނުމެއްގައި މަސައްކަތް ކުރެއްވުމަށް އަޒުމް ކަނޑައެޅުމަށް ރައީސް ގޮވާލެއްވި އެވެ.
