ސަބްސިޑީ، އާސަންދަ އަދި ޕެންޝަން ނުކަނޑާނަން، ކޮށްދޭނީ ރަނގަޅު: ރައީސް
އެއްވެސް ރައްޔިތަކަށް ލިބެމުންދާ ސަބްސިޑީ އާއި އާސަންދަ އަދި ރިޓަޔާމަންޓް ޕެންޝަންގެ ފައިސާ ކަނޑާނުލާނެ ކަމުގެ ޔަގީންކަން ރައީސް ޑރ. މުހައްމަދު މުއިއްޒު ދެއްވައިފި އެވެ.
ރައީސް މި ޔަގީންކަން ދެެއްވީ އއ. އަތޮޅާއި ކ. އަތޮޅުގެ ބައެއް ރަށްތަކަށް އިއްޔެ ފެއްޓެވި ދަތުރުފުޅުގައި މަތިވެރިއަށް ވަޑައިގެން އެ ރަށުގެ ރައްޔިތުންނާ ބައްދަލުކުރައްވާ ރޭ ދެއްކެވި ވާހަކަފުޅުގަ އެވެ.
ރައީސް ވިދާޅުވީ ރިޔާސީ އިންތިހާބުގައި އެމަނިކުފާނު ވައުދުވެވަޑައިގެންނެވި ގޮތަށް މި ސަރުކާރުން ފައިސާ ޗާޕުނުކުރާނެ ކަމަށެވެ. ސަރުކާރުގެ އަމާޒަކީ ރާއްޖެ ބަނގުރޫޓުވިޔަ ނުދީ، ގައުމަށް އިގުތިސޯދީ ގޮތުން ތަރައްގީ ގެނައުމާ އެކު އުމްރާނީ ތަރައްގީގެ މަޝްރޫއުތައް ހިންގަމުން ދިއުން ކަމުގައި ފާހަގަކުރެއްވި އެވެ.
"ކުރިއަށް އޮތް ތަނުގައި އެއްވެސް ރައްޔިތަކަށް ލިބެމުންދާ ސަބްސިޑީއެއް ވެސް ނުކަނޑާނަން. އާސަންދައެއް ވެސް ނުކަނޑާނަން. ރިޓަޔާމަންޓް ޕެންޝަނެއް ވެސް ނުކަނޑާނަން. އަދި އެއަށް ވުރެ ރަނގަޅު ކޮށްދޭނީ،" ރައީސް ވިދާޅުވި އެވެ.
ރައީސް ވިދާޅުވި ގޮތުގައި ސަބްސިޑީ ދެމުން އަންނަ އުސޫލުތަކަށް ސަރުކާރުން ގެންނަން ނިންމާފައިވާ ބަދަލުތަކުގެ ތެރެއިން މައިގަނޑު ބަދަލަކީ ނާޖާއިޒު ގޮތެއްގައި މީގެކުރިން ކުރަމުން ދިޔަ ހަރަދުތައް ކުޑަކުރުން ކަމުގަ އެވެ. އެ ބަދަލާ އެކު އާސަންދައިގެ ބޭނުން ނަހަމަ ގޮތުގައި ހިފައި، ބޮޑު އަގުގައި ބޭސް ވިއްކަމުންދާ ދިއުން ފަދަ ކަންކަން ހުއްޓުވާނެ ކަމުގަ އެވެ.
"ބައެއް ބޭސް ރާއްޖޭގައި ވިއްކަމުން އަންނަނީ 1،000 ޕަސެންޓަށް ވުރެ ބޮޑު ފައިދާއެއް ލައިގެން. އެގޮތުން އެންމެ އާންމުކޮށް ވިއްކާ 250 ބޭހަށް ބެލި ނަމަވެސް އެއީ ހަގީގަތް ފެންނަން އޮތް ކަމެއް،" ރައީސް ވިދާޅުވި އެވެ.
އެމަނިކުފާނު ވިދާޅުވީ އެ ބަދަލުގެ ސަބަބުން އާންމުންނަށް އެއްވެސް އެއްޗެއް ނުގެއްލޭނެ ކަމަށެވެ. އެސްޓީއޯއިން ކަނޑައަޅާފައިވާ ރޭޓުގައި ބޭސް އަގުހެޔޮކޮށް ލިބޭނެކަން ފާހަގަކުރެއްވި އެވެ.
މިފަހުން ސަރުކާރުގެ ބައެއް މުއައްސަސާތަކުން ހިންގަމުން އަންނަ އަމިއްލަ ރިޓަޔަމަންޓް ސްކީމްތަކުގެ ދަށުން ވަޒީފާއިން އަލަށް ރިޓަޔަވާ މުވައްޒަފުންނަށް މަހުން މަހަށް ދޭ އެލަވަންސްތައް ކަނޑާލުމަށް ނިންމި އެވެ. އެހެންނަމަވެސް ރައީސް ވަނީ އެ ނިންމުން ބަދަލުކުރައްވާފަ އެވެ.
Ads by STO
